我急忙問:「係邊個?」

「一個叫Lee Pak Keung嘅WhatsApp用戶,我哋班好似有呢個人。」

我驚訝到O咗嘴。

Lee Pak Keung,李栢強,人稱強仔,係我嘅小學同學。

不過我同佢完全唔熟,佢上堂基本上唔會出一粒聲,個人怕羞到不得了。





上到中學,根本冇變過,平時佢喺我哋班,完全冇人會留意佢,邊緣人之中嘅邊緣人。

佢都唔係屬於嗰啲毒撚狗公嗰班人。

一個又怕羞又唔敢出聲嘅人,同我哋又冇仇,點解會搞上我哋頭嚟?

但係Patrick查嘅基本上冇可能出錯,邊有可能咁岩撞名,有第二個人叫Lee Pak Keung,仲要同我哋班有關係。

唔理啦,聽日一於放學捉佢返嚟嚴刑拷問,呢件事點都同佢有啲關係。





***

第二日嘅放學,我同阿琪、Ada、Patrick、阿正、阿恆急急腳跑落學校大門口。

按照強仔嘅習慣,既為邊緣人,通常都係慢慢出班房,等啲人走晒先離開學校。

等咗十分鐘,終於等到我哋要等嘅目標。

一個矮矮地,帶着一副圓框眼鏡,好有一種偽文青feel嘅男仔,揸住包紙包飲品飲住行出嚟。





佢就係強仔。

我哋神色凝定,等待佢行過嚟。

佢低頭行過嚟,似乎冇留意到我哋嘅存在。

行到我哋面前,佢先發現大門口俾人擋住咗。

「喂,強仔。」我以冷酷嘅聲音同佢講。

佢呆呆咁望住我哋,我哋以怒視相對。

喺三秒之內,佢嘅面色由呆滯變成惶恐,似乎佢心有屎。

令我哋意想不到嘅係,佢竟然即刻轉身拔腿就逃。





我哋呆住咗兩三秒。

都係Ada反應最快。「你哋喺度發呆做咩?追啦!」

我哋先至回過神嚟,拔腿就追。

「阿軒、阿恆,你哋去睇學校後門,佢有機會喺嗰度逃走。」

我哋以九秒九嘅速度跑到去後門埋伏,只見強仔徬徨咁四周張望,膽戰心驚咁行過嚟後門。

我哋即刻跑出嚟,打算殺佢一個措手不及,當場捉住佢。

誰不知強仔嘅反應速度比我哋想像中快,佢即刻調轉頭又跑走。





「佢跑咗上一樓!」我氣吁吁咁跟住跑上去。

「Patrick、阿正,你哋企喺前後樓梯守住,唔好俾佢又逃走。」

當時全部人已經走晒,一樓空無一人。

我哋四個逐個逐個班房抄,但係都見唔到強仔嘅蹤影。

佢到底匿埋咗去邊呢?

