「喂,你個樣做咩好似呆咗咁嘅。係咪太開心啫。」Amy用佢隻手喺我面前掃咗掃。

其實我都講唔出我係咩心情,一方面我唔太信Janelle係鍾意咗我,另一方面係Amy之前都講過Janelle係一個player,收咗好多兵。既然佢咁多兵,點解會鍾意我喎。

所以我唯有答「你覺得我係開心,我咪係開心囉」

Amy陰陰笑咁話「既然人地都係鍾意你,你就好快啲表白啦,你再遲啲你鍾意嗰個就比人搶走架啦」

我再次喺心底嘆咗一口氣,表乜鬼白啫,人地可能都唔係鍾意我。但係我就話「得啦得啦,我會搵個時間表白架啦,你而家去做嘢先啦」






Amy走咗之後,我就坐喺我個位都諗到底我係唔係真係鐘意咗Janelle。由開學到而家,我單獨同佢講野嘅次數都唔係好多。只係我上次比佢搞到仆街嗰時先有接觸。咁Janelle點解會鍾意咗我嘅?

我諗諗下,連個break完咗我都唔知。見教員室啲同事都出緊去,我先發現。即刻執好嘢沖出去,睇下個時間表先發現原來我呢堂要去3C上。

但係呢一堂我都無乜心機上,入到班房就播咗條30分鐘嘅教writing嘅youtube片比班學生睇,我就坐喺位自己諗嘢。眼尾見到Janelle今日唔知點解一邊睇youtube一邊偷偷地望住我。於是,我係自己心底做咗一個決定。


好快,55分鐘過咗去,落堂鐘聲又響咗。同平時一樣,Janelle都係鐘聲一響就想衝出門口。但係你估我今次仲會比你走咩。少年,你太年輕了,以為走得咁快咁就避開到我咩。我不急不忙咁叫住佢





「Janelle,你留一留低,我有小小嘢想搵你」

Janelle拎轉面望住我,好似想確定呢件事係唔係真嘅咁。

我微微一笑,跟住話「大家無嘢想問我就可以落堂架啦」

講完我就直接走去門口到,搭住Janelle嘅膊頭行出去。佢一出咗班房就掙脫我搭住佢嘅手。即刻問「Miss Lam,你搵我咩事」個樣好似好嚴肅。

我忍唔住玩玩佢「咁你覺得我搵你會有咩事啊,你估下先囉」





Janelle認真咁諗咗幾分鐘,然後答「我真係估唔到啦,Miss Lam你開估啦」

我喺個心到講,其實本來我都無乜事搵你,你估唔到都正常啦。但係當然呢啲嘢,我唔可以講比佢知啦。所以我啱啱幫自己搵咗一個藉口。

「好啦,咁我開估。其實都唔係啲咩好緊要嘅事嚟嘅。只係你都好快要揀科,想問下你打算揀咩啫」

我講完,見到Janelle個樣有啲鬆咗一口氣咁。不過,我驚佢唔信我,仲補多咗一句。

「我遲啲都會問埋其他同學架」

「哦,其實我無乜點諗揀科啲嘢,都無咩鐘意嘅科,我應該都係會睇住12月考試個分嚟簡囉」

見佢都答咗,我都無理由再留住佢。

「嗯,我知啦。咁你可以返班房先啦。都就快上堂」





我講完就見到佢轉身走咗。但係,我好似抑壓唔到內心嘅疑問,叫住咗佢,抓住佢隻手。喺佢驚訝嘅目光中,我扮到好淡定咁問,

「點解你自從嗰次之後一直避開我?」

我地都好有默契咁無提係邊一次,因為我地都心知肚明,咪係我仆親嗰次囉。
q我加多句「你唔答我唔使旨意可以走」

我留意到佢啲神色有啲驚。

佢話「無啊,Miss Lam我點會避開你喎」

明明就有!但佢唔講真話,我都控制唔到。諗嚟諗去,最後唯有講「無就最好,以後都唔可以避開我知唔知」

我講完就走左,唔俾Janelle有反抗嘅機會。
已有 0 人追稿