聖誕節當日。

九點半。

門鐘響起,啱啱瞓醒嘅我,一仆一碌咁行去開門。

係唔係阿琪…?

「Hello…子晴細佬…」原來係阿煒。





「噓,家姐仲未瞓醒呀。」

全屋企得我一個醒咗。

阿煒除鞋行入嚟。「介唔介意我入你家姐間房?」

「冇所謂啦,反正你又係佢男朋友。」

唉,唔知家姐會唔會聖誕節朝頭早都嚟一次啪啪啪呢?





唔理佢哋咁多,唔想做電燈膽,嗱嗱臨執好啲嘢,去搵阿琪。

落到屋企樓下,就見到阿琪行緊過嚟我哋屋苑。

佢好驚訝咁問:「咦?唔係次次都係要我上嚟搵你咩?今日早咗嘅?」

「約得你出街,梗係要早啲啦。」

其實我唔喺屋企等佢嚟搵我係有樣樣嘅。





費事老豆老母誤會咗阿琪係我女朋友啦。

今日阿琪着住件啡色大褸,戴住頂粉紅色絨帽,寒冷嘅天氣下面頰泛紅,望落去真係好可愛。

「鹹濕仔,我都知我靚女,不過唔好再眼甘甘咁昅實我啦,行啦。」阿琪有啲怕羞咁講。

回過神嚟,我哋行去附近一間茶餐廳食早餐先。

坐低嗌完嘢食之後,阿琪打開佢嘅背囊。「嗱,聖誕禮物,希望你鍾意啦。」

正啊屌,係一對最新款嘅Nike波boot,我舊嗰對已經着到著到差唔多爛啦。

女神送嘅禮物果然啱我心水,送得又及時。

「咁我嘅聖誕禮物呢?」阿琪問。





「其實呢…」我喺銀包拎出過兩張演唱會飛,用手遮住。「今日約你出嚟,唔係淨係諗住燈飾。」

「吓,咁你諗住做咩?」佢疑惑咁問。

「登登登登!」我攞出兩張飛。「就係睇你最鍾意嘅MIRROR啦。」

阿琪個樣又驚訝又開心。「真㗎?阿軒今次我真係愛死你!」

我暗自竊喜。「你啱啱講咩話?我聽唔清楚喎,講多次啦。」

阿琪意識到自己說漏咗嘴。「冇…冇呀,你咩都聽唔到。」

「明明就有,講多次啦唔驚喎。」





「你個低能仔又玩我,唔愛你啊。」

「你明明就係。」

「你再係咁就唔理你啦。」

呢個就係我哋成日打情罵俏嘅日常。

食完早餐之後,我哋一齊搭車去咗深水埗。

經過波鞋街,我買咗幾件波衫,家姐尋日分俾我嗰啲錢已經洗咗一半。

周圍行下,陪阿琪睇下啲靚衫,掃下街…

不知不覺已經到咗三點幾。





場演唱會四點開始,我哋搭車去咗紅磡。

唉,早咗20分鐘,紅館外已經有一大堆人排緊隊等候入場。

終於順利入到去,搵返個位坐之後,發現原來真係靚位。

阿琪話:「正呀!呢度望到個stage一清二楚啊!」

MIRROR十二個成員出場之後,好多觀眾都尖叫歡呼,包括阿琪。

唉,真係花痴女。

個演唱會冇乜特別,或者我唔識欣賞掛,同平時睇YouTube嗰啲冇乜分別。





不過等到姜濤出場唱嗰首《蒙著嘴說愛你》嘅時候,阿琪同其他觀眾一齊大叫:「姜B!我愛你!」

我心中不禁泛起一陣醋意。

諗起嗰個《我老婆嫁咗MIRROR 導致婚姻破裂關注組》,仲以為啲人係吹大咗姐,原來係真嘅。

唉,但係我又唔係佢男朋友,可以有資格呷醋咩?

成個人竟然有啲down。

演唱會完咗之後,我苦笑咁問阿琪:「佢哋真係有咁靚仔咩?」

「唔係靚仔咁簡單,係超級超級超級靚仔呀!尤其是係姜濤!」

我一言不發。

佢似乎察覺到我有異樣。「你…冇事嗎?」

「冇…冇嘅。」

阿琪噗哧一笑。「你係唔係呷醋啊?」

「Errr…」

「睇一個人又唔係淨係睇個樣嘅,睇靚仔都係一種養眼嘅方法姐。」佢嫣然一笑。「仲有…」

「咦?」我搔搔頭。

阿琪講得越嚟越細聲。

「其實你都幾靚仔啦,同埋我又唔係淨係因為你靚仔先至鍾意你…」

我不禁會心微笑。

「你諗多咗啦,我都冇呷醋。你啱啱講咩話?講多次啦。」

阿琪展現出好氣憤嘅樣。「死人王子軒!又玩我!」

佢作勢想打我一拳,我即刻嘻嘻哈哈咁逃走。

沿路上我哋一直打打罵罵,行到尖沙咀嘅時候已經七點啦。

食完飯之後,去到海港城,對出有一排好靚嘅燈飾。

仲有棵好大嘅聖誕樹。

大家都喺度影相打卡。

大多數都係手拖手嘅情侶。

全部人都係一雙一對咁聖誕節出嚟。

我下意識咁望住阿琪。

點知同一時間,佢咁啱都望住我。

我哋雙目交投,氣氛忽然變得有啲奇怪。

我心入邊突然有一種奇怪嘅感覺。

「阿琪…」我有啲尷尬咁講:「不如我哋…」

「唔…?」

我冇再講嘢,仍然雙眼對望…

我嘅瞳孔之中淨係得返佢…

時間好似俾人調慢咗一樣,每一秒都過得好漫長…

全世界開始變得寧靜…

我將面靠近…

阿琪同時亦將頭抬起…

心中一直怦怦跳…

即使係喺呢個寒冷嘅天氣,手上都開始出汗…

我哋兩人嘅兩頰靠得越來越近…

腦海變得一片空白…

嘴唇之間嘅距近到唔可以再近…

難道…

呢個就係我嘅初吻…?

後方突然傳嚟一陣聲音,我同阿琪不禁嚇得各自彈起。

唉,原來只不過係商場轉咗首音樂,實在太大驚小怪啦。

我同阿琪影完一輪相之後,就一齊返去啦。

雖然我哋冇再提啱啱嗰件事,不過我哋之間嘅氣氛似乎產生咗微妙嘅變化。

可惡啊,淨係差少少咋…
已有 0 人追稿