［校園］［愛情］是咁的，我女神次次都考第一。: 二十三，2A嘅風波(三)

經過上兩次嘅事件之後，我哋幾個人開始調查緊到底係邊個搞事。

估計應該都係我哋班嘅人，佢出現得起我哋班group，一定有啲關係。

但係到底會係邊個呢？

我哋班其他男仔望落去都係毒撚樣，望落去勁乞人憎，全部都一鳩樣，毫無辦法推斷。

不過今次事件嘅受害者終於輪到我…





***

又係一個星期日，阿煒星期一生日，家姐捉咗我出去陪佢去揀禮物。

行行下，忽然好似隱約見到一個熟悉嘅人。

我擰轉頭望一望，又見唔到有邊個。

係唔係我睇錯？





我唔理，繼續行。

一路行，硬係覺得好似有人跟蹤緊我哋。

返到屋企，開一開手機，大劑啦。

又係嗰個死人+852 9123 1234喺班group發咗兩張相。

今次竟然係我同家姐嘅兩張相。





一張係我哋喺街上面影，影嗰個角度搞到我哋好似拖緊手咁。

另一張竟然係影我哋入屋院門口，真係有人跟蹤我哋。

「王子軒呢條垃圾，溝我哋學校女神，仲要上埋屋企扑嘢，大家一齊公審佢。」

我即刻跑出屋企門口，落到樓下大堂，問個看更：「啱啱你有冇見到一個攞住手機或者相機影相，有啲形跡可疑嘅人？」

「咦，你咁樣講，好似有喎，嗰個人戴帽戴口罩，攞住部手機企喺門口唔知做咩，不過佢幾分鐘之前已經走咗。」

屌，錯失左一個當場捉拿犯人嘅好機會。

班group入邊多咗好多垃圾訊息，全部都係嗰班on9仔漫罵我。

「學校公認女神都溝，小心被中六啲人打。」





「衰十一喎，捉佢去差館啦。」

「咁爆，等我將呢啲嘢擺IG散播出去先。」

班on9仔真係無知。

或者佢哋冇可能知掛，平時喺學校我極少搵我家姐，基本上除咗朋友之外冇人知我哋係姊弟關係。

我就唔驚阿煒以為家姐出軌，佢應該記得我個樣，知道我係佢細佬。

「咪on9啦，嗰個係我家姐。」我喺班group send咗個訊息出去。

打開IG睇一睇，仆街啦，已經有人將呢樣嘢擺咗上IG。





鍾要傳得越嚟越誇張，有人講到我同校花喺公廁激戰三百回合。

不過的確有咁嘅事，但唔係我。

我心諗，今次碌柒了。

網上一傳十，十傳百，到時人人都會以為我上咗校花。

不幸中嘅大幸係嗰個係我家姐，我都可以勉強講清楚個事實，不過仍然會招嚟一身麻煩。

睇嚟我會喺學校都遇到唔少問題。

真係想打柒個始作俑者，雖然佢搞事搵錯對象。

家姐表情卻異常淡定。





「驚條毛，反正又唔係事實，啲人實信女神㗎。同理你咁嘅樣，人哋邊會信我願意同你扑嘢啊。」

「屌你，我點都算係班草啦。」我不忿咁講。

***

第二日返到學，果然有唔少麻煩。

首先我哋班啲on9仔一見到我都走過嚟話：「喂，你威啦，上咗女神。」

跟住小息有幾個高form落嚟又講返同一番說話。

真係好撚煩。





當然我攞起手冊，比佢哋睇我監護人嘅名，就已經收咗佢哋皮。

不過咁樣令到我全日喺學校都好尷尬。

搞屎棍嘅人雖然冇闖出咩大禍，不過我惹咗好多麻煩上身。

始終最尷尬嘅係，對呢件事一知半解嘅Mr Chan放學私底下叫咗我出去。

Mr Chan話：「王子軒，聽說有人話你同你家姐喺唔知邊度做咗啲唔適合嘅嘢，係唔係真㗎 ？你而家未夠16歲，做呢啲嘢係犯法個喎。」

唉，唔知第幾次俾人誤會啦。

我將尋日嘅事嘅始末同Mr Chan講。

Mr Chan 一面抱歉咁講：「唔好意思誤會咗你，不過我哋老師始終比較擔心，因為呢個會影響學校聲譽。」

我本身諗住將+852 9123 1234呢個電話號碼嘅事同Mr Chan反映。

但係諗下，都係自己私自處理好，廢事令事件發酵。

返到屋企，做完功課，又係無所事事咁打FIFA。

呢個時候，電話響起。

「喂，係邊位。」

「Patrick啊。」

聽完後面嗰句話，我驚訝到遙控器都跌落地。

「好消息，我終於查到+852 9123 1234嘅身份。」