去到十一月,考完試,班中一直相安無事。

你有你嘻嘻哈哈,我有我埋頭苦幹。

點知暴風雨會毫無前兆咁嚟到。

2A一連串嘅事件,喺呢度開始。

***





呢一日係一個星期日夜晚。

無所事事,我碌下手機,突然收到一個WhatsApp訊息。

原來係我哋班group,有人打咗一段文字,我撳咗入去睇。

呢段文字係一個我冇加聯絡人嘅人打嘅,電話號碼係+852 9123 1234。

「喂,原來我哋今年嘅插班生張月嵐係一個渣女。





大家千祈唔好中計,佢淨係會收兵,我有幾個朋友已經中咗佢圈套。

條仆街來者不拒,對全部人都保持曖昧嘅態度。

我有個朋友同佢表白,冇正面拒絕咗,以為自己有機會。

之後佢聽返另外一位朋友,原來發生相同嘅事,呢條仆街淨係識得玩弄感情。

嗱,唔信嘅話,有圖有證據,佢哋兩個send咗啲對話紀錄俾我睇。」





「"你而家係我最好嘅男仔friend啦。"

                   "真係?你同其他人唔係都好熟咩。"

"其他普通朋友咋,同你最熟。"

                            "咁你對我係唔係有好感啊?"

"嘻嘻,唔怕話你知,有啲嘅。"

                "太好了,咁你可唔可以做我女朋友?"

"嘩你咁急嘅…考慮下先啦。"

                                                       "好啦。"」





「"我真係好唔鍾意其他男仔囉,成日黐埋嚟好煩。"

                     "你唔覺得我煩咩,成日搵你講嘢。"

"唔覺啊,你唔同,你nice好多。"

                                                     "係咩。😂"

                        "其實唔怕話你知,我幾鍾意你。"

"哈哈,我都係。"

"你而家咁樣係…同我表白?"





                                                  "你當係啦。"

"我考慮下先啦。"

"但係你要對我好啲喎。"

                                                    "梗係啦。"」

我啱啱睇完,已經一大堆訊息喺下面出現。

「嘩原來Ada係咁嘅人。」

「真係睇錯佢。」

「人渣,收兵喺度玩我哋。😡」





「正所謂波大淫賤。」

「大家一於杯葛佢,咪再理佢。」

「係囉,要俾佢得到應得嘅教訓。」



我心中悶納,Ada居然係咁嘅人。

平時佢性格好男人喎,竟然會走去收兵。

我對呢一種玩弄感情嘅行為最為痛恨。





諗深一層,可能真係唔關佢事。

唔通係人哋屈佢?

我無法相信平時同我哋玩得好埋嘅Ada會係咁嘅人。

費事有咩誤會,都係聽日返學問清楚佢好過。

***

第二朝我好早返到學校,點知一打開班房門口,就見到Ada趴喺佢張枱度。

佢…係唔係喊緊?

我上前拍一拍佢膊頭。

Ada抬起頭,意識到係我,緊握住我隻手。

「阿軒,你要信我,我絕對冇收過兵。」

我支支吾吾咁講:「真…真係冇?」

「信我,真係冇,如果我要收兵嘅話,神早搵咗你啦,邊會淨係搵班狗公。」

諗返真係啱喎,我喺呢一班算係顏值比較高,如果要收兵嘅話佢第一個應該會搵我。

呢個時候阿琪返咗嚟。

佢驚訝咁問:「發生咩事?」

「你尋日有冇睇WhatsApp ?」

「太多訊息,冇睇到喎。」

於是我將WhatsApp group嘅事同佢講晒。

阿琪拍一拍Ada膊頭。「好姊妹,我信你嘅,識咗你七年,我知你唔會係咁嘅人。」

Ada破涕為笑。「多謝你哋…我啱啱真係好驚冇人信我,尋日啲人話要杯葛我,我驚喺學校再冇朋友。」

「傻嘅,其他人唔信你,我哋點都會信你㗎。」

「但係嗰個WhatsApp對話又係點一回事?」

Ada話:「嗰個一睇就知係假㗎啦,佢show埋最後上線時間,我不嬲都隱藏最後上線時間嘅。」

好似又係喎,呢一刻我百分之百相信Ada。

呢個時候Patrick返咗嚟,即刻上前問佢:「喂, IT大佬,有嘢請教你。」

「哦,你係唔係話Ada WhatsApp對話紀錄嘅事?我尋日一睇就知係假,其實整一個假嘅對話紀錄好簡單姐,用一個整WhatsApp對話記錄嘅Apps,打晒訊息,可以打埋最後上線時間,咁就會整到一個假嘅對話記錄。唔使你講都知,Ada一睇就知係俾人屈。」

Ada問:「咁有冇得查返係邊個整嘅假對話紀錄?」

「理論上係得嘅,但係我尋日睇返send出嚟嗰個人嘅電話號碼,完全搵唔到任何資料,要查佢係邊個,需要搵返電話嘅地址之類嗰啲,好難解釋㗎 …」Patrick面露苦色。「但係…我唔可以百分百保證一定查得返,就算得,都要好長時間…」

「砰!」班房門口俾人大力撞開。

有五六個人行咗入嚟,都係我哋班嘅人。

平時同佢哋冇乜交集,全部都係毒撚狗公樣,完全同我唔啱Key。

我見勢色不對,知道會有災難來臨。

帶頭嗰個好高嘅毒撚一下拍落Ada張枱度。

「屌你老母,做娘娘喺度收兵?而家全部人都知,睇你點樣喺呢間學校再生存落去!」

後面有個人攞起水樽,潑啲水落Ada張枱度。

我企起身。「喂,你哋好似過分咗啲喎。」

「哈,你呢隻兵仔,仲喺度維護自己娘娘,睇完WhatsApp都唔信。」

我對呢班已走火入魔嘅狗公無話可說。

「唔同你哋鳩噏,而家即刻同我躝!」

班友頭也不回咁返番自己座位。

Ada攬住阿琪喺度喊。「我好驚啊…」

到底Ada得罪咗邊個,搞到佢俾人屈?

等Ada情緒平復之後,我問佢:「你喺呢間學校有冇咩仇人?」

「仇人?邊會有,平時除咗同你地傾吓計之外,好少搵啲唔係好熟嘅人。」

奇怪。

嗰一刻我真係諗唔通到底係邊個搞事幹。

我同Patrick話:「你返去盡力幫Ada查下係邊個搞事,絕對要還佢一個公道。」

「好,我盡力。」Patrick神色凝重咁講。

冇諗過竟然會有啲人咁小學雞,喺度玩自己班嘅人。

真係前所未見。

但係,邊個都估唔到,呢個只係一齊事端嘅開始…

***

(呢個2A嘅風波大概會用六個章節去寫,可能會有啲長,望請讀者見諒。)



 
已有 0 人追稿