［校園］［愛情］是咁的，我女神次次都考第一。: 十四，女神生日

去到四月，有一日，阿琪同我講：「你…嚟緊有冇嘢做？」

「邊日呀？做乜嘢啊？」

「回禮啊，上次我送咗生日禮物俾你。」

「係喎…」

明啦，原來係佢生日…





仆街了，原來我一直連佢生日都唔知幾時！

佢好似有同我講過，大概開學嗰時，但係我一直冇擺上心…

阿軒啊阿軒，點解你可以連你女神生日係幾時都可以唔知啊，你真係失敗啊！

但係我又唔想直接問佢，費事佢佢對我留低一個差嘅印象。

唯有呢個辦法…





返到屋企攞起手機，開IG，用返佢上次知我生日嘅方法。

搵返個頭像同我一樣嘅account，但係佢嘅個人簡介都冇寫生日…

係喎，佢account名咪就有寫囉，最後幾隻字係_415。

應該係4月15號吧，仲要係呢個星期六。

幾經辛苦知道佢生日，下一步就係要諗送咩生日禮物好。





呢個時候阿琪WhatsApp 嚟：

「上次問你得唔得閒，你都未覆。」

「4月15號？」

「係呀。」

「我約咗人啊。」我突然on99想玩下佢。

「邊個呀…」 

「咪就係你囉。」

「又玩嘢。」





「嘻嘻。」

「咁到時8:30你屋企樓下等。」

「OK。」

Good，女神主動約我出嚟，今次真係要好好揀下禮物先得，唔爭在洗埋我啲零用錢。

女人最知女人心，今次梗係要請教下家姐啦。

「咁你平時見到我買咩最多啊？」 

明白晒…





***

喺4月15號嘅早晨，當我啱啱食完早餐，喺廁所gel緊頭嘅時候，突然門鐘響咗。

一開門，竟然係阿琪。「嘻嘻，我早咗上咗嚟，費事你遲到。」

「生日快樂呀。」我急忙執好晒啲嘢就開門走。「點會遲到啫，我咁有心。」

「咁…生日禮物呢？」佢攤開雙手。

我吃吃笑咁講：「唔記得咗。」

阿琪停低喺度個樣好失望。「吓…」 

「講笑啫，邊會唔記得呀，驚喜嚟㗎，你一陣就知。」





「認真，唔好呃我。」

「呃你我切。」其實我一早準備好，不過遲啲先講。

「好啦，信你啦。」

我哋落樓下一齊食咗個早餐之後，搭車去咗尖沙咀。

去到一間時裝店嘅時候，阿琪拉住我：「陪我入去睇一睇！」

正中下懷。

入到去，佢梗係去睇靚衫啦，我指着其中一件粉紅色嘅連衣裙。「咦，呢件啱你啊。」





「係唔係啊，俾我睇下先…真係喎，幾襯我。」

「你想買啊？」

「係呀…但係… $800啊…」

「咁樣啊…」我喺我背囊攞咗一件同款嘅連衣裙出嚟，係我前幾日嚟呢度特登幫佢揀嘅，再嚟返呢度係費事size唔啱佢有得換。「咁咪就唔使$800囉，生日快樂，送俾你嘅。」

