去到三月,係學界比賽嘅最後一場,前幾場因為之前嘅左腳受傷我冇出到場,今場終於有得復出。

同上次友誼賽唔同嘅係,阿今日唔得閒冇黎睇,不過我家姐嚟咗睇。

對手係杏壇中學,實力一般,只要我哋贏咗就可以攞聯賽第三。

由於之前受傷令到我速度變慢左,我今場打返個正中中場,負責喺中場派牌做組織。

比賽開始,一開波我哋不斷逼搶,但係對方嘅控球真係做得好好,我哋完全掂唔到粒波。





無啦啦去到第10分鐘俾人塞咗一球直線打反擊,睇嚟都輸緊啦…

點知條友扭過咗龍門之後,竟然對着空門炒飛機,呢一幕仲唔係重演費蘭度托里斯(Fernando Torres)對住曼聯嗰球經典門前失機?



雖然佢射唔入,但係我哋嘅後防線已經響起一大警號。

去到第23分鐘,終於失波,又係一球直線,今次對面嘅前鋒冇再扭龍門,直接勁射破網,真係救唔到。





去到第36分鐘,唔知點解俾人第三次塞直線,今次對手唔好彩,諗住射遠柱,但係中柱彈返出嚟…

點知返嚟回防嘅阿恆塊面省中粒波,彈咗入網,Oh fuck,烏龍球啊。

唔知係我今日失準定係點,我哋中場完全冇創造力,傳唔到粒波上去,結果上半場已經輸緊兩球。

半場休息嘅時候,阿恆好頹咁講:「對唔住,啱啱輸咗球烏龍波。」

「算啦冇辦法,下半場盡量追番呀。」





屌,其實已經玩撚完,三粒波點追呀。

下半場出咗嚟,唔知點解成對波好似踢得精神咗,啲攻勢越嚟越入肉。

去到第56分鐘,阿恆搶到粒波,自己殺上前場,可能係要彌補上半場入嗰球烏龍波,佢變得好有鬥志,扭過咗三四個後衛之後…

一射,龍門拍到都入,終於追返一球。1:2。

佢即刻去龍門嗰度執返粒波,今日嘅阿恆,唔知點解精神面貌同平時完全唔一樣。

但係去到90分鐘,我哋都搵唔到第二粒入波,睇怕都冇啦,打定輸數,一陣返屋企瞓覺。

至少我係咁諗。

球場上面嘅人,大部份已經冇晒鬥志,行屍走肉,唔知自己做緊咩。





對手就好輕易唱到我哋粒波,打反擊,又輸多一球啦…

但喺球場度十個木頭人之外仲有一個未放棄嘅人,阿恆鏟到粒波,即刻自己推咗上前場。

佢交咗粒波俾我,我先知道,比賽仲未結束。

我冇諗咁多,即刻塞返一球直線比Henry,作為王牌射手,入咗啦,2:2。

但係我哋贏唔到,打和最多得第四,一個獎牌都冇。

唔通我哋真係要咁眼甘甘咁冇咗3分?

比賽進入補時,仲有半分鐘,今次冇啦,對手全部人返嚟幫手防手,唯一嘅辦法就係斬個波入去,俾人頂頭槌,但係我哋隊都冇高佬啦…





唔理啦,我斬個波入去,對面嘅後衛頂贏晒,跌返係禁區上面,睇怕都完場,球證準備吹雞…

「讓開!」忽然聽到大叫,原來阿恆埋伏喺禁區外面,準備一球窩利抽射…

冇啦,咁遠點撚射得入呀,你以為你係利物浦傳奇隊長謝拉特(Gerrard)啊。

點知粒波俾佢抽得好大力,完全係我平時射唔出嗰種力度,一枝箭咁飛去死角,龍門呆咗。

而家我先有反應,我哋真係贏咗,真係估唔到!

3:2!WHAT THE FUCK!!!

呢一幕有啲似2005年歐聯分組賽,利物浦對奧林比亞高斯,完場前一刻謝拉特好似啱啱阿恆咁,窩利遠射絕殺對手,殺入十六強,為佢哋嗰屆奪冠鋪好路。冇人估到佢射得入,更加冇人估到佢哋由輸緊兩球反勝3:2。







我有啲慚愧,比賽未完就諗住放棄,如果人人都好似我咁樣,呢啲逆轉奇勝就不復存在。

唔知邊個講過,球場上最勁嘅唔係扭波好勁,技術好出眾嗰啲,而係最有鬥志嘅,永遠唔放棄嘅人。

當你認為自己輸硬,你就一定輸;當你認為自己會贏,未必一定贏,但係如果你努力過,一定有咁嘅機會。

「OH YEAH!!!!!」阿恆狂奔全場慶祝,向觀眾席舉起咗個心形手勢,呢個係巴爾(Bale)嘅慶祝方法。

技術可以令人成為一個出色嘅球員,但係鬥志可以令人變成球王,今日嘅阿恆正是如此,值得佢咁威去慶祝。

完場之後我哋攞咗銅牌,跟住教練講幾句話,之後我哋各自返屋企,我等埋家姐一齊走。

「屌,我今日踢得好柒。」我有啲泄氣咁講。





家姐嘅神情同平時有啲唔同。「你睇吓你個朋友,人哋真係搏曬命去踢,啱啱入個下真係好型…」

有啲奇怪,呢個表情好似係我自己身上見過…

唔通…

算啦都係唔好諗咁多。



  













 
已有 0 人追稿