Ada話:「除咗阿琪之外,今日係我第一日識你哋,咁呢餐就我請啦。」

「正呀,多謝Ada姐。」

「咁就去…」

突然,側邊有一個人飛快咁跑過,之後跌倒喺地上面。

阿琪好心諗住扶起佢話:「你有冇事呀?」但係佢依然瞓喺地上面。





嗰個人係一個大媽。「好痛啊…你撞低我,陪醫藥費!」

仆你個街,根本係佢自己跑過嚟,阿琪掂都冇掂到佢,就自己瞓低咗,好有可能係碰瓷。

阿琪誠惶誠恐咁講:「我…我冇撞到你喎!」

個大媽鬼死咁惡咁講:「我啱啱跑過嚟,你阻住條路, 撞低我,隻腳好痛啊,你賠返$300醫藥費。」

我沉唔住氣,大聲咁講:「喂,我見到你自己跌低喎,唔好諗住屈人啦。」





個大媽更大聲咁講:「屌你老母,而家啲學生咁差劣嘅,喂大家快啲過嚟睇,有班學生特登撞低我唔認啊。」

開始有幾十個人過嚟圍觀,議論紛紛。

「嘩而家啲學生咁差嘅…」

「塞住晒條路,撞低人又唔應。」

「仲話Band 1學校喎…」 





「真係影衰晒間學校。」

我腦袋一時空白,面對群眾壓力下,完全諗唔到可以點回應。

咁樣落去,只會造成不堪設想嘅後果,同埋影響我哋學校嘅聲譽。

呢個時候, Ada指着地下嘅大媽大鬧:「有冇搞錯,喺度碰瓷,阻住晒我哋!」

大媽見到群眾形勢有利於佢,惡狠狠咁回應:「你哋自己撞低我,仲死口唔認,快啲賠醫藥費!」

「好呀,咁我而家Call 999報警,帶你去醫院驗傷,到時先賠。」

大媽冇料到佢有如此一著。「唔使驗傷,你而家即刻賠錢就得。」

「都話你係碰瓷啦,唔使驗傷姐話你冇傷,阻住晒我哋啲時間!」Ada作勢踢落大媽隻腳度,大媽嚇一嚇,即刻彈咗起身。





「嘩,隻腳傷左仲郁得?竟然可以企得起身咁快?佩服佩服。」

「原來真係碰瓷…」班圍觀嘅人恍然大悟。

大媽知道事敗,氣急敗壞咁講:「你好嘢,屌你老母!」跟住佢即刻夾着尾巴逃離現場。

Ada對圍觀者面露兇光,佢哋知道怪錯咗好人,個個都唔好意思咁走開咗。

阿琪話:「多謝你哋兩個…」

「唔使多謝我…應該要多謝Ada至真。」我尷尬咁講。啱啱因為群眾壓力冇聲出,我都幾失敗下。

「喂,阿軒,你啱啱唔係好掂喎,有道理都俾人鬧得返轉頭。」Ada講。





我有啲唔好意思咁講:「咁個大媽真係好惡嘛…」 

「你咁樣唔得掂喎,你第時點樣保護你條女呀?」阿恆附和。

Ada八卦咁問:「咦,邊個係佢條女?」

Patrick都湊下熱鬧。「軒哥咁快有女?小弟欽敬欽敬。」

「吓,咁都睇唔出,你唔覺佢哋兩個有嘢咩?」阿恆指住我同阿琪。

換咗係以前嘅我,一定會好尷尬。

不過俾人講得多閑話,已經習慣咗,我只係搖搖頭咁講:「有你老母,完全冇呢家野。」

Ada不懷好意咁搭住阿琪嘅膊頭。「我嘅好姊妹,你話有冇?」





「阿軒話冇…即係話冇啦。」阿琪有啲驚青咁講。

「哈,佢哋兩個係咁㗎啦,點都唔會認。」阿恆話。

「都冇嘢,認條撚啊。」

Ada失望咁講:「超,仲諗住食花生添。」

「花你老母。」

***

喺2A生存左一個禮拜,我發現Ada完全係同一個男人冇分別。





佢周不時會講吓啲男人先講嘅鹹濕笑話,性格又好鬼倔強,完全唔似一個女人。

啲狗公撩佢傾偈,佢直接對佢哋送上一隻中指。

有一日小息嘅時候, Ada拍下我膊頭。「喂,陪我落去買嘢食啊。」

「吓,但係我應承咗教阿琪科學功課喎…」

「唔得,快啲嚟,阿琪,借你嘅阿軒一用。」佢扯左我落樓下。

我知道佢一定係有啲嘢要同我講。

落到樓下, Ada直接開口問:「其實你係唔係鍾意阿琪?」

「點解咁問?」

「大佬,平時擰轉頭同你傾偈,你隻眼唔係望住我,一直眼甘甘咁望住佢,上次阿恆咁樣講,都知有嘢啦。放心啦,叫得你落嚟,梗係唔會同其他人講啦。」

我應該相信得Ada嘅。「好,我認,不過你唔好同其他人講。」 

「梗係,放心我唔會同阿琪講。」

「你講唔講都冇所謂,因為佢已經知。」

「吓,咁你哋係拍緊拖定係點?」Ada好驚訝咁講。

「又唔係,我哋兩個有啲似…友達以上戀人未滿…嗰種關係囉。」

「曖昧緊?」

「差唔多掛…」我諗翻起上次佢生日講嘅嘢。「係呢,你知唔知佢話以前曾經被傷害得好深,到底係發生咩事?」

Ada神色凝重咁講:「你真係想知?」

「係,俾我知邊條友實揼鳩佢。」

Ada歎咗一口氣。「我唔講得,我應承咗阿琪唔可以同任何人講。我淨係可以咁樣講,嗰件事喺佢小學嘅時候發生,的確令佢受傷嚴重,淨係得我同另外一個當事人先知。嗰件事令佢有一次考試竟然考得第三,平時佢都係拋離其他人好多分。」

嘩,竟然有事令阿琪呢種學神退步咁多,佢真係嗰時受到應該唔細嘅打擊。

Ada停一停繼續講:「咁如果你真係鍾意佢,咁你要好好對佢,我相信你,阿軒,會係佢未來嘅如意郎君。我相信你唔會好似以前我見過嘅人渣咁樣對佢。」

我慘然一笑。

我希望我唔會對唔住阿琪。我都希望Ada對我嘅相信係正確嘅。

但係,我之前有一段黑歷史,冇人知嘅黑歷史,諗返起都覺得羞恥。



 
已有 0 人追稿