話快唔快,話慢唔慢,下個禮拜就係我中學第一次考試啦。 

雖則我成績都唔算差,但係又唔算最top囉,我估應該都係考20幾30幾名度。

而家中學咁多科,好多嘢溫呀,嗰啲中史、地理,真係撚好難。

所以我今日放咗學之後下定決心,走咗去學校圖書館溫書。

我坐低攞咗本中史書出嚟,溫下溫下,有人坐咗埋嚟,唔覺意望咗佢一眼,先發覺原來係阿琪。





阿琪個樣有啲詫異。「咦,咁啱嘅,你都嚟圖書館溫書啊?溫邊科啊?」 

「溫緊中史啊,真係好撚難,個啲乜黃帝蚩尤,都唔知噏乜春。」 

「係呢…我科學唔係好識啊,可唔可以教下我呀?」佢攞咗本科學練習出嚟。

哈,仲以為佢好勁,原來都會有嘢唔識,今次仲唔捉到佢痛腳,俾我寸撚番佢一輪先。

「哈哈,原來學霸都有嘢唔識,仲以為你好勁添。」我一面得戚咁講。





「咁…你肯唔肯教我呀?最多我教返你中史喇。」阿琪一面苦笑。

咦, OK喎,橫掂我中史咁差,要合格都凍過冷水啦,同埋我不嬲科學都幾好嘅,雙贏。 

「好啦,咁你教咗我中史先啦。」

跟住我哋就互相幫對方溫書,一邊有講有笑,不知不覺已經去到好夜,校工趕我哋走嘅時候,先發覺係已經六點。

我哋返屋企係同一條路,咁我同阿一邊吹水一邊行返去。 





「你哋男仔平時會做啲咩㗎 ?」 

「都冇乜做,平時打機放假去玩踢波咁,諗起都有啲毒。」

「嘩…你哋咁多時間做呢啲嘢嘅?」佢一面驚訝咁問我。

「咁你呢?」我問佢。 「而家中學咁多嘢讀,淨係溫書都唔夠時間啦。」

「嘩唔怪得你咁勁啦,日日掛住溫書。」 

到咗佢屋企樓下,阿琪同我揮手:「拜拜!」 

我都同佢say bye,唔知點解突然有啲唔捨得嘅感覺,不過都應該係錯覺姐。

***





終於考完試,今日就要派成績表,我預感今次都考得OK,名次高唔高就另外一回事啦。

「王子軒。」Miss Cheung嗌到我名,我出咗去攞成績表。

睇下先......

中文:15/132

英文:13/132

數學:5/132

通識:17/132





嘩D主科都考得幾好喎,尤其係數學。

睇埋落去先......

科學:1/132

電腦:6/132

地理:24/132

中史:10/132

哈,科學係我嘅撚手小菜,考第一係意料之內。

但係,中史,What the fuck,第十?!我竟然可以係一科我唔擅長嘅科目考到咁高名次,真係奇蹟!今次真係要多謝阿教我喇。





再睇埋班級名次......

全班:4/33

全級:10/132

Yeah,估唔到我竟然考到Top 10,有得上台同班學霸一齊攞獎喎!

「屌,估唔到你條仆街仔都有第十,真係肥豬都會飛。」

阿正同阿恆不嬲都好勁,分別考第四同第五。

「呢D先係我嘅實力。」我回咗佢哋一句。





諗住過去多謝阿,但係見到佢愁眉苦臉咁坐喺度,就問佢:「你考得點呀?」

「考得麻麻咋…唉你想知就自己睇啦。」佢遞咗張成績表俾我。

我第一眼望就見到:全級:1/132。

除咗佢科學、數學考第二同埋電腦考第四之外,其他科目都係考第一。屌,真學神。

「屌啊,考第一喎!咁都叫麻麻地?」 

「電腦考得第四咋...咁我諗住全部科都有頭三名嘛......點都好,多謝你幫我溫科學。」

「唔使咁講,係要我多謝你先真,我中史竟然有第十啊!使唔使報答你?」 

「唔使啦……一係你今日可唔可以同我一齊出去食飯,阿菲病咗無返學冇得陪我出去食。」佢指住我隔離吉左嘅位。

「OK啊...但係我叫埋阿恆同阿正喎...喂你地兩個得唔得一齊食。」 

「唔啦,唔阻住你哋兩個二人世界,我哋唔想做電燈膽。」

「玩鳩我呀,算啦,由得你哋。」我對佢哋舉左一下中指。

***

放咗學之後,做咗一陣功課,見到家姐返咗嚟,即刻同佢報喜:「我考咗第十啊!」 

「哇你個死仔包都幾勁喎,獎勵你啦,今晚帶你出去食糖水。」

「多謝家姐!」 

順便喺呢度講吓少少我屋企嘅情況。屋企都算有錢,但係因為父母長期喺外國做嘢,所以都係家姐喺屋企照顧我。家姐叫王子晴,16歲,中五,同我讀同一間中學。令到我有啲妒忌嘅係家姐真係好靚,身材又正,係我哋學校公認嘅女神,唔係講笑,有時我都會特登望多佢幾眼(我就唔搞姊弟戀呢家野嘅)。但係佢而家仲係A0,大把男仔追佢,佢都冇接受到。

夜晚我哋就去咗樓下嗰間松記糖水店,我嗌左個榴槤心太軟。

「你個死仔包,使唔使食咁貴呀?」家姐輕輕力揼咗我一下。

「哈,咁你話你請嘛,又唔係用我自己錢。」 

「你真係…話時話點解今次考得咁好嘅?」

「哦,我哋班有個女仔好勁,佢幫我溫書先考得咁好。」 

「唔怪得次次溫書溫到咁晏先返屋企啦,原來…有女仔陪你。」家姐陰陰嘴笑。「咦係喎!我今日見到你同一個女仔兩個人去咗譚仔食,係唔係就係佢啊?」

「屌,咁都俾你撞到。係呀咁又點?」

「曖昧緊啦?」

「乜...乜嘢啊,梗係唔係啦。」我塊面紅晒。 

「哦,明白。咁即係你鍾意人哋,單戀呀?喂,使唔使我教下你點樣追女仔,可能人哋都對你有意思呢。」 

「教...教條春啊。」我都唔知自己講緊啲乜。

「你信唔過家姐啊,話晒我都畀好多個男仔追過,佢哋嗰啲咩溝女大法,我都見過晒啦,過返幾招畀你啦。」 

「乜…乜嘢啊,我幾時講過鍾意佢啊,都冇。」

「算吧啦你,認咗佢啦,使乜怕羞啫。」

「都冇,認咩啫?家姐咁靚我都唔溝啦,點會睇得起其他女仔,你話係唔係?」我篤咗家姐塊面一下。

「作死呀,篤我?去死啦!」家姐瘋狂搔我胳肋底。

「哎呀哎呀…唔玩啦唔玩呀...救命呀…投降啦投降啦...」 

「哈哈,都係我勁!」   
已有 0 人追稿