送走咗Amy之後我即刻拿拿林沖涼衝上床訓教,廢事自己亂咁諗嘢。但係我瞓喺張床碌嚟碌去都瞓唔着,個腦全部都係同Anson嘅嘢,當初我係喺我間hall到見到Anson,我只係一個自摺,剩係會讀書嘅小毒毒。但係Anson係嗰啲好champ嘅人。靚仔讀書,好又成日join hall event。第一次同佢傾計係因為我roommate想上莊,於是拉埋我去搵Anson問佢join唔join。第一次同佢距離咁近,我發現佢個人真係好陽光,份人nice又幽默,唔掛得咁多女女啦。但我當時無諗多,同佢都只係會傾下莊務,真正同佢熟應該係嗰一次……

「鈴鈴鈴鈴鈴鈴鈴」

原來諗諗下就已經六點幾,個鬧鐘都響埋,要起身返工。我一離開張床就去咗刷牙冼面,呢個時候我先發現我個黑眼圈好大。唉,早知我就心無旁騖唔好諗咁多啦。而家要化濃啲個妝。到我搞掂晒可以出門口已經七點幾。唔係第一日就遲到咁黑仔啊嘛。我九秒九衝落樓下,發現Amy已經等緊我。我未行到過去佢已經屌鳩我。
「咁耐架,打電話比你又無聽」佢一邊講一邊坐上我部車。
我坐係車到搵,「唔係掛 ,我漏咗手機」我絕望了。而家都趕唔切返屋企攞返。

「算啦,返到學校先睇下點」我講完就踩油直衝學校。





好彩,最後我同Amy都趕得切喺遲到扣人工前入學校拍卡。我拍完就9秒9衝上3樓,入3C班房。

我一入到班房,全部人靜晒。我喺張枱擺低咗嘢先同呢班學生。

「大家好,我係你地今年嘅班主任Miss Lam。我會教大家英文,希望我地今年可以相處得開心啲」我講完就叫班學生跟學號逐個逐個做自我介紹。

唔記得講添,其實我係一畢業就入咗呢間普通band 1女校教書。今年係我第二年喺呢度教書。而Amy係我上莊,所以佢係第三年喺到教。

我等全班34人都做晒自我介紹之後,微微笑咗一笑就講「其實今日都係啱啱開學啫,咁啦,你地可以隨便問我三條問題,我會認真答嘅。」





果然呢句嘅威力好大,本身第一日開學,每個人為咗留個好印象比我,啱啱咁耐都無出過聲,而家即刻顯出原型。

好快就有一個學生企起身問「Miss Lam,你而家係A定O啊」我去check咗name list。好,原來你叫Janelle,我認住你,你同我小心啲啊。

佢問完之後全班都開始起哄。「係囉,Miss Lam我地都想知」


呢班靚妹個個人細鬼大,我尋日先分咗手啊,都唔睇下我面色做人。諷刺嘅係呢個遊戲係我話要玩嘅。最後我唯有無奈咁答「我而家A,A幾我就唔講了。大家有緣就會知」

可能呢條題目太癲,所以第二同第三題都好正常,都係問下啲你平時鍾意做咩咁。我答完之後我地班就陷入無人講嘢,十分尷尬嘅境地。





終於,猶如救贖嘅落堂鐘響咗。我鬆咗一口氣,對全班講「咁我地今日嚟到呢到先,你地放小息啦」

我一講完,全班就即刻衝晒出去tuck shop買野食。我緊係返staff room瞓一瞓啦,尋日成晚唔瞓我已經好攰,我好似有初老嘅徵狀咁。

我用比正常快小小嘅步伐行去搭𨋢。你問我點解唔行樓梯?因為我返工嗰時都著高踭鞋,連路都行唔快,點行樓梯。


我喺𨋢口停低咗等𨋢,無啦啦有個人撞咗落我到,我著高踭鞋又企唔穩,咁就比佢撲低咗。喺扑街前一秒,我個腦諗嘅係點解我今日可以咁黑仔。



(頭個幾章無咁快甜住,不過下章比大家ff下都得嘅)
已有 0 人追稿