［校園］［愛情］是咁的，我女神次次都考第一。: 二十六，2A嘅風波(六)

阿軒憤怒咁講：「好…我實告死你！」

天霸得寸進尺咁講：「你有咩証據？你告得入我？同埋我影相都唔係犯罪，send出嚟嗰個又唔係我。」

阿軒冇出聲。

「同埋我都係替天行道，你自己攞嚟衰。林凱琪我就溝硬啦，準備收皮啦。」天霸大力篤阿軒嘅頭，跟住行開咗。

待佢走之後，我哋走出嚟，難掩興奮嘅表情。





「正宗柒頭，條on9今次鍾唔死？」我話。

阿軒緊握拳頭。「啱啱今撚寸，聽日佢就會喺全班面前碌柒！」

Patrick去班房嘅角落頭攞返一部手機。

呢部手機，將會成為關鍵。

以其人之道，還之其人之身。





***

第二日返學，我哋六個好早返到學校，準備最後嘅行動。

Patrick先將尋日嘅證據放落課室電腦。

阿琪再走入班房，趴喺張枱度，扮作傷心嘅樣。

我哋其他人匿埋喺一邊。





過咗一陣，天霸走入班房。

佢同阿琪講：「靚女，你冇事嘛？」

仆街，果然想溝我女神，不過你唔會得手嘅。

阿琪冇出聲。

天霸繼續講：「我聽說王子軒俾綠帽你戴，你同佢分咗手，啱呀，佢呢種渣男，完全配唔起你。」

阿琪打個喊路。「我瞓覺咋，唔該行開啲，我男朋友見到會唔開心。」

天霸摸不著頭腦。「男朋友？」

我行入班房，阿琪企起身，拉著我隻手。





「bb，有個死肥仔想溝我啊。」

天霸更加疑惑。「你哋…唔係…」

「嗱，最後一次機會。」我冷淡咁講。「你從實招來，承認你嘅罪過，我哋就考慮下放過你。」

天霸由不解變得徬徨。

佢結結巴巴咁講：「你…你哋好嘢，咩都唔關我事。」

佢唔認冇所謂，反正我哋冇諗過會放過佢。

天霸坐低嘆氣搖頭。





到八點正，全部人都返到班房。

今日有班主任堂，Mr Chan同時間到都入咗班房。

阿正走出去，私底下同Mr Chan講咗幾句。

Mr Chan變得一面嚴肅。

「啱啱有同學同我講，有人喺我哋班嘅WhatsApp group發放訊息，故意中傷其他同學，係邊個？」

估計天霸應該係走投無路，所以會決定先下手為強，為免被我哋舉報。

但係我哋冇諗到佢竟然會先出賣「自己人」。

佢舉手話：「好似係李栢強做嘅。」





強仔都冇諗到天霸有如此一著。

「係，係我做嘅，不過係居皋天逼我咁做㗎。對唔住各位，我都係迫於無奈之下先會咁做，但係背後指使嘅人係佢，你而家係迫我篤埋你出嚟姐。」強仔企起身講。

天霸開始變得慌張。「胡說八道！根本係你自己做嘅，仲賴落人哋度。」

強仔冷靜咁講：「係你send啲相俾我，逼我要轉發出去，你話如果我唔咁樣做，就會爆曬我啲嘢出去。」

天霸激動咁講：「邊係！陷害Ada收兵、恆哥做第三者、王子軒上佢家姐同出軌，嗰啲假對話記錄同埋相，都係你自己send出去嘅！我咩都冇做過㗎！」

真係on9，佢啱啱講呢句嘅時候，已經好完美咁將自己完爆。

我插嘴：「喂，而家講緊班group。阿恆嗰件事，除咗我同其他當事人之外，阿正從來冇同其他人講過，我哋都冇同其他人講過。我嗰件事都一樣，阿琪除咗同我之外冇同其他人講過。冇外人會知，因為係send俾自己手機，而唔係班group。你知道，只有一個可能，就係因為你send出去嘅。」





