又到聖誕~又到聖誕~

今年聖誕真係開心~

時關我老豆老母喺聖誕節前一個禮拜嘅星期六返咗香港,俾咗嗰大驚喜我。

雖然佢哋好少返嚟陪我同家姐,但係次次返嚟都有好嘢。

佢哋喺外國工作應該都好辛苦,仲要對我哋咁好,真係好感謝佢哋。





我同家姐去到機場接佢哋。

老豆老母落咗機,佢哋兩個都笑得好開心。

阿爸同我講:「阿仔,一陣可能要麻煩你,行李今次都幾多下。」

屌,佢哋竟然帶咗六件行李返嚟,搬到搬死人。

一路搭車返去嘅時候,老豆老母問我同家姐嘅學業狀況。





阿媽笑吟吟咁問:「喺學校有冇識到啲女仔呀?」

家姐搶先一步幫我回答:「邊只識到,佢應該就快拍拖啦。」

我急忙否認:「冇…冇啲咁嘅事。」

其實我都唔知佢哋俾唔俾我中學同人拍拖。

阿爸失落咁話:「唉,仲以為我個仔咁靚仔都會識到啲靚女,如果真係搵到女朋友嘅話,下年我哋返嚟嘅時候,介紹俾我哋識下。」





阿媽話:「阿仔,即使有,都唔好怕同我哋講啦,我哋又唔會反對。」

原來係咁,咁我放心啦。

阿爸開始滔滔不絕咁講:「中學嗰時嘅戀愛先係最難忘可貴啊。想當年啊,你阿媽係學校嘅女神,仲要係大家族嘅千金小姐。我嗰時好窮啦,無啦啦有一次調位同佢坐,就同佢呢個有錢女扯上關係。仲記得你阿公嫌我太窮,唔俾我同你阿媽拍拖,最後搞到我哋兩個被逼私奔走咗…」

唉,呢個老豆老母嘅美好戀愛故事已經喺阿爸口中唔知聽咗幾多次,聽完都厭啦。次次佢講都會好興奮咁講唔完,係時候停一停佢。

我連忙阻止阿爸繼續講落去。「得啦,知你都係嗰時學校男神嘛,你講咗好似一千次啦。」

其實我阿爸都係一個童心未泯嘅人,仲有啲孩子氣。

我老豆老母個樣都幾好,雖然已經45歲,但係唔似嗰啲大叔大媽咁款。

所以話,靚仔靚女嘅基因係會遺傳嘅。





返到屋企,我搬晒啲行李入屋企。

其中一件行李異常巨大。

阿爸笑吟吟咁講:「打開個行李,你睇下係咩嚟嘅。」

嘩,原來係最新款嘅100吋摺疊式電視機!

側邊仲有一部…

屌,正啊,原來係我夢寐以求嘅PlayStation Ultra!!!

佢個系統俾以前幾代好咗好多倍,令到各種遊戲嘅流暢度都提升咗好多。





以後打機嘅時候將部PlayStation Ultra駁落部大型電視度,就真係打得好爽,隨時屈爆佢手機。

真係好多謝老豆老母。

阿爸話:「聖誕禮物啦,算係補償我哋成日唔返嚟探你哋啦。」

家姐係一邊不滿咁講:「細佬嘅禮物有啦,咁我嘅禮物呢?」

阿媽同佢講:「阿女,你已經18歲啦,真係諗唔到送咩俾你。」

只不過佢攞咗幾疊巨鈔出嚟。「呢度有1,000,000現金,當係你哋下年嘅費用啦,多出嚟就你哋自己洗咗佢啦,記住留啲俾細佬啊。」

家姐即刻見財開眼,吞晒口水咁講:「多謝阿媽!」

阿爸拎咗兩張飛出嚟。「我同事送咗兩張飛俾我,好似係香港嗰個男團MIRROR嘅演唱會,係聖誕節當日紅館搞嘅。我同你阿媽就唔係好識睇呢啲嘢,不如俾你哋啦,唔想嘥咗張飛佢。」





我攞住張飛,正喎,仲要係前排座位,如果喺網上買至少成萬蚊。

雖然我平時有睇開佢哋,但係又唔算佢哋嘅fans…

不過阿琪好似都係MIRROR嘅fans喎,成日都見到佢喺IG post轉載佢哋嘅帖文。

如果同佢一齊去睇都幾好喎…

但係而家得兩張飛,其中一張要俾家姐喎…

家姐似乎睇穿咗我心思。「俾晒細佬啦,反正我又唔係佢哋嘅fans。」

掂啦,今次真係多謝晒你,家姐。





幫我哋都執好晒啲行李之後,我急不及待WhatsApp阿琪。

「聖誕節嗰日你係唔係去睇演唱會?」

「唉,邊有買到飛姐,想睇都冇得睇啦。」

搞掂了,睇來我要俾個驚喜佢先得。

「咁你得唔得閒啊?一齊出嚟睇燈飾啦。」

「好啦,記住幫我準備聖誕禮物喎。」

「梗係啦,你都要記得喎。」

「三日後朝頭早11點見。」

「OK。」

哈哈,今年聖誕就同女神一齊過,你話爽唔爽。

睇嚟我要好好plan一下當日嘅行程啦…

 
已有 0 人追稿