考完試之後,有好多唔同嘅學校活動接踵而來。

而我同阿正、阿恆報名參加咗社際足球比賽,我哋三個都係足球熱愛者。

阿正係踢前鋒,佢跑得唔快,扭波一般,冇身位,但係佢哋走位好好,次次塞直線畀佢佢都可以攞到粒波,踢法似意大利傳奇射手恩沙基(Inzaghi)。



阿恆係我哋三個之中技術最差嘅一個,但佢係球場上面好勤力,次次都搏命去搶波,有啲似法國嘅世界級防中簡迪(Kanté)。「地球上嘅70%被海洋覆蓋,剩返嘅30%由簡迪覆蓋。」呢句係用呢誇張化簡迪喺球場上面嘅覆蓋率,阿恆當然冇佢嘅30%,但係應該都有15%掛。







而我係踢攻中位,帶波跑得唔太快,扭波還ok,但係我塞直線幾勁,射波大力,遠射、窩利都掂。最勁係啲罰球,落葉球、香蕉球、衝力射球,每種罰球技巧我都識,似足巴西傳奇罰球王祖連奴(Juninho),罰球入球率超過一半,同射十二碼冇乜分別。



今日放咗學之後,係社足嘅最後一場比賽,我哋綠社面對藍社。由於啱啱紅社贏咗黃社已經確定攞冠軍,而我哋前兩場分別和咗2:2同0:0,所以一陣贏咗就可以攞亞軍,和左或者輸埋就得季軍。

「放鬆自己,認真去踢呢場比賽,大家加油!」隊長阿傑鼓勵我哋,佢踢後衛。 





比賽開始,藍社因為只要唔輸就得,一直縮後嚟踢,泊大巴,我哋無論遠射、斬高波,都一直攻唔入。

去到第15分鐘,終於打開到個缺口。阿正舉手,示意叫我交波,然後即刻向右邊走位,我將粒波傳咗去左邊。原來阿正嘅走位係為咗引開其他後衛,跟住佢就走咗去左邊攞到粒波,龍門出嚟已經太遲,阿正一下chip過佢入波。1:0!

「做得好!我哋而家有領先優勢。」阿傑同佢擊掌。 之後藍社瘋狂進攻,但係我哋學番佢咁樣縮後嚟踢,上半場守到最後,維持1:0。

但係下半場出嚟冇幾耐,佢哋嘅一次角球,我哋解圍唔到,混亂中佢哋嘅後衛執雞成功,追成1:1。

仲有20分鐘,睇嚟要放手一搏,全體球員去進攻。





點知攻唔成,比對手打反擊,睇見對面前鋒單刀姿態,點知……

阿恆一下飛鏟,破壞咗人哋黃金入球機會,之後傳咗個波比我,我知要點做啦。

又係嗰招,阿正走位,我交反方向。點知對方龍門吸取左教訓,早咗一步出嚟封位,將阿正嘅射門成功封阻,點知個波彈咗去禁區外面……

機會嚟啦!

我一下球不著地,窩利抽射,粒波食得好應,飛咗去死角位,龍門未起翻身,全部人都望住粒波入,冇晒反應。2:1! 

「Yeah !」我振臂高呼,沖埋去同啲隊友慶祝。

不過比賽仲有5分鐘,我哋要努力守到最後。

藍社啲球員已經冇晒氣,攻極都唔得,最後1分鐘,阿恆搶斷咗對方嘅傳球,帶咗粒波一陣,畀對手踢低咗。罰球! 





呢球罰球當然我處理啦,雖然距離比較遠,不過我都有信心入嘅。

我擺好個波,少少助跑,去到粒波面前跳一跳,然後抽射。

粒波飛到好高,越過左人牆,但係好似會飛機喎……

點知去到龍門面前嘅時候,個波突然急劇下墜,啱啱好擦楣而入。呢個就係衝力射球,我啱啱射之前跳一跳起,加咗好重嘅上旋,令到粒波可以喺龍門面前急劇下墜。3:1!

我做返C朗嘅招牌慶祝,轉身跳起之後大叫:「Siuuuuuuu!」 



比賽結束,我哋綠社贏咗3:1,攞咗亞軍。





呢場比賽我梅開二度加一個助攻,仲唔係MVP ?

