［校園］［愛情］是咁的，我女神次次都考第一。: 外傳一，阿正與阿善

大家好，我係譚一正，可以叫我阿正。

話說中一第一日返學，老師調位。

啊！！！仆街，我隔離位竟然係一個200磅嘅死肥婆！

佢對我露出奸淫嘅微笑。

唉，即是係小學嘅時候，次次調位都係行衰運，冇一次同到靚女坐。





今次仲要變本加厲，我真係想死呀！！！

屌，阿軒佢隔離位都唔太差啦。

阿恆仲要坐喺一個幾靚嘅女仔側邊。

點解我嘅運氣咁撚差㗎？！

忽然，阿恆隔離嗰個女仔擰轉頭望後面。





咁啱佢視線對上咗我隻眼。

佢對我嫣然一笑。

我不禁漲紅咗面。

個女仔…清純嘅面孔，白滑嘅皮膚，一深一淺嘅酒窩…

女神啊…真係好靚呀…





佢嘅笑容真係好可愛…

我目瞪口呆咁郁都唔郁，而佢則擰返轉頭。

我個心怦怦跳過不停，猶如小鹿亂撞。

唔通…係一見鍾情？

填座位表嘅時候，前面傳張表落嚟，我第一時間去望下個女仔嘅名。

原來佢叫何心善…

放咗學之後，我腦海中依然浮現住佢啱啱對我嘅微笑。

睇來我真係鍾意咗佢…





從第二日開始，我上堂周不時都偷望下佢。

阿善嘅背影依然都係咁靚。

不過過咗一段時間之後，見到佢同阿恆開始幾熟下，上堂有時會傾下計。

我不禁心中納悶。

呢個…係唔係妒忌呢？

唉，我又有咩資格妒忌呢。

只好咁啦，一直暗戀，淨係上堂偷望佢，都唔係一個辦法。





一於問下阿恆同阿軒意見。

佢哋話，追女神一開始，就係要同佢建立溝通。

食完飯去完廁所返課室，就見到佢哋兩個同我女神傾緊計。

阿恆即刻叫咗我埋離。「呢個係阿正，佢數學好勁㗎，俾佢教你啦。」

唔通…呢個係我機會嘅開始…？

我結結巴巴咁講：「你好......我係阿正......」

阿善話：「佢哋話你數學好勁喎，可唔可以教下我呢題點做？」

「...ok 啊...」我有啲尷尬咁講。





我數學不嬲都幾勁，女神問我嗰條題目對我來講，小菜一碟。

「就係咁樣啊…明唔明呀？」今次係我第一次好有耐心咁教導人。

「明晒啦！多謝你教我啊！」阿善開心咁講。

我突然有個好瘋狂嘅諗法。

如果要同女神建立溝通…最好問佢攞電話號碼。

我鼓起勇氣問佢：「Errr...我想係呢班識多啲人，介唔介意交換電話號碼。」

阿善淺淺一笑。「當然可以啦！我寫俾你啦，今晚WhatsApp我就可以知你電話號碼啦。」





Yesssss！！！

今次當然要多謝我兩個好兄弟啦。

返到去，即刻急不及待WhatsApp我女神。

「Hello，我係阿正。」

「Hello啊。」

「你介唔介意教多我一次？又有一題數學題唔識🙈」

我心諗，邊會介意姐，求之不得啦。

「當然冇問題啦，邊題啊？」

「課後練習第32題。」

「睇下先，一陣send個solution俾你。」

「Thx」

我即刻攞起一張白紙計條數出嚟，仲要特登寫多幾個步驟，費事阿善睇唔明。

做完之後，即刻攞起手機send俾佢。

「多謝你呀！你寫得咁詳細，我明點做呢一題啦。」

「唔使客氣喎。」

「你真係好好人呀。」

女神讚我，即係對我有好感？

我唔自覺咁有一種飄飄然嘅感覺。

冷靜落嚟之後，諗返可能只係自己FF。

有冇可能佢其實只係想收我兵呢？

唔知啊，睇下遲啲我哋發展得點，先再諗都唔遲。

如是者，嗰一日之後，阿善周不時都會WhatsApp問我數學題點做。

我哋開始會傾下啲其他嘢，例如平時有咩興趣。

「你哋男仔係唔係成日喺屋企打機㗎？」

「又唔係嘅，間中啦。咁你平時喺屋企又會做啲咩呢？」

「都冇乜嘢做啊，睇下電影咁囉。」

「你鍾意睇邊種電影呀？」

「我比較鍾意睇港產片，但係其他人成日笑我老土囉。」

咁啱嘅，我平時睇電影都有睇唔少港產片。

今次真係要把握好機會。

「我都幾鍾意睇啊。」

「原來我哋都有共同興趣XD」

「好似啱啱有一套港產片上映咗，聽說幾好睇喎。要唔要一齊去睇啊？」我思考咗好耐，終於鼓起勇氣send出去。

我心中怦怦直跳，身體不斷顫抖。

「好啊，反正我班女仔friend都唔肯陪我睇。禮拜六睇？」

Yesssss！！！

「OK，到時10:30九龍塘火車站等。」

掂啦，睇嚟可以同佢進一步發展關係。

禮拜六嘅10:30，我哋準時喺九龍塘火車站等。

阿善着咗一件T恤同長裙，放開平時綁起嚟嘅馬尾，長髮垂落肩膀以下，真係好有女神feel。

