【全劇終】《我喺街執咗個失憶嘅女仔返屋企》: 青葉（四）

無論我幾想知小悠約咗邊個都好，話晒都冇理由玩跟蹤架…？
 
我先唔想俾人當成可疑人物…。
 
所以，都係算啦。
 
我以為終於說服到自己，點知校門都未到就俾我見到小悠企埋一邊等人。
 
我即刻匿埋喺柱後面。
 




望一眼，冇所謂啩…。
 
我只係想知道佢神神秘秘，究竟約咗邊個啫…。
 
忽然磅一聲，一座重型坦克降落到小悠跟前：「小悠，我地可以開始今個禮拜嘅布甸約會喇！」
 
係之前有份參加學生會補選，現任學生會外務秘書杜朋也。
 
…布甸約會？
 




「嗯！為咗今日嘅到來，我已經成個星期冇食過甜品…」小悠同杜朋也一邊行一邊講。
 
估唔到小悠咁守承諾，真係每個禮拜同肥仔去食布甸…
 
「呼…」唔係羅凱撒。
 
諗深一層，羅凱撒每日放學都要摺喺學生會室處理公務，邊有時間約小悠去街。
 
果然係我諗太多…
 




…！！！！！
 
正當我鬆一口氣，喺我前方50米嘅肥仔突然撲入小悠懷裏，仲喺佢心口不停磨蹭；而小悠就撫摸住肥仔嘅短髮。
 
我錯過咗啲咩，至會一跳跳到呢個畫面。
 
佢地口噏噏講完啲嘢，就開始繼續行。
 
佢地行緊嘅，係返屋企嘅方向。
 
既然同一條路，咁行喺佢地後面都唔算跟蹤，啩。
 
我加快腳步，一邊搵藏匿處，一邊留意前方二人嘅動向。
 
好快去到一間新開嘅甜品店。




 
佢地一人買咗一個布甸，然後企喺側邊啲立食區度開餐。
 
我一直企喺樹後觀察，佢地一路食，一路有講有笑，如入無人之境一樣。
 
直到有個帶住老虎狗散步嘅路人經過，小悠就俾嗰隻老虎狗吸引咗目光。
 
佢雙手貼住店內嘅落地玻璃窗，眼甘甘望實隻老虎狗，一副想逗隻狗玩嘅表情。
 
眼見隻狗向我方向行緊過嚟，我將身體隱藏於樹幹後方，費事跟蹤小悠一事敗露。
 
講錯，唔係跟蹤，係咁啱走喺同一個方向。
 
點知隻老虎狗經過我側邊嗰陣突然狂吠，嚇到我成個彈起身。
 




「唔好意思呀，唔好意思呀。」個主人一臉抱歉，然後高速拉住隻狗跑走。
 
我下意識望返布甸店嗰邊，一擰轉頭就同店裏面嘅小悠對上視線。
 
我即刻縮返喺樹幹後面。
 
「至衰都係隻狗…」
 
不過我同小悠相隔咗幾十米，加上視線互相觸碰嘅時間只有一瞬間，佢未必認得係我。
 
佢望多兩望，就俾杜朋也拉返入去食布甸，我再度鬆一口氣。
 
睇嚟要小心先得…。
 
 ＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝





關於小悠同朋也嘅布甸之約，請參見：學生會補選篇：正選當日