直到我睇完跌打,返到屋企九點幾。我先發現啱啱全程我都係諗住Janelle。今晚注定係個無眠夜。


過咗今晚,好似好多嘢都改變咗,但又講唔出喺邊到變咗。我同Janelle無再單獨講嘢,佢亦無主動搵我。其實都幾好吖,我諗呢個先係一個正常嘅狀況,唔係咩?但係,點解喺我一入3C課室,第一個想見嘅就係佢?上堂成日搵佢答問題,都係想聽下佢把聲。可能,我只係唔甘心,唔甘心佢撞完我第二日已經好似無事發生過咁,連我自己仲緊張過佢。

呢個狀態維持咗兩個禮拜,我都了解咗啲關於佢嘅嘢,Janelle好似有同兩個人特別熟。一個叫Mavis,另一個叫Olivia。佢地好似上咩堂都癡埋一齊咁。Mavis應該係一個幾搞笑嘅人,其他老師都覺得佢係一個識搞氣氛嘅人。至少Amy好似幾喜佢,成日都同我講Mavis講嘅嘢幾正,我都費時理佢,我對住Mavis嘅時間仲長過佢,我會唔知咩。

Olivia就係安安靜靜嘅type,平時唔多出聲,唔會主動答老師問題,存在感有啲低。佢地嘅共同點係三個平時上堂都唔聽書,聚埋一齊傾計,但係成績出奇咁好。唔怪得佢地做到friend啦,可能學霸嘅氣場都係互吸囉。本身其他科嘅老師都睇唔慣佢地咁,成日同我投訴佢地。但一考完第一次test,嗰班老師即刻收晒聲咁。

果然,老師都係膚淺架啦,平時睇你唔順眼想出氣就搵你鬧下。鬧完下次發現原來你成績唔錯就唔鬧,討好你都嚟唔切。我望住呢班老屎忽,突然感嘆可能我老幾年,做多幾年都會變到同佢地一樣。通常,啲學生都係鍾意後生嘅老師,可能只係因為佢地覺得後生啲嘅老師更加明白佢地嘅心事掛。但係,呢啲後生嘅老師好快就比社會同化咗。最後,變得同啲old seafood無分別。到咗嗰個時候,如果學生想搵佢談心,佢只會敷衍幾句,再唔係就轉介嘅學生去見社工,唔理學生自己嘅意願。






而而家,Janelle好似日日避住我咁。有時佢小息同Mavis, Olivia佢地講緊嘢,一見到我就好驚咁,跑返入班房。上堂嘅時唔小心同佢有啲眼神接觸,佢又會好唔自在咁避開我嘅視線。一落堂就沖出班房,我想叫住佢都無機會。呢個時候,我反而想問下Amy我應該要做啲咩Janelle先會無咁驚我,至少唔好一見到我就想跑走。


但係,我都係睇小咗Amy嘅魅力了,今日專登早的落堂,去1A班房搵佢。我一落到去,就見到啲f1圍住晒Amy,有啲癲嘅仲幫佢買埋嘢食。我明啦,班f1係對Amy有意思。說來諷刺,即使我細過Amy一年,Amy仍然係全校最受歡迎嘅老師。無辦法啦,佢來者不拒。上年,我一入呢間學校,就已經見到好多學生同佢示愛。如果Amy係熱情嘅,咁我應該算高冷,我唔想同學生有太多接觸,都唔想多事。講起上嚟,Janelle係第一個令我有興趣知佢啲嘢嘅人。諗諗下,

Amy已經擺脫咗佢班迷妹,兩隻手攞滿晒嘢咁過嚟。用只有我地兩個先聽到嘅聲音問

「Hazel,做咩今日咁好落嚟搵我,睇你個樣就係有事相求啦。講啦,今次又發生咩事」






(篇文真係好快入大直路架啦,甜呢家嘢好快有)
已有 0 人追稿