Ada被陷害嗰件事,一直不了了之。 

我哋班有一半on9仔同我哋幾個朋友反目成仇,大家都見到都面阻阻咁。

Patrick嗰邊都未查到個電話號碼。

話時話好耐冇提過阿正。

阿正自從佢同佢女朋友去咗唔同班之後,要成日搵佢,少咗陪我哋班friend。





最多係放假一齊約出嚟踢下波,平時中午好少同我哋食飯。

近排佢變得怪怪地,上堂一粒聲都唔出。

意想不到係今朝早發生咗咁嘅事。

作為一個好學生,我通常係最早嗰幾個返到學校。

班房空無一人。





過咗幾分鐘之後,我見到阿正入咗班房。

佢自己一個人行入嚟,平時都係阿善陪佢一齊經過課室。

仲要佢通常唔會咁早返。

奇怪。

阿正嬲爆爆咁將書包掉落地,坐低咗。





到底發生咩事?

我戰戰兢兢咁行埋過去。「你…你冇嘢嘛。」

「一陣打人。」

我未免有啲惶恐,如果佢真係咁做,後果可能會好嚴重。

「打…打邊個?」

佢冇回答我。

呢個時候阿恆同阿琪一齊行入返班房,有講有笑咁。

我心中不禁泛起一陣醋意。





說那時快,阿正跑到佢哋兩個面前,一拳揼落阿恆塊面度,阿琪即刻驚到縮開咗。

What the fuck。

發生咩事?

我呆喺原地,腦袋一片空白。

阿正唔收手,接着落嚟又係一拳打落去阿恆個肚度。

阿琪失聲尖叫。

我呢一刻先意識到發生緊咩事,跑前撳住進入瘋狂狀態嘅阿正,分隔開兩人。





「停手!有咩事,而家講清楚!唔好打交!」

阿恆㩒住個肚,慢慢退後到門口。「你痴撚線㗎,揼鳩我做乜?」

「你條仆街,做兄弟嘅,勾二嫂都得,你而家仲要勾埋軒嫂,仲問我揼鳩你做乜?」阿正咆哮:「放開我,你都係受害者,我而家要去打撚柒呢條人渣!」

阿琪急忙澄清:「啱啱…阿恆同我討論功課咋…同埋我同阿軒都未一齊。」

我暗中鬆咗一口氣。

「我幾時勾你二嫂啊,你唔好屈得就屈啦。」阿恆反駁。

「仆你個街,事到如今你都唔肯認?你做咗咩你自己最清楚!」

呢個時候有幾個同我哋敵對嘅毒撚返咗嚟,我同佢哋講:「而家有乜嘢都唔好講住,有咩誤會放學先解決佢!」





佢哋兩個各自返埋位,互不理睬。

我好擔心佢哋兩個又會闖出咩禍。

好彩今日上堂都冇發生咩事。

直至去到第八堂,阿正傳咗一張紙俾我。

「放咗學4:00 ,叫埋條仆街喺學校附近嘅小公園等。」

我同阿琪講:「我一陣都係唔陪你一齊走啊,唔好跟埋黎呀,一陣可能好危險。」

阿琪一面不高興咁講:「好啦…」





放咗學,按照約定,我同阿恆、阿正去到小公園赴約,阿善都嚟到。

「廢話少說,點解你要勾引我女朋友?」阿正指住阿恆個鼻大鬧。

「邊度有呀,唔信你問下你女朋友囉!」阿恆不忿反駁。

「真係冇呀…佢已經成個禮拜冇同我講過嘢…你聽邊個講呀?」阿善有啲驚青咁講。

「嗱,今日朝頭早返學之前,有人send咗你哋兩個一齊喺街上面嘅一幅相,我當可能係我諗多咗,算鳩數。但係有埋你哋嘅對話紀錄,你哋點樣解釋?呢一刻我唔信你地兩個冇嘢都唔得啦。」阿正俾咗部手機佢哋睇。

「"唉其實我同你開心過同阿正一齊。"

"認真?佢係你條仔喎。"

       "唔知點解而家對佢冇乜feel。"

   "唔係好似當初熱戀期嘅時候咁。"

"咁樣啊。"

"不如你飛咗佢。"

"我哋一齊。"

                              "咁樣得咩?"