我哋搜剩女廁,斷估佢應該都唔會敢匿埋喺女廁掛。

點知阿琪一行入去,一個人影即刻從廁所飛奔出嚟。

強仔驚慌咁跑入其中一個班房,我哋即刻全部人跑晒入去。





佢已經塞死自己,無路可逃。

「你…你哋想點…」

我哋步步進逼。

「你講,+852 9123 1234呢個電話號碼係唔係你嘅?」

強仔面上閃過一下驚訝嘅表情,隨即又裝作無辜嘅面色。

「咩…咩啊,未聽過呢個電話號碼。」

Patrick話:「唔使扮嘢,我哋已經查到嗰個電話號碼係你嘅。」





強仔已經面如死灰。

「你哋講咩呀…我唔知你哋喺度講緊咩喎…」佢打算繼續扮無知。

「你老味,你知唔知你咁樣做,搞到我爭啲冇晒朋友!」Ada不滿咁講。

阿正怒氣沖沖咁咆哮:「屌你老母冚家剷,你搞到我爭啲同我女朋友分手!」

我沉住氣講:「嗱,唔撚講你偷拍我同我家姐,淨係上面嗰兩件事,我哋已經可以告撚到你甩褲,你唔使諗住繼續喺呢間學校繼續讀落去。」

強仔竟然開始驚到流下兩行眼淚。

「唔好告我啊…我阿媽知道一定打死我。」

「你而家重實招來,我哋就考慮下。」

「其實…」強仔周圍望,確保冇其他人之後,壓低聲音講:「我都係俾人迫,身不由己。」

如我所料,強仔冇可能會自己咁無聊去玩我哋。

「事情係咁嘅,兩個禮拜前,我喺廁所廁格打飛機,點知唔記得鎖門…」

我心諗,真係on9,邊有人會喺廁所打飛機唔記得鎖門㗎。

強仔戰戰兢兢咁講:「跟住唔小心比居皋天撞破咗,佢威脅我,要幫佢做幾件事,唔係就周街唱我喺廁所打飛機。」

居皋天,人稱天霸,係嗰個一開學本身坐阿琪隔離嘅死肥仔。

「跟住佢要佢send俾我嘅嘢send去唔同地方。」佢急忙攞出手機。「嗱,你哋唔信嘅話,我呢度有對話紀錄可以證明。」

我哋攞嚟一睇,真係一個用戶名叫「阿天」嘅WhatsApp號碼Send咗一堆相同文字俾佢,就係呢啲訊息惹起大禍。

原來幕後黑手係呢個天霸,強仔只係任意擺佈嘅奴隸。

我諗翻起開學嗰日,我用技倆同佢換咗位,令到佢憤不已,唔同…

我將我嘅諗法講出嚟。「我諗到點解係佢。開學嗰日佢本身同阿琪坐,我同佢換位,有爭執,應該令佢懷恨在心。同埋今次事件影響嘅都係我同我身邊嘅人,證明天霸係衝着我而嚟。」

Ada疑惑咁問:「咁但係點解佢唔整埋Patrick同阿琪?」

阿恆話:「我諗到個好勉強嘅理由。可能因為Patrick係電腦高手,驚佢報復會查到,或者可能下一個搞嘅就係Patrick。阿琪我就幾確定點解,你都算係阿軒半條女,正常佢冇理由唔搞落你度。但係阿軒一開始講,天霸本身同阿琪坐,我恐怕佢真正目的除咗想係針對阿軒之外,極度懷疑佢係想溝阿琪,分化我哋,藉此為自己製造機會。」

阿琪好似好驚咁撓住我隻手。「唔係嘛…阿軒你諗下計,我唔想嗰個死肥仔溝我!」

「梗係唔會俾佢溝你啦,咁低質嘅男仔,實幫你一腳伸撚開佢。」我話。

Ada話:「嘩,有人呷醋囉。」

阿恆話:「Enough enough,你哋唔好再係我哋面前放閃啦。」

阿正問:「咁而家有證據,我哋係唔係去告佢?」

強仔惶恐咁講:「唔好呀…唔好告我啊…」

我拍一拍佢膊頭。「我哋講嘅係天霸,都唔點怪得你,你都係俾佢迫。不過阿正,都係唔好告天霸,網絡上並冇實質嘅證據。」

Ada話:「咁就由佢逍遙法外?佢爭啲害到我哋喎!」

「我哋並唔係放過佢,而係要設一個陷阱,搵到實質嘅證據,去公布佢嘅惡行。」Patrick眼底下閃過一下嚇人嘅目光。「呢條友窮凶極惡,不單止打算分化我哋,仲要搵強仔做代罪羔羊。」

「陷阱?」阿琪問。

「係,只要佢踩中呢個陷阱,佢嘅所作所為都會俾人知。」Patrick同強仔講:「嗱,如果你想將功贖罪,你今次要幫我哋裏應內合,將天霸一網打盡。我哋都會確保你喺廁所打飛機嗰件事唔會俾人洩露出去。」

「好,好多謝你哋嘅諒解,小弟感激不盡。」強仔講。

「同埋,呢個計劃,啱啱已經諗好,不過我需要阿軒同埋阿琪嘅配合。」

 我話:「OK,你想點配合?」

Patrick露出奸狡嘅笑容。

「我需要你哋兩個,假戲真做,直到星期五,呢幾日暫時做住情侶。」

 
已有 0 人追稿