我無喺全班面前過於糾結呢個問題。

「大家可以繼續問啦。希望以後嘅嘢大家都可以直接問我啦,有咩想知都可以出聲。今堂講完就算啦,遲啲過咗呢堂唔好再提起」我講就咁講,其實跟本唔會有人跟住做。

就讓我們承認,八卦對我們來說都有致命的吸引力。

啲學生先係靜咗一下,跟住若無其事咁繼續問我問題,彷彿啱啱我無講過嗰句說話一樣。

「Miss Lam你男朋友好浪漫啊,仲會送玫瑰花比你」





但係我一啲都唔鍾意玫瑰花。


「係囉,Miss Lam你同你男朋友點識架,講比我地聽下啦。」

我就話「讀大學嗰時識架囉,我中學嗰時好乖乖女,每日唔係讀書就有嘢做,邊有時間拍拖」

我頓咗一頓,然後以過來人嘅身份話「所以你地都係讀好書先啦,拍拖呢啲嘢遲啲都得啦。」

呢句說話擊中咗中學少女嘅內心。





今次係Janelle講野「咩喎,Miss Lam你中學無拍拖啫。點解要我地搵到啱嘅人都唔拍拖喎。」

贊同Janelle嘅聲音此起彼落。

「咪係囉,中學生已經有自己諗法架啦」

「其實係咪Missy你中學無拍所以唔想我地有得出pool咋」

我無正面回應,而係行去Janelle嘅位到,用不大不小,但啱啱好全班都可以聽到嘅語氣,疑惑咁問「你咁緊張,唔通你已經搵到男朋友所以先咁講?」





一講完,全班都開始起哄。

果然,流言係可以令成班人一齊起哄。尤其,呢句說話係由一個老師口中所出。

成班學生已經唔記得佢地本身係想問我同Anson嘅嘢。當另一件事嘅熱度更高嘅時候,人們就會下意識咁遺忘原本嘅話題。咁都好嘅,話曬我都唔想必啲學生問長問短。但係就對Janelle有啲唔公平囉,佢只係提出下,就比我咁樣利用咗。

我再望下Janelle,佢已經比大家問到面都紅曬。個個都話「原來你有仔都唔話我地知」「幾時請食飯先」「你男朋友係咪好靚仔架」。

我見到Janelle咁慘,有小小內疚,諗住上去幫佢解下圍。係呢個時候,落堂鐘終於響咗。


(終於忙完,呢排會多啲更新!)
已有 0 人追稿