我同阿琪互相對望,尷尬咁傻笑。

阿琪若有所思咁講:「暫時…好啦。」

「嗱,個計劃係咁嘅,我諗住…」Patrick將佢嘅計劃詳盡講出。

「勁喎,不愧為全級第二,咁周詳嘅計劃你都諗得出。」Ada話。

阿正話:「咁強仔,記住我哋嘅約定,我哋幾個之後會講一啲私人嘢,冇乜嘢你可以走先。」





「好…多謝你哋放我一馬。」

強仔走咗之後,其他人對我同阿琪露出不懷好意嘅笑容。

「喂…講清楚,太過分我唔會做㗎。」阿琪不滿咁講。

「冇乜嘢,只不過要你哋影張情侶照。」Patrick話。

「係囉,你哋不嬲都做開㗎啦。」阿恆笑淫淫咁講。





「屌,好囉。」我勉為其難咁同阿琪企埋一齊。

阿琪舉起V字型手勢。「嗱,咁樣就OK,你哋快啲影啦。」

「咁Hea㗎,至少要kiss啦,我同阿善不嬲都咁做。」阿正話。

「我冇所謂嘅…不過…」我下意識咁望住阿琪。

「咩冇所謂…衰人!我唔要我嘅初吻咁快俾你攞走!而家我哋都唔係真正一齊!」阿琪面紅耳赤咁搣咗我一下。





「好心你啦,假戲真做喎,你咁樣,係唔係想計劃失敗啊?」Ada講。

「你都話假戲啦,好心你哋放過我哋啦。」我冇好氣咁講。

「總之kiss一定唔得啊!!!」阿琪抗議。

最後我哋互相妥協,拖住手影咗嗰張相。

「嗱,將呢張相upload上IG,擺做頭像,你哋兩個要喺個人簡介互tag對方。」Patrick話。

「真…真係要咁做?」我猶豫咁問。

阿恆話:「屌你,呢個計劃係要你哋兩個公開一齊先有用㗎。」

萬事俱備,我哋作戰嘅復仇大計正式展開,準備將天霸正法。





希望呢個計劃唔會出咩差錯,唔係大家都會碌柒。

分工合作好後,我哋各自返屋企。

作為一對暫時嘅情侶,梗係要做戲做全套啦。

「情侶係唔係要拖手㗎?」我問。

「上次先俾你拖完…你好想咩?」阿琪猶豫咁講。

「梗係啦,因為我鍾意你嘛。」我直說不諱。

「又口花花…咁好啦,嗱,不過你要記住,我冇應承你以後㗎,同埋唔准亂咁摸我啊!」阿琪雙手抱胸,佢羞答答嘅表情真係好可愛。





「唉,你當我係鹹濕仔咩。」我不滿咁講。

「你不嬲都係鹹濕仔啦。」佢笑咪咪咁講。

「屌,我淨係講鹹濕笑話姐,冇做過鹹濕野喎。咁係唔係拖呀?」

我伸隻手出嚟,阿琪毫不猶豫咁拖住。

送到佢去屋企樓下,我大膽咁問:「Goodbye kiss唔得, goodbye hug得唔得呀?」

「唉,好啦,滿足下你呢個鹹濕仔啦。」阿琪伸開雙手。

我順勢攬住佢。「咩滿足姐,我知你都好想。」

再見之後,我一路笑唔停口。





唔單只係因為可以做女神三日男朋友。

更加因為我知道呢個計劃好大機會成功,若果真係復仇成功,嗰陣搞到我哋氹氹轉嘅天霸,將會死無葬身之地。

***

(阿恆視覺)

