［校園］［愛情］是咁的，我女神次次都考第一。: 八，我鍾意咗佢

***

(阿琪視覺)

尋日阿正無啦啦WhatsApp我，睇吓有咩事先。

哦，原來佢話阿軒有比賽，叫我過嚟睇。

其實我小學得我一個升上黎呢間中學，喺中學朋友並唔多，阿軒係我唯一幾個真正嘅好朋友之一，咁我梗係要去支持下佢啦。





我覺得阿軒呢個男仔幾好，讀書唔錯，個樣唔差，人有高，佢踢波好勁，同埋佢對我都幾友善添。

咁今日去咗睇佢比賽，佢半場上到嚟，佢有啲擔心自己入唔到波，我話佢實得嘅，之前見過佢踢波，佢真係有水準嘅。 

之後我見到阿軒落咗去變咗打前鋒，咁以佢嘅能力，我好有信心佢一定會入到波俾我睇嘅。

阿軒不斷嘗試創造機會，見到每一球都爭少少，我都知佢好快會入波㗎啦。

果然過咗一陣，阿軒即刻入返一球，仲要係跳起功夫腳咁射入波。





我好戥佢開心，喺觀眾席度大嗌歡呼：「阿軒，好勁啊，你啱啱入球個下真係好型！都話你一定得㗎啦！」

唔知佢有冇聽到，淨係見到佢望向我呢度，俾咗個V我。

點知過咗10分鐘多啲，對手有個後衛一下剷落佢度，搞到佢成個人瞓低咗。

我心諗：好茅啊！有冇搞錯！球證快啲趕佢出場啦！

點知球證淨係俾咗黃牌，阿軒勉強起身，仲要射罰球。





阿軒啊，傷咗就唔好夾硬嚟啦，唔好勉強自己呀。

但係佢都係堅持繼續比賽，但係佢一射果下，成個人又瞓低咗，喺草地上碌黎碌去。

我驚到暗住咗個嘴。

唔係嘛，睇嚟佢真係傷得好嚴重喎。阿軒，你冇嘢嘛？我好擔心你啊！

阿軒被幾個隊友用擔架抬左出嚟，我即刻衝左落去，問佢：「你有冇事呀？」

「哎呀…隻左腳好痛…」

陰公，我見到佢隻左腳腳踭腫到好似豬蹄咁，佢應該係扭傷得好嚴重。

「好心你啦...明知自己受傷就唔好再撐落去嘛...」





「真係好痛...可唔可以幫我攞冰袋敷一敷...」

教練嗰邊冇冰袋，我同阿軒講：「你等一等，我幫你搵。」跟住我即刻衝左出球場。

我跑左上返屋企，好彩我雪櫃有雪住啲冰，我攞咗一啲袋落膠袋，即刻衝番落球場。

「攞冰袋敷一下，應該冇咁痛，以後都唔好勉強自己啦。」我小心翼翼咁將冰袋敷喺佢隻腳踭度。

「真係...好多謝你...」阿軒有氣無力咁講。

「唔使客氣，呢D係好朋友應該做嘅。」

阿軒尷尬咁苦笑。





比賽完咗之後，阿正同阿恆走咗過嚟。「喂，有冇事啊？」

「屌，條仆街一嘢剷撚埋嚟，想冇事都嘥鳩氣。好彩啱啱阿琪幫我敷咗冰，而家冇咁痛。」阿軒個表情好似從容咗D。

佢哋兩個不懷好意咁望住我。阿正話：「啱啱我都入咗一球，4:0，唔使請食飯。咁你冇事就得，我哋走先，唔阻住你哋。」

「係咯，佢有咩事就麻煩晒你啦阿嫂。」阿恆加多一句。

「咪走住呀，你哋班男仔真係…返嚟啊…」我尷尬到塊面都紅晒，但係佢哋已經跑左出球場。

呢個時候教練走咗嚟。「阿軒，而家點樣？企唔企到起身？」

阿軒勉強企左起身。「應該OK啊。」

「咁你小心啲自己啦。妹妹呀，你睇實你男朋友啦，佢唔得嘅話你就幫下佢啦。」教練講完之後走咗。





「陳Sir，其實佢唔係我女朋友呀…」不過似乎陳Sir聽唔到。

我同阿軒講：「算啦，我哋知唔係就得啦。」

阿軒話：「唉，今日我真係柒到爆。」

「唔係呀，你今日入咗球靚波。」我安慰下佢。「你而家係咪真係冇事呀？」

「應該係呀。」佢一拐一拐咁行咗幾步，突然又仆親，我即刻跑過去扶住佢。

「仆街...我隻腳真係唔撚得，郁一郁就痛…」佢好痛苦咁暗住隻腳

「唔好夾硬嚟啦，真係有事嘅話不如我call你家姐落嚟啦。」





「我家姐今日同啲朋友出咗去，有排都唔會返…睇嚟都係我自己行返屋企算…」

「真係唔好勉強自己呀，我都係扶你返去啦。」

「咁樣啊，真係多謝你呀…我有你呢個朋友真係好好彩。」阿軒苦笑咁講。

「冇辦法啦，邊個叫我嘅好朋友受傷啫，反正我屋企人都出咗去。」

上到去阿軒屋企門口，我幫佢開埋門。「咁你自己照顧好自己喇，拜拜。」

我就快行到去𨋢口嘅時候，忽然聽到阿軒同我講...

***

我受傷之後，阿琪即刻跑過去幫我去冰袋敷腳，又扶我上屋企。

除左我屋企人之外，從來冇一個人，會為咗我咁做，咁關心我。

佢扶著我行嘅時候，我哋乜都冇講，我只係靜靜咁望著佢。

呢一刻先至發現，阿琪真係好靚女，真係唔知點形容，平時都唔覺，可能係今日我用一個唔用嘅角度去睇佢。

佢送到我去屋企門口，同我講拜拜。我突然好唔捨得佢。

忽然有一刻我希望阿正佢哋講嘅流言係事實。

望住佢嘅背影，我呢刻先知道我對佢唔再單只係友情。

我鍾意咗阿琪。

望見佢步向搭𨋢口，我決定鼓起勇氣同佢講：「阿琪，我...」