全班嘩然聲起，天霸已經返唔到轉頭。

佢已經開始語無倫次。「我…總之唔係我做嘅…唔係send出去…」

阿正話：「你啱啱話假對話紀錄，咁樣講，如果係你send出去嘅話，你係故意用假資料陷害我哋喎。各位同學，唔好比呢條友仔呃咗，所有對話記錄都係假嘅。」

班上開始議論紛紛。

「原來係有人陷害人…」

「咁我哋當初咪就怪錯咗Ada…」

「大家靜一靜…」Mr Chan調停大家。「居皋天，呢件事係唔係你主使嘅？」

「唔係呀！係李栢強做嘅！佢同王子軒夾份屈我㗎！」佢仲打算垂死掙扎。

Patrick舉手話：「Mr Chan，其實我哋已經查到係邊位同學，不過打算俾佢自首，所以啱啱先冇同你講。既然佢死都唔認錯，請你打開電腦，所有證據都係入邊。」

Mr Chan打開電腦。

尋日我同天霸對話嗰條影片彈咗出嚟，佢承認自己係幕後主使嘅對話，全班同學睇得一清二楚。

影片完咗，佢同強仔嘅對話紀錄又彈咗出嚟，入面有佢send出嚟嗰啲相同假對話紀錄。

此刻天霸已經面如死灰。

佢大嗌：「好，強仔，你出賣我嘛？我就爆你啲秘密出嚟！佢之前喺學校廁所打飛機！」

Ada冷靜咁講：「強仔同我哋講，係你入廁所偷窺人哋喎。」

我加多一句：「就算打飛機又點，都冇犯校規，況且佢冇咁做。你咁樣亂講，佢可以告你誹謗喎。」

Mr Chan露出憤怒嘅神情。

「居皋天！You stand up, get out of the classroom now！」佢對住天霸咆哮，平時佢對學生好好人，未見過佢咁嬲。「我落咗堂先同你算帳！」

天霸垂頭喪氣咁走出班房，佢應該估唔到自己會落得如此下場。

Mr Chan 深呼吸一口氣。「各位同學，唔好意思，啱啱失態了。我想講嘅係，大家要和睦共處，作為同學，千祈唔好好似啱啱嗰位同學咁挑撥離間，分化其他同學，我平生最憎呢種人。至於李栢強呢，雖然你有份參與，不過既然你係俾人強迫，你啱啱又勇於自首，你而家同全班同學鞠躬道歉，佢哋原諒你嘅話，我就唔會再追究落去。」

強仔走出嚟。「對唔住各位同學，因為我嘅懦弱，被迫做出一啲唔恰當嘅行為，傷害到大家，我李栢強，衷心向大家致歉。」

「冇人會怪你㗎，我哋都知你係被迫，有苦衷。」我話。

Mr Chan話：「各位同學係唔係願意原諒佢？」

班中全部同學都話願意。

Mr Chan話：「咁我就唔再對李栢強追究落去啦。第二樣嘢，我好似聽聞王子軒同林凱琪拍緊拖，作為一個稱職嘅班主任，我有必要提醒你哋一句，學校唔鼓勵學生談戀愛，千祈唔好比呢段關係影響學業。」

唉，佢已經第二次誤會我啦。

阿琪苦笑：「其實我哋唔係…係因為要引犯人落陷阱，找出幕後黑手，先至會扮情侶，演一場戲。」

但上面突然有個on9仔大叫：「唔係呀，你哋好襯喎，不如假戲真做，繼續做情侶啦。」

跟住好多人附和。

我冇好氣咁講：「拜託大家放過我哋啦…」

Mr Chan幫我解圍：「大家就由得佢哋兩個啦，條路點樣行，係佢哋兩個自己揀。唔講咁多廢話啦，我要開始教書啦。」

接下嚟嘅課堂，都喺歡笑聲之中度過。

唔知點解，我哋班突然變得好和諧。

去到小息嘅時候，更加有幾個以前鬧Ada嘅on9仔，走過去同佢道歉，話自己誤會咗佢。

至於天霸，淨係知佢小息俾人捉咗落去教員室，之後冇再見過佢啦。

估計係佢俾人踢咗出校，或者其他種種原因。

淨係知佢呢個人從嗰日開始喺我哋班上面消失咗。

呢件2A嘅風波，到此結束。

呢件事造成唔少負面影響，但都不乏好嘅結果。

我哋同嗰啲本身唔係好熟嘅同學，拉近咗距離。

強仔都由一個邊緣人，變成返一個正常嘅同學，多咗好多朋友。

最重要嘅係，我同阿琪關係變得親密。

例如再見嘅時候會攬一攬對方。

雖然我哋未算係情侶，我覺得呢種曖昧嘅關係都唔錯。

唔知我哋咁樣嘅關係仲可以維持幾耐呢？