［校園］［愛情］是咁的，我女神次次都考第一。: 三十二，實驗試

又到考試啦。

今次科學考試無啦啦多咗個實驗試，佔科學科嘅20%。

仆街了，平時我做實驗笨手笨腳，肯定拖低我啲科學分數。

雖然有得四個人一組做實驗，不過似乎我會拖累全組。

仲要冇得自己分組，到時由老師分，屌。





睇嚟今次冇得同阿琪同一組，眼白白咁睇住佢攞高分，爭贏科學第一嘅頭銜。

到咗1月3號嘅朝頭早。

科學老師早就回到班房，貼咗張分組名單喺黑板上面。

最早到嘅我，當然即刻走去望一望先…

屌，正啊！





原來老師按座位排列分組，我被分到同Ada、Patrick…

仲有我最最最鍾意嘅阿琪同一組啊！！！

今次真係掂啦。

我相信我哋嘅默契一定可以彌補我嗰啲笨拙嘅實驗技巧。

仲有，大家同一組，都應該一樣分，咁樣我就有希望有科學第一啦…





忽然感覺後面有人拍我膊頭。

「你笑淫淫，就快流口水做咩？有咩咁好睇啊？」

我擰轉頭，原來係阿琪。

我依然收唔埋嘴上嘅笑容。

「正嘢囉，你自己睇下囉。」

阿琪望下望，表情變得複雜。

「有咩咁正姐，只不過係同你一組咋喎…」

「咁仲唔正？」





阿琪歎咗一口氣。「講真嗰句，同你一組的確係唔錯嘅…但係…你啲實驗技巧真係唔得囉，可能會拖低我嘅分數，本身諗住憑住呢次實驗試超越你科學嘅成績㗎…」

我嘅笑容開始變得僵硬。

佢睇成績真係睇得好重要。

我不忿咁講：「有冇搞錯呀你，我重要啲定係你嘅成績重要啲？」

阿琪不假思索咁回答：「梗係成績重要啲啦。」

唉，真係有成績，冇人性。

「哼，你咁講，我以後唔理你啦。」我裝作憤怒嘅樣，轉身離去。





阿琪拉住我隻手：「唔好咁啦，講下笑姐，你都好重要嘅。嗱，一係咁啦，你一陣如果冇搞到我哋實驗衰咗，下午個餐我請。」

聽到女神請我食飯，我即刻露出滿足嘅笑容。

咁樣又屈到一餐飯啦，正。

其他同學陸續返到課室，Ada同Patrick望到同我一組，佢哋似乎心知不妙。

Ada話：「平時都知你做實驗係咩料啦，因住唔好又打爛支test tube啊。」

今次連Patrick都寸9我。「軒哥，你都係小心啲好，唔好一陣又搞衰咗實驗。」

唉，睇嚟今次我都喺側邊寫實驗報告算啦。

上到實驗室，老師分配每組唔同嘅實驗。





我哋今次分配到嘅係氣體測試。

正啦，呢個係我最熟悉嘅課題。

雖然步驟有少少複雜，不過如果我淨係指示組員，都應該得嘅。

「Patrick，你去攞啲火柴嚟。」

「Ada，你攞呢三支test tube，每次都倒少少sodium hydrogencarbonate solution，睇下有冇變色。」

「阿琪，你攞另外三支去倒少少石灰水落去。」

諗住純粹指示組員，避開所有實驗過程，點知…





「同學，你都要一齊做實驗，俾組員做晒唔得喎。」

老師喺我背後突如其來咁出現，令我嚇咗一跳。

為咗唔好俾老師扣分，只好硬着頭皮，去處理嚟緊落嚟嘅實驗程序。

我攞起支木條，手部不停顫抖。

Ada唔耐煩咁講：「快啲啦，擺落去個Bunsen burner度燒就得啦。」

我將半條木條擺落去燒…

「唔使燒咁多啊！就快燒到你隻手啦！」阿琪驚呼。

火焰嘅溫度逼近我隻手，我連忙嚇得縮手，條木條跌喺枱面上…

我係唔係又搞衰咗個實驗？

我下意識望去後面…

好彩，老師已經離開我哋嘅位置，去睇其他組嘅實驗。

啱啱真係嚇死。

「軒哥，你真係頭腦靈活，四肢簡單，你都係唔好再做實驗啦。」Patrick搖搖頭。

唉，之後嘅實驗過程都俾佢哋做晒，老師行埋嚟我就扮行埋去做實驗。

好彩最後都順利完成咗個實驗，攞到一個唔錯嘅分數。

我尷尬咁問阿琪：「咁係唔係請我食飯？」

佢反左反白眼。「好彩老師冇見到你失誤咋，下次再係咁我就唔請食飯啦。」

唉，如果將來有個傻仔科學理論啱晒但係實驗做到一pat屎，我估應該會係我。