Anson無繼續答我問佢點解咁浪漫嗰條問題。我亦無追問。算啦,既然Anson唔想講出嚟,咁我都唔好強人所難。

唔記得同大家講Anson做咩添,其實佢而家做緊Big 4嘅會計師,所以佢平時做嘢都幾忙。我費時係佢返工嘅時候message佢搞到佢分心,所以通常有咩都係Anson send message比我先。

就係咁,呢個車程再無一個人出聲。Anson車咗我返我屋企。我問佢「你今晚喺呢到瞓?」

Anson話「睇情況啦,我想喺到沖咗個涼先啫。」

我行入房,幫佢攞埋啲衫褲出嚟。說來諷刺,尋晚Anson嚟嗰時,仲係諗住攞翻走啲嘢。但係只需一日嘅時間,佢嘅物品又重新出現返喺我間屋到。





趁Anson沖緊涼嗰時,我見到佢擺喺枱嗰部手機喺咁響,好似有好多message咁。不過我記得Anson不嬲都有兩部手機架啦。一部係公司專用,一部係比屋企人同朋友聯絡。公司啲message 應該唔會係佢呢部手機到架喎。

但係啲Anson好似無add send message嗰個人入contact到,所以只係顯示咗嗰個人嘅電話號碼。我都睇唔到啲message嘅內容,因為嗰啲全部都係voice message,每一條都有幾分鐘。我好奇,打算開佢部手機睇下係邊個搵佢。我記得Anson嘅密碼一向都係我地拍咗幾多年拖加紀念日。所以我輸入咗050402。

但係佢竟然顯示密碼輸入錯誤。我覺得應該係我唔小心打錯咗數字,所以我再重新輸入050402,都係唔得。點解Anson會轉咗密碼嘅?我唔信邪,再試咗我嘅生日,980215,都唔得。我連Anson自己個生日都試埋,980103,仲係錯。

呢個時候我先發現我已經試咗四次,如果我試到第五次都仲係開唔到佢部手機嘅話,Anson部手機就會自動上鎖。Anson都沖咗咁耐涼,我覺得佢都就快出嚟,所以我最後都係決定唔繼續試落去。我將佢部手機放返係原位。然後我坐返喺梳化到,攞自己部手機出嚟扮睇緊。


我坐咗幾分鐘之後Anson就係廁所到出嚟,佢出嚟第一時間係開部手機嚟睇。有啲緊張咁問我「你啱啱有無開過我部手機」我驚驚地咁話「無吖,乜唔係你啲同事搵你咩」





其實我地兩個都心知肚明,同事係無Anson呢個電話號碼嘅。Anson亦唔解釋邊個搵佢,急急腳攞起佢個袋,著好鞋。

我有啲納悶,佢只係嚟沖咗個涼,做咩咁快走。我攔住佢,問「做咩啱啱嚟就咁快走吖」

佢有啲唔耐煩咁話「我跟啲嘢仲未做曬,聽日deadline,要返屋企做埋佢先得」講完就咁出咗門口。

而家,直覺話我知Anson一定係有啲嘢暪住我。

(我開咗新故《我係一個分手禮儀師,專門幫人體面地分手》,大家過去支持下啦!)
已有 0 人追稿