我都唔知點解Amy咁驚訝,可能係因為我份人決定咗嘅嘢就唔會改變。但而家同Anson一齊翻,唔太似我會做嘅事。我打算簡單咁講下尋日發生咩事比Amy聽。

「尋晚Anson WhatsApp 我話要上嚟攞返啲嘢,我應承咗。但係佢攞完啲嘢之後喺到自彈自唱,又話咩好掛住我,無咗我唔得。跟住我地就一齊返囉。」

我省略咗我同Anson做愛嘅情節,畢竟我諗Amy都唔會想知呢啲嘢啦。

Amy聽完,個樣有啲凝重「我以為你唔會同佢一齊返」

我話「咁Anson都講咗佢會改啦,咁我咪比個機會佢囉。」





Amy好認真咁講「你變咗啦,之前嘅你係唔會容忍呢啲嘢架。」

我不可置否,同Amy講句夠鐘上堂就走咗。

所以而家嘅我,同Anson係咩關係呢?我地根本都唔講過做返對方男女朋友嘅說話。咁我地而家即係sp,fwb?

我帶住滿腔疑問,嚟到放工嘅時間。

因為今朝林急林忙出嚟,所以我無揸車,搭咗的士。而家放工,我都係諗住睇下有無巴士搭返屋企。但係我一出學校門口,就見到Anson同佢架車停咗喺學校門口嗰條路到。而Anson隻手仲揸住紮花。睇嘅Logo,應該喺係旺角花墟間花店買嘅。咁就奇怪啦,我喺
鰂魚涌到教書,Anson佢係中環嗰邊返工,點解會無啦啦去到旺角咁遠嘅。





因為而家只係四點幾,仲有啲學生喺學校入面出嚟,
所以我費事咁高調,比啲學生知道咗就唔係咁好啦。所以我諗住靜靜地上Anson部車,點知Anson一見到我就舉高咗佢攞住紮花嗰隻手,仲喺到fing fing下,驚死我見佢唔到咁。

佢咁高調嘅行為搞到一個跟喺我後面一齊出嚟嘅學生都見到Anson。我擰轉頭一望,竟然係Janelle。佢望住我,我又望住佢。終於,佢頂唔順呢個咁尷尬嘅環境,開口問「Miss Lam,Um嗰個同你揮手嘅係你男朋友吖?」


我個腦喺呢短短十幾秒飛快咁思考,我如果答Anson只係我啊哥,比學生發現嘅機率有幾高。但係,最後我放棄咗掙扎,還掂我答咩啲學生都會覺得佢係我男朋友,咁我都係講真話算啦。

「Oh係啊,我男朋友嚟接我。咁我走先啦,費事要佢等咁耐。」





我上咗Anson架車,佢遞紮花比我,紮花係24支紅玫瑰。但係,Anson明明知我最鍾意嘅花係滿天星。我問佢「做咩今日咁好送花比我嘅。」

Anson專心望住路面情況揸車,無望過嚟。佢話「無啊,今日早咗放工,經過間賣花嘅,咪買一紮比你囉。做咩,你唔鍾意?」

我表面好平靜咁講「唔係啊,我鍾意。只係無諗過你而家咁浪漫,你之前都唔送花嘅。」

我好肯定Anson放工係絕對唔會經過嗰間係旺角嘅花店,到底佢有咩瞞住我?
已有 0 人追稿