佢露出嗰個可愛嘅微笑。「我哋行啦。」

我哋去咗又一城睇電影。

套港產片果然唔錯，有香港嘅獨特風格，劇情緊湊之餘，又有唔少搞笑情節。

睇完之後一齊食飯，之後就一齊行去火車站走啦。

阿善同我微笑揮手。「我走啦，拜拜！」

屌，唔記得咗我同佢係坐相反方向嘅火車。

我仲有個原定計劃要執行。

「阿善！等一等！」我大叫。

行到電梯口嘅佢停下腳步擰轉頭。

「…」

唔知點解，我忽然發唔出聲音。

手心一直冒冷汗。

想講嘅話，一直卡喺喉嚨，講唔到出嚟。

阿善疑惑咁問：「你講咩話？聽唔到啊。」

我吞一吞口水，淡然一笑。

「冇嘢啦，拜拜，學校見。」

阿善困惑咁搔搔頭。「好啦，再見啦。」

我頹喪咁走向係另一邊嘅電梯。

仆街，點解我可以咁膽小㗎？！

我好不忿咁揼咗自己一下。

之後我同女神嘅關係似乎一直原地踏步，冇咩特別進展。

都係有時小息傾下計，WhatsApp問下功課咁。

直到有一日。

大概係十月嘅時候。

嗰日啱啱派數學卷。

小息嘅時候諗住落去買嘢食，獎勵下自己考全班最高分。

點知…

一落到樓下，見到阿善自己企喺一角，飲緊檸檬茶。

奇怪…通常會有好多朋友同佢一齊。

佢仲要眉頭緊鎖，愁眉苦臉咁。

似乎心事重重。

係唔係…發生咗咩事？

我有啲擔心緊行埋佢隔離。

「你…冇事嘛？望落去你好似有啲唔開心。」

佢歎咗一口氣。

「唉，數學今次考得真係差，得70分。」

阿善開始有啲眼濕濕。

「好驚返到屋企俾阿媽鬧，考得咁衰…」

好彩我有帶定包紙巾，原本係諗住用嚟食完嘢抹嘴。

佢攞起我俾佢嘅紙巾擦眼。

「冇事嘅，盡咗力就得啦。」我嘗試安慰佢。

「你唔明㗎…我屋企人好注重我嘅成績㗎…」

「一次半次姐，你其他科考得好就得啦。」

第一次安慰女仔，仲要嗰個係我女神，真係唔知講咩好。

「唔好喊啦，我鍾意你笑嘅時候多啲。」

氣氛突然變得尷尬。

我意識到好似講錯咗啲嘢。

「唔係…我係話…errr…你笑嘅時候好睇啲。」我慌忙解釋，面都開始變紅。

阿善噗哧一笑。

「好啦…都唔知你係想氹我先咁講定點。」

「開心啲啦，都考完試囉，不如一齊去睇電影，放鬆下自己。」

講出呢句話之後都有啲內疚，好似乘虛而入咁。

「好啊，咁到時照樣禮拜六，上次嘅時間同地點等。」

今次我哋去睇嗰套又係港產片，不過今次以搞笑為主。

最後一幕見到男主角同女主角激烈咁接吻。

全場嘅氣氛有啲改變。

我隻手無啦啦唔覺意咁伸咗埋去，掂到阿善隻手。

「阿善，其實…」我欲言又止。

佢一面怕羞咁望住我。

「…都係冇嘢啦。」

我始終唔敢講嗰四隻字出嚟。

始終，所謂成王敗寇，失敗咗連朋友都未必有得做。

同埋…佢應該都唔會鍾意我掛…

一齊食飯嘅時候，阿善問我：「你有冇鍾意嘅人啊？」

我不禁漲紅咗塊面。「冇…冇啊。你有咩？」

「我有啊，嗰個男仔好好人，成日問佢功課點做都肯教我，又好識得關心人…」

我心中嘅大石頭頓時沉咗落嚟。

原來…女神已經有鍾意嘅人…

咁係唔係代表…我…已經冇機會…

之後我哋之間變得好似有啲尷尬，冇乜講過嘢。

我哋去到火車站道別嘅時候，我準備行上電梯。

「譚一正！」阿善突然喺背後大嗌我個名。

我擰轉頭。

「你好細膽啊，『我鍾意你』四隻字咁易講，都唔敢講？對住你女神都唔咁表白，你係唔係男人嚟㗎？」

女神同我相距幾米，我卻好清楚咁聽到佢大鬧我一頓。

阿善行返過嚟我度，一面氣沖沖嘅樣。

「你知唔知我等咗你講呢句話已經好耐啦！已經俾晒暗示你，你鍾係唔係永遠都唔敢講呀？」

佢…而家咁樣講，到底係咩意思？

我腦袋一片空白，心入邊好似坐緊過山車咁。

「我…」一時間我唔知講咩好。

「好，你唔敢講嘛，我講！我鍾意你，阿正。」

咩…咩話？！

女神…話鍾意我？

「我…有冇聽錯？」我戰戰兢兢咁講。

「你冇聽錯！我，何心善，鍾意你，譚一正！做我男朋友！」

真㗎？

我冇發夢嘛？

我搣一搣自己塊面，係痛嘅。

「好…」

阿善未等我講完，一下伸個頭埋嚟。

錫住咗我個嘴唇。

佢拎走咗我初吻。

我喺心中不斷歡呼。

Yesssssss！！！！！

我竟然成功追到我女神！

呢刻嘅心情唔知點樣形容好，總之就係…

我得咗！

好興奮！

Yayyyyyyyyyyy！！！！！

我同阿善一齊之前嘅故事就告一段落啦。

得閒同兩個好兄弟分享下我成功追到女神嘅故事，當係教下佢哋點樣溝女。