「我地上咗教員室先講啦,廢事等陣你啲迷妹聽到就唔好啦」我講完就急急腳拉咗Amy上去。

好彩Amy嘅位置啱啱喺正教員室嘅角落頭,所以平時無乜做嗰到都無咩人。今日我嚟得早,連坐Amy附近嘅老師都未嚟。

「神神秘祕咁,到底做咩,係咪識咗新仔仔想叫姐姐我傳授你幾招吖」Amy一見周圍無人就抓住我問。

我陰差陽錯咁竟然答咗「如果我話我真係識到一個呢」一講完,我就開始後悔同佢講了。

「咁仲等乜嘢,你去馬啦,我會做你幕後軍師架。但係,你出pool要請我食餐飯咁囉。話晒我都係個愛情專家嚟,有我幫你你執到啦」Amy一輪嘴講晒,之後停一停,有啲尷尬咁問



「係喎,咁耐唔記得咗問添,唔知有幸比我地可愛溫柔靚女嘅Hazel睇中嘅人係邊個呢,我好有興趣知架」

今次真係仆街了,本身已經係口快快講錯咗,如果我而家先同Amy講我啱啱只係講笑,佢一定唔會信我架。我思前想後,最後唯有咁答「我溝到嘅話,你遲啲咪知囉,使咩咁心急。咁你而家仲幫唔幫我架」

我而家唯有見步行步啦,唔講都講咗,而家咪用一個大話冚另一個大話。

Amy拍晒心口講「放心啦,我咁多經驗,肯定知無不言,言無不盡」

「又唔使咁誇張。咁我問你啦,如果嗰個人好似成日有心避開你咁,唔小心有目光接觸仲會面紅,咁其實代表啲咩」我一次過問完,等Amy嘅答案。



呢個時候,我地兩個都無再出聲。

幾分鐘後,「你話你鐘意嗰個成日想避開你,見到你仲會面紅?真係咁?」Amy個樣有啲急咁問。

點解Amy好似有啲質疑呢樣嘢係咪真嘅,唔通佢知道咗啲咩。為咗保險起見,我問「點解咁問嘅?」

Amy塊面好似仲急咗啲「你答咗我先啦」

事到如今,死雞撐飯蓋啦,我答「係真架,我幾時呃過你喎」



如果Amy真係知我呃佢,我一定會被逼簽好多不平等條約。

Amy個樣有啲開心咁話「如果你鍾意嗰個平時想避開你,見到你又會面紅,咁樣唔係鍾意你係咩。睇個樣你鍾意嗰個好似幾純情,你自己把握機會啦,蘇州過後無艇搭。」

Amy最後講咩嘢,我已經無用心聽,個腦focus咗喺Amy話Janelle鐘意我個到。唔係吖嘛,我係咪發緊夢





(下章字數會多啲架啦)
已有 0 人追稿