【全劇終】《我喺街執咗個失憶嘅女仔返屋企》: 道別的方式（上）

回程嘅時候，我同小悠之間瀰漫住一股令人在意嘅沉默。
 
正當抱怨自己太過得意忘形，一不小心就講起沉重話題之際，小悠突然以嚇人一跳嘅聲量大叫：
 
「吖！」
 
我嚇到彈一彈：「…咩事？」
 
「我有冇同你講過，紫悅係一個好犀利嘅龍貓專家？」
 




我對氣氛轉換嘅速度感到不解，然後回答：「…你有講過，佢係喺世界各地研究龍貓架嘛。」
 
「嗯！所以，我真係好期待可以同紫悅一齊去睇呢個世界。」
 
我嘆一口氣，然後笑。
 
明明冇幾耐之前先莫名其妙咁流眼淚，呢一刻又變返精神奕奕咁同我講起龍貓嘅話題。
 
不過，我突然諗起一樣嘢：「係喎。」
 




「嗯？」
 
「你地諗好會去邊個地方未？」雖然知道佢要走嘅日期，但佢會去邊我就從來冇問過。
 
「嗯！」應完呢句之後，佢望向前方，「係一個叫做敍爾特嘅小島。」
 
「敍…爾特？邊度嚟？聽都未聽過…」諗諗吓會唔會係嗰個叫紫悅嘅人老作個地方出嚟呃細路…
 
「你冇聽過都好平常，係個冇人識嘅島嚟。」小悠一臉從容地講。
 




「你過到去，寄張postcard返嚟都得啩？」
 
「唔…要睇吓我記唔記得…！」
 
「你一定會掛住玩龍貓！連繽紛樂幾錢一pack都唔記得！」
 
「咁你要趁我仲未走嘅時候買多啲俾我，等我深刻啲…！」小悠講呢句嘅同時，笑得好開心。
 
剛才嘅沉重感逐漸消失，氣氛又恢復到平常一樣，我為此鬆一口氣。
 
返到去之後，我偷偷地上網查，發現原來真係有個地方叫做敍爾特，係歐洲嘅一個小島。
 
「去到歐洲咁遠…。」
 
我坐喺房裏面，一邊兀櫈一邊諗，自此知道小悠要走之後，都冇思考過點樣好好同佢道別。




 
由喺垃圾房遇到佢到而家，原來已經過咗十個月。
 
明明十個月只係好短嘅時間，將來回想起甚至可能覺得微不足道，但我比任何人都清楚，由佢話要走嘅一刻起，灌注喺我內心嘅係至今為止程度最為強烈嘅不捨感覺。
 
只係，我強行將呢個會阻礙佢實現夢想嘅障礙物壓抑。
 
唔止感覺，仲有感情。
 
佢搵到自己想做嘅事，除咗替佢開心，然後誠心祝福佢之外，我唔應該諗其他嘢。
 
小悠都一定係咁諗。唯有我繼續專注喺畫畫上面，我地就會變成一齊朝向各自嘅目標而努力、一齊追尋夢想嘅同伴。
 
呢一個，就係我對佢嘅道別方式。