第二日嘅朝頭早,我哋幾個一早準備返到課室,準備好戲蒞臨。

阿軒同阿琪喺啱啱好八點一齊返到課室。

阿軒露出好得戚嘅表情,喺全班面前舉高拖住阿琪隻手,將佢哋嘅戀情公諸於世。





我同阿正向後偷偷望一望天霸。

佢露出一副充滿妒忌又凶狠嘅表情,似乎想置人於死地咁。

掂,Patrick嘅推算果然正確。

天霸已經開始步入我哋設嘅陷阱。

我向Ada打眼色,佢做咗個OK手勢。

進入計劃下一階段。

Ada擺出一面愁眉苦臉嘅表情。

過多陣上堂,Ada特登一言不發,老師問佢問題,佢都精神恍惚咁回答。

阿軒問:「Ada姐,你冇乜事嘛?」

Ada冇回應。

小息嘅時候,Ada二話不說就拉咗阿軒上學校天台。

我向強仔打咗個眼色,佢走去天霸嗰度,喺佢耳邊講咗一番說話。

天霸嘅表情變得奸狡,跟住佢行咗上天台。

我同阿正、Patrick不敢怠慢,靜雞雞咁跟蹤佢上去。

天霸匿埋喺一排長凳後面,偷偷望住阿軒同Ada。

而我哋喺另一排長凳後面,偷偷留意天霸嘅舉動。

正所謂,螳螂捕蟬,黃雀在後,天霸以為自己好得戚嘅時候,冇諗到後面有人監視佢。

但願我哋後面冇任何捕鳥人。

「Ada,你講咩呀,我唔明喎。」阿軒疑惑咁講。

「你鍾唔明?我係話,我鍾意你啊!」Ada激動咁講。

「吓,但係如你所見,我已經有女朋友啦。」阿軒個樣好無奈。

「咁…冇影響㗎!你平時對我咁好,你點都對我有啲意思啦!」

「係嘅…咁你嘅意思係…」

「一腳踏兩船囉!我唔介意做第三者。」

「咁樣唔係太好喎…我驚阿琪發現。」

「你驚乜撚嘢?你想唔想先?」Ada行近阿軒。

「好啦。」

佢哋兩個面對面靠埋一齊,望落去勁似接吻。

當然我相信佢哋冇真係kiss到啦。

只見天霸攞起手機,將呢一幕影底。

預備上堂響起,天霸攝手攝腳咁離開現場。

望見佢行樓梯落咗去,我哋走出嚟同阿軒、Ada會合。

我話:「唔錯,佢已經中咗計。」

阿正話:「你哋啲演技幾好,啱啱有冇真係kiss到?」

阿軒話:「屌你,我初吻係留返俾阿琪㗎。」

Ada話:「額頭掂額頭咋,已經夠呃到人啦。」

Patrick托一托下巴講:「嗱,如果計劃發展順利,聽日我哋朝頭會收到嗰張相,可能同埋一個假嘅對話紀錄。」

我哋落返去上堂,之後成日都冇咩特別嘢發生。

第二日瞓醒起身,果然收到嚟自+852 9123 1234嘅私人訊息,同Patrick所料一樣。

放學之前,我哋全部人都裝作咩都冇發生過。

放學嘅時候,強仔同天霸講咗幾句話,天霸走咗出去課室外,應該會係偷聽。

等啲人走晒,我哋去咗走廊嘅盡頭,暗中監視。

阿琪叫住阿軒:「等一陣。」

佢攞起手機,show俾阿軒睇一張相。「你點樣解釋?」

阿軒呆咗呆,口窒窒講唔出嘢。

阿琪冷靜咁講:「分手啦,冇諗過過咗兩日你就俾綠帽我戴。」

「對唔住!唔好同我分手,我應承你,唔會有下一次,我即刻同佢斷絕關係。」阿軒上前打算攬住阿琪。

阿琪推開佢。「衰人!我唔會再信你。」跟住佢自己離開咗班房。

呆咗幾秒,阿軒跑出班房門口,見到喺度偷聽嘅天霸。

「喂,你個死肥仔喺度做乜嘢?」阿軒惡狠狠咁講。

天霸笑淫淫咁講:「食花生囉,抵你撚死啦。」

「原來係你!嗰張相係你send俾阿琪嘅,你都幾凶險喎!」阿軒指住天霸個鼻講。

佢撥開阿軒隻手。「冇喎,聽說係強仔自己send嘅。」

「你咁樣講,即係話你知道內情。強仔邊會識得自己一個人做埋啲咁嘅嘢,睇嚟,唔單只係今次,之前幾次都係你幕後指使。」

天霸望下周圍,我哋即刻唔出聲,匿埋一角,佢應該冇望到我哋。

當佢以為周圍冇人,就好寸咁話:「係呀,係我做嘅,咁又點?吹啊?」

而天霸唔知嘅係,佢呢句話,已經令佢完全掉入陷阱之中。








 
已有 0 人追稿