阿傑同我哋講:「大家做得好!今次真係一洗上年包尾嘅頹風喇。」

我家姐係社長,佢過嚟同我擊掌。「細佬勁喎,我哋贏都係多得你。」「喂你平時睇我踢波都知我幾勁架啦。」

正當我諗住去觀眾席攞返個書包走人嘅時候,聽到一個好熟悉嘅聲音。「喂,你今日踢得幾好喎!諗唔到原來你踢波都幾勁下。」

我抬頭一望,原來係阿。「碎料嚟嘅啫。但係點解你喺度睇我哋踢波嘅?」 

「哦…今日我冇交到一份功課,俾人罰咗去留堂班,去完見到你哋三個,橫掂比賽剩返10分鐘,咪就順便嚟睇吓囉。」   

「哈,學神而家都懶咗,竟然會冇做功課。」

「唔係啊...我之前已經做咗份英文作文,但係朝頭早要交嘅時候搵唔到...」





我先醒返起,原來我之前借咗佢份作文嚟參考,點知一直唔記得俾返佢!

「Errr... 其實...」我係書包度攞返佢份作文出嚟,「我之前唔記得俾返你...」

「有冇搞錯!」阿個樣好嬲。「你令到我除咗要去留堂班,鍾要重新寫多一次啊!啱啱鍾係到笑我!