"有咩唔得姐。"

"其實我鍾意咗你好耐。"

"不過你哋兩個一齊我先冇講。"

"你就飛咗佢啦。"」

佢哋兩個睇得目瞪口呆。

呢一刻我以為阿正又會衝過去打人,準備好擋住佢。

點知…

「如果你哋真心鍾意對方…」阿正竟然開始啜泣。「我願意退出…成全你哋…可能其實我先係第三者。」

阿善氣沖沖咁講:「傻仔!我愛嗰個係你,絕對唔會係第二個。同埋呢個對話紀錄係假㗎 !嗰張相都係兩個禮拜前去街咁啱撞到阿恆,一齊行咗一陣,唔知點解俾人影到咋!」

我伸個頭去望一望個對話紀錄,即刻知出咗咩事。

個對話紀錄, 100%係假。

唔使望內容都知。

我歎左一口氣。「阿正,你今次真係怪錯人,柒撚咗。」

「咩話?」佢好驚訝咁講。

「嗱,你自己望一下係邊個send俾你。」

「係一個電話號碼叫+852 9123 1234嘅用者。所以呢?」阿正一面茫然。

「on9?上次Ada嗰單嘢, send出嚟嗰個咪就係呢個電話號碼囉。一睇就知有人作假料分化我哋啦,你而家仲唔明?」

「係喎…」阿正坐低垂下頭,好似諗緊一啲嘢。

過咗一陣,佢企起身講:「對唔住大家,今次真係我賤格,我小人。我唔夠冷靜,一睇到呢樣嘢就當係真,冇認真考究過真假。對唔住阿軒,要你幫我處理呢件事,麻煩到你。對唔住阿善,我一直以為你唔再鍾意我,傷害到我哋嘅感情。最後我對唔住阿恆,我怪錯咗你,仲要不分青紅皂白咁打咗你幾嘢。」佢向我哋逐個鞠躬道歉。「阿恆,今朝早我打咗你幾下,係我衰,而家我俾你還手打返我幾下。」

阿恆冇咁做,而係拍拍佢膊頭。「好兄弟,又唔怪得你嘅,你都係緊張你女朋友嘛,如果係有人勾引我女朋友,我夠會打到佢變豬頭丙。你打咗幾嘢,係要賠罪嘅話,一陣請我食飯就算數啦。」

我發現阿恆有時都好了解其他人嘅處境,好識得體諒其他人,自己蝕底少少都唔緊要,佢咁樣其實應該冧爆好多女,不過唔知點解佢而家仲未有對象姐。

阿善哭喪臉咁跑埋阿正度。

「傻仔,你知唔知我啱啱幾驚你話同我分手?」

「真係對唔住…太衝動啊我。我都好驚你唔再鍾意我。」

「我鍾意嗰個剩係得你咋…」

「傻妹,你知我幾緊張你㗎…唔好喊啦。」

「有沙入眼咋…你咪就一樣喊緊!」

呢個時候我隱約聽到有人嗌我個名,擰轉頭。

係阿琪。

我好驚訝咁問:「我唔係叫你自己一個返去先咩?」

「擔心你呀…費事你可能打交,整傷自己…你冇事就好啦。」

有一個咁體貼嘅紅顏知己,真係幸福。

阿善打趣咁問:「你哋終於一齊啦?」

阿正話:「係囉,其實我好奇你哋而家係咩關係。」

阿恆話:「講啦,你呃你啲朋友做咩。」

我費事再瞞住佢哋。「未拍拖,你哋當係曖昧緊囉。」

阿琪尷尬咁笑。「我都冇應承到,你用過『未』字做咩呢?」

「唔係呀,好快會係啦。」

「快你個死人頭,你慢慢等啦。」

「你哋兩個唔好再打情罵俏啦,而家全世界都知你哋兩個有嘢。」

大家返到以前一齊嘻嘻哈哈,有講有笑嘅時候,呢個誤會都告一段落。

但係我而家其實有啲嬲。

到底係邊個周圍陷害人,製造分化?

大家2A班唔係要團結一致,點可以內訌?

呢個製造矛盾嘅人,絕對唔值得再留起2A班,必須遭到譴責。

我決心要將呢個罪魁禍首揪出嚟,向全部人公布佢嘅罪狀。

阿正請完我哋食下午茶之後,我返咗屋企,打電話俾一個信得過嘅人,同佢講晒今日發生咩事。

「明白,我會加快速度,呢件事絕對關乎到2A班嘅聲譽。」Patrick喺電話另一頭講,似乎佢知道事情嘅嚴重性。

又估唔到嘅係,俾佢查出係邊個之前,又有另一單嘢發生。

今次仲要同我有莫大嘅關係…








 
已有 0 人追稿