佢見到O咗嘴。「真係…多謝你呀…」

「嘻嘻，你睇吓我呢個朋友幾好人，你入去更衣室試下，唔啱我可以換。」其實我都係想睇佢着呢條裙好靚嘅樣。

阿琪換完出嚟，條裙都幾啱size，佢望落去唔單止好靚女，仲好有一種少女feel。

「都話我靚啦，你睇吓你個衰樣，眼甘甘咁望住人哋。」佢有啲怕羞咁講。

計劃成功，唔單止可以令到女神開心，仲可以望見佢着得好靚嘅樣， $800姐，抵啦。

之後我哋去咗海港城行下，仲無啦啦去咗玩具反斗城睇玩具。

諗返起真係好有童真。

喺街邊行行下，忽然見到有部街邊鋼琴，呢個時候當然到我show off一下。

我彈咗一首生日歌，唔係嗰啲細路仔都識彈嘅，而係改編過嘅Extreme version，阿琪喺我側邊拍手叫好。

「大佬彈琴咁勁，實好多女仔鍾意啦。」我彈完之後喺海邊一路咁慢慢行。

「咁你有冇鍾意呀？」我試探咁問。

「喂你又講埋啲咁嘅嘢。」佢有啲面紅咁講。

「嘻嘻。」

去到中午，我哋一齊去咗食韓燒，當然係我請啦。

唔知點解呢間店有個好奇怪嘅優惠，就係情侶八折。

因為佢生日，呢一餐當然係我請，梗係唔想令我荷包受罪啦。

咁我尷尬咁問：「Errr...佢寫住情侶有優惠喎…」

「吓，你想做我男朋友呀？」

「唔係唔係…只不過…」

「好啦，睇在你都係靚仔嘅份上，俾你做我一日男朋友，不過唔准抽我水啊。」

屌正啊，睇嚟我有機會啦。

入去食嘅時候，阿琪同我講話：「男朋友係唔係要餵女朋友食嘢㗎？」

「吓…」估唔到佢真係認真。

「唔想就算，一陣你俾錢就俾返原價。」

「咁好囉，擘大口。」我哋就咁開始互相餵對方食嘢，阿琪食嘢嘅樣望落去都幾得意。

食完飯行多一陣，去到旺角有個球場，咁啱有人喺度踢街場，唔夠人。

我同阿琪講：「你等我一下，入三球就走。」

「好啦，咁我做返你忠實fans啦。」

我走入去，有個小學雞款嘅細蚊仔見到我，就大嗌：「靚仔，爭一個人，你入埋黎踢啦。」

我當然走咗入去踢，難得阿琪喺度，梗係要俾佢睇吓我有幾勁啦。

一開波，我同隊友做咗下撞牆，一個人過咗三四個，輕鬆射入，第一球。

街場真係好容易踢，啲人都唔逼搶，扭波唔勁嘅我，都好輕易過咗好幾個後衛。

過多2分鐘，我自己推到去禁區外，冇人迫，就一個遠射，第二球。

係時候試下我嘅新招。

再過多3分鐘，我單刀Rainbow flick過龍門，再空門倒掛入，第三球。

「唔好意思，唔踢啦，我女朋友等住我走。」

我同阿琪講：「哈哈，你睇吓你男朋友幾勁。」

「得啦知你勁，可能喺我面前先係咁勁掛。」

佢又講得冇錯嘅，上次佢冇黎睇我踢得成Pat屎咁。

跟住我哋就返去啦，一路上我都拖住佢隻手。

雖然話做佢一日男朋友真係好正，但係我邊會滿足呀。

係時機要表白啦。

去到佢屋企樓下，準備送別佢嘅時候，我鼓起勇氣講：「阿琪，其實我一直都…」

但係呢個時候我停咗落嚟，我見到佢眼泛淚光，好似想喊咁。

「我知你想講咩，但係…我做唔到。

對唔住，我可能辜負左你，但係…

我以前有一段唔可以講出嚟嘅經歷，你都唔好問我。

阿軒，遇到你，真係好幸運。

但係嗰件事傷害得我太深，我而家仲未接受到…同其他人一齊。」

跟住佢就低頭開始喊，我攬住佢。

「講對唔住嗰個應該係我先真，我唔應該咁急講，勾起你傷心嘅回憶。」

阿琪抬起頭。「應承我，就算我哋最終唔可以一齊，都要做一生一世嘅好朋友。」佢伸咗隻手指尾出嚟。

「我應承你。」我哋勾手指尾，呢個係我哋許下嘅承諾。

返屋企嘅路上，我嘅腦海一直好迷惘。

我知道我唔係冇機會，阿琪一定對我有好感。

但係我有啲自責，令到佢生日嚟喊。

到底係乜嘢可以令佢受傷咁深呢？

唔通又係感情上嘅問題？

呢一刻我諗清楚，鍾意人哋未必要同人哋一齊，可能默默守護都係一種幸福。

為咗唔好令我鍾意嘅人再受到傷害，我決心要以一個朋友嘅身份，同佢同甘共苦，俾到快樂佢。