去到一年一度嘅運動會啦。

上年個運動會因為落雨on99咁取消咗,今次其實先係我中學第一次運動會。

我可以報咩嘅都報哂:100米跑、200米跑、3000米長跑,同埋跨欄100米。

作為一個運動好手,應付呢四個項目都綽綽有餘。

我都好有信心攞到至少一面獎牌。





睇嚟今次綠社嘅希望,就靠係我身上啦。

去到運動會第一日,大家各自上咗看台。

上年1B嘅人都喺度,大家有講有笑。

當然我女神阿琪都喺度啦,大家一班老友坐埋一齊笑嘻嘻。

家姐作為上一屆嘅社長,同埋今年嘅社長一齊指揮住啦啦隊,練習緊打氣。





嗰啲無聊又on9嘅開幕儀式完咗之後,就正式開始運動會。

好快到咗我第一個項目: 3000米長跑。

阿恆都有參加。

我恥笑佢話:「你平時跑得咁撚慢,小心包尾喎。」

「屌,咪撚咁寸,我一陣一定跑贏鳩你。」佢毫不在乎咁講。





「到時睇下點。阿琪你就睇我贏塊獎牌返嚟。」我對阿琪舉起勝利手勢。

「男子丙組3000米最後召集~」廣播處個咪播緊,我哋先發現就快夠鐘,急急腳跑落去,費事俾人DQ。

去到起跑線,拉下筋,發現原來跑3000米嘅人唔多,丙組得個七個人。

「嗶~」我即刻由起跑線彈咗起嚟開始跑。

不過有幾個on9一枝箭咁樣飛咗出去,全力衝刺中。

長跑嘅秘訣根本唔係一開始就全力跑,靠嘅其實係耐力,佢哋應該好快冇晒力,到時一定碌柒。

我以平均快嘅速度跑,大約處於中間嘅位置。

阿恆果然不出所料,真係喺包尾。





跑左一個圈之後,嗰班跑得太快嘅on9仔開始冇晒力,跑得越嚟越慢。

我繼續以平均快咁跑過咗佢哋。

阿恆都脫離左包尾嘅位置。

不過唔驚,佢仲爭我三份一個圈。

跑多三四個圈,我繼續喺第一領放。

但係我已經開始冇力…

點知阿恆仲有力,繼續以慢速向我嘅位置前進。





屌,點解佢好似跑極都唔會攰咁嘅。

去到最後一個圈,佢已經非常之接近我。

我大嗌:「有冇可能呀?你竟然只係爭我少少?」

阿恆大聲回應:「講咗啦,你又唔信。」

跟住佢居然開始全力衝刺。

What the fuck?!

我冇諗太多,用返我剩返嘅力,全力向前跑,避免佢追過我。

但係呢個時候我已經筋疲力盡。





仲有大約150米嘅時候,佢竟然超越左我。

我望到觀眾席嘅阿琪,心諗冇可能瘀俾佢睇。

我加快速度,全力狂奔。

但係經過之前幾個圈嘅折騰之後,已經返唔到頂峰速度。

最後以5秒之差輸咗比阿恆。

今次原來碌柒嗰個係我。

跑個終點線之後,我已經冇晒力,趴係地下。





抖咗一陣上返去看台,見到阿恆笑淫淫咁企喺度。

佢得意洋洋咁喺我面前同阿琪講:「阿嫂,你老公贏到獎牌,不過得銀牌,金牌就由我攞走咗啦。」

我不忿咁講:「你做乜跑得咁鳩快?」

「我點都係校隊入面嘅簡迪,喺FIFA有96體力啊,耐力點都好過你。開始慢慢跑,去到咁上下開始發力跑鳩過你,咪就贏咗囉。」

仆街,雖然有獎牌,不過如果要攞金牌,睇嚟要下幾個項目努力下先得。

下個項目係200米跑,比較多人參加,分咗初賽同決賽。

我喺初賽輕鬆攞咗小組第一。

跟住休息一下,過多一個鐘之後先有100米跑初賽。

而家到咗阿琪去跑100米初賽。

我企喺終點線附近幫佢打氣。

「嗶~」啲女仔開始拔力狂奔。

個個都肥屍大隻,跑得竟然幾快下。

而我女神被遠遠拋離喺最後。

最後佢以包尾衝線。

唉,點解會咁㗎。

佢行埋過嚟。

我同佢講:「喂,好心你跑快啲啦。」

「得啦知你勁啦,係運動健將嘛。」阿琪有啲不忿咁講。

「講真喎,人哋咁肥都跑得快過你。」我暗自竊笑。

「你咁講㗎,你話肥都快啲嘛,好,你一陣請我食大餐,養肥我就跑得快。」

諗住寸下佢,反而而家我墮入咗佢陷阱。

「唔係呀,講笑啫,肥咗仲慢。」

「你玩我呀?你唔請就算啦,最多我呢幾日唔理你。」阿琪裝作撥袖而去。

「唉,好啦好啦,請你囉。」為免女神生氣,迫不得已運動會第一日完咗之後出去請佢食飯。

呢餐食咗三百幾蚊,我銀包真係好傷…


 
已有 0 人追稿