「對唔住囉...唉,最多一陣請你飲返杯珍珠奶茶當算數。」

「你真係...唉算啦原諒你啦,咁而家一齊去買珍珠奶茶啦,記住係你請喎。」

出咗學校同阿去咗買珍珠奶茶,飲完準備返歸嘅時候,見到阿正同阿恆。

「Hello,阿軒、阿嫂。」佢哋不懷好意咁笑淫淫。「拍拖就光明正大D啦,做咩收收埋埋唔俾我哋知呢。」





「乜撚嘢啊......我哋只不過係同朋友咋...」屌,今次唔係得我一個面紅,阿塊面鍾比我紅。

「屌,咪呃我哋。你哋成日癡得咁埋,啱啱鍾見到你請人嘢飲,係人都知你哋有嘢啦。」

「唔知點講...總之唔係啦,唔信你問下阿。」

「...係啊...我同阿軒...真係冇嘢...」阿支支吾吾咁講。

「唔認就算,我哋要趕住走,唔阻你哋兩個。」佢哋走嘅時候鍾加多咗一句。「阿嫂,如果阿軒對你唔住,call 我哋,一定幫你揼鳩佢。」我舉中指回應佢哋。

係我哋返屋企嘅途中,阿問我:「其實…我哋而家係咩關係?」 

「梗係朋友關係啦。」我不加思索咁回答佢。

「Errr...咁你兩個朋友啱啱…」

「使乜理佢哋姐,佢哋係咁㗎,你同佢哋講笑囉。」 

若有所思咁諗咗一陣。「唔知啊…咁好多男仔都係好鹹濕㗎嘛,黐埋落啲靚女度係想溝佢哋。」

「喂你諗太多啦,我邊似嗰種人啊。同埋我家姐已經夠靚啦,你都唔夠佢靚,邊會諗住溝你姐。」 

「你玩嘢啊,我邊度唔靚呀?你擘大眼望真啲!」 

「冇話你唔靚,你都OK啦,一定大把男仔追。」 

「但係我對其他男仔冇興趣喎……」 

「吓,唔通你想比我溝?」

「咪玩啦,你都唔靚仔,都冇…冇興趣!」阿轉移話題。「你啱啱話你有個家姐,佢好靚咩?」 

「邊止靚啊,佢仲係我哋學校公認嘅女神,大把男仔諗住追佢啊。」 

「嘩…得閒介紹下你家姐俾我識啦。」 

「佢咪就係我哋嘅社長囉。」 

「唔係嘛,佢真係靚得好交關喎!」 

「哈,你睇吓我幾幸福,有個女神家姐,佢仲要對我好好添。」

「唉...我冇家姐不過有個細佬…但係佢真係好百厭囉。」 

「咁似我細個嘅時候嘅,你細佬都好幸福啊,有個都幾靚嘅家姐,仲要讀書好勁添。」 

「口花花,有時都唔知你係讚我定係暗寸我。」

***

過咗幾日,我哋三個死黨都收到一張通告。原來係足球隊嘅阿Sir有嚟睇社足,見到我哋唱得幾好,就邀請我哋加入校隊,逢星期二四訓練,今日係星期四,晏晝就係第一日訓練。

第一日去到訓練,發現除咗我哋三個之外,有一半都係高中嘅學生,全部都好高大威猛。

我哋交咗入隊費之後,我哋嘅教練陳Sir俾我哋揀波衫,不過之前班高中學生已經揀過晒,剩返幾件俾我哋揀:6號、7號、12號、15號同17號。

我諗都唔使諗,即刻攞起左件7號,因為係我偶像連加特喺英格蘭着嘅號碼。連加特(Lingard)係美斯(Messi)同C朗(Cristiano Ronaldo)之後新一代嘅球王,佢同我一樣都係踢攻中,喺曼聯青訓出身,上年去咗韋斯咸,幫呢支本身係英超中下游掙扎嘅球隊打入前四,今季仲要喺榜首領先緊。冇幾耐之前嘅歐國盃,佢carry全隊陣容不整嘅英格蘭贏咗冠軍,整賽事攻入左十球同埋錄得七個助攻,喺決賽對葡萄牙大演帽子戲法,破歐國盃紀錄,攞埋金球獎,被球迷稱為「連皇」、「連大帝」、「連美斯」、「連加癲奴王(Lord Lingardinho)」。連加特嘅踢法一直係我模仿嘅對象,佢速度快,球感好,扭波技術一流,傳球準成度高,創造力強,射門觸覺極高,仲要係雖然佢係一個進攻球員,但係佢都會周不時返嚟幫手參與防守,係一個完美、全能嘅攻中。當然我嘅技術仲未夠班啦,不過平時喺電視睇開佢踢波,學習佢嘅球技,的確令我嘅球技進步咗唔少。 



阿恆同阿正就分別揀咗6號同17號。

陳Sir跟住安排我哋做嗰種嘅訓練,例如馬騮搶球、單對單防守過人。呢啲訓練完全冇難度,平時喺街場踢得多,自然識得面對唔同嘅防守球員。同埋我發現嗰班高中學生其實都唔係好勁,純粹大大份,技術根本唔高,唔怪得陳Sir會邀請我哋呢班中一加入啦。

之後陳Sir將我哋分成兩隊,嚟一場7v7嘅45分鐘練習賽。我同埋佢哋兩個都分咗去同一隊。

一開波,我哋喺後場不斷傳波,對手一迫過嚟攻,我即刻塞咗一球直線俾阿正,佢單刀扭理過龍門再射入空門。1:0!

跟住又係阿正,佢搏到罰球,當然又由我嚟處理。 一球美妙嘅香蕉球,彎入死角,龍門冇反應。2:0!

之後我扭入禁區,一個好大份嘅後衛飛鏟埋嚟,我用一下假動作避開咗,就好似美斯ankle-break保定嗰下,通埋龍門大細射入。3:0!

再一次入咗禁區,今次我唔扭,傳咗俾另一個隊友射入空門。4:0!

粒波傳咗去禁區外,阿恆都嚟一球遠射,死角入。5:0!

真係輕鬆,啲對手都廢廢地,咁都被我哋炒五球。

訓練完之前,陳Sir同我地講:「星期六下晝六點會有友誼賽,約咗隔離學校踢,係十一人比賽,去嘅人走嘅時候填名。」

正啊,一入校隊就有得比賽,鍾要個球場喺屋企隔離。

我地三個即刻去報名,不過見到上面有三個人預先填底咗名。

打聽之下,原來係我哋校隊最勁嗰三個,分別係我哋綠社嘅隊長阿傑,紅社嘅龍門阿歷同射手Henry,佢哋今日有嘢做所以冇嚟到訓練。

換完衫之後同佢哋一齊走。我問:「你覺得我哋星期六有冇正選踢?」

「我同你一定有份啦,阿恆就唔知啦。」

「屌你,有十一個正選,點都輪到我啦。」

「喂,一於鬥一鬥,冇入波嘅請其他人食飯。」

「好啊。」

「你老味,我打防中,你地打進攻,又恰我。」

「少數服從多數,就咁,你咪試下打前鋒囉on9。」

「咁撚寸,到時咪就睇下我又一下遠射一球定勝負囉。」





  


    
已有 0 人追稿