考完試,接種而嚟嘅係學界比賽。

喺比賽前一日,我哋校隊決定留校加操。

練到五點半,陳Sir話:「大家都練得差唔多啦,可以返屋企休息啦。」

其他人似乎都好攰,嗱嗱臨執嘢走。

但係我同阿正、阿恆因為啱啱訓練嘅時候Hea住咁做,一啲都未攰。





仲想踢多一陣添。

等陳sir走咗之後,我哋偷偷喺儲物室執返粒波出嚟,打算踢多一陣。

阿正提議:「玩射十二碼,輸咗射龜。」

「好。」我話。

出返去足球場,忽然見到一個好熟悉嘅人。





阿琪???

我開口問:「咦,你咁遲先走嘅?」

阿琪似乎都吃一驚。「係呀,啱啱我哋家政學會有活動呀。」

見到女神,有啲想放低個波唔踢,同佢一齊走。

點知阿恆話:「咁啱嘅,我哋三個喺度踢緊波,不如叫你老公教下你踢波吖。」





咦, OK喎。

阿琪支支吾吾咁講:「可以…咩?」

阿正話:「女仔踢波得唔得㗎?」

阿恆走過去佢耳邊講咗啲唔知乜嘢,阿正露出奸淫嘅微笑。

肯定又係想整蠱我哋兩個。

我搔搔頭。「阿琪,我可以嘅,我唔想衰比佢哋兩個麻甩佬睇。」

阿琪點點頭,行過嚟足球場度。

喺女神面前曬一曬啲球技似乎唔錯。





「嗱,首先,學踢波首先要學識傳波。」我放低粒波,用腳內側傳俾阿琪。

阿琪有樣學樣,細細力將粒波踢返俾我。

似乎佢好快掌握咗傳波嘅技巧。

「阿正,幫我守一守龍門。」

我擺好粒波,用99射門力度,一下抽落粒波度。

粒波好似火箭咁飛埋去,阿正嚇到即刻縮開咗。

「砰!」直飛死角入網。





遠處聽見阿正大嗌:「咪咁大力,想射9我呀?」

阿琪有啲驚慌咁講:「Errr…我學唔到你射得咁大力喎。」

「又唔使咁大力嘅,好似比傳波大力啲已經夠啦。」

我將粒波擺去十二碼點,俾阿琪射。

阿琪一腳伸落粒波度,碌緊向前…

俾阿正接實咗。

阿琪有啲沮喪。「唔係好似傳波咁樣咩…」

「唉,大力啲啦。」





經過不斷嘗試,以及阿正不斷放水,阿琪終於射入咗一球。

「叻女喎,試咗咁多次終於成功。」我語帶嘲諷咁講。

阿琪嘟起個嘴。「又笑我,你明知我不嬲做運動都一般般㗎…你咁勁,不如試下做啲高難度嘅嘢啦。」

我微笑不語。

我原地做一做Rainbow flick。

再交叉腳窩利射入網。

簡單。





只係用呢一招,已經可以迷倒萬千少女心。

擰轉頭望一望阿琪,佢露出…有啲陶醉嘅眼神?

阿恆即刻起哄。「Woooooo,球王軒好勁啊,溝女一流啊。」

阿正話:「球王軒咁勁,不如你同你老婆一隊,同我哋兩個鬥一場波。」

What the fuck,邊度得啊。

「玩嘢啊,不了。」我話。

「哈哈,你都係驚輸姐。」阿正以挑釁嘅語氣講。

呢一句激起咗我嘅鬥志。

「鬥就鬥,驚你啊?」

我同阿琪講:「兩條友仔咁串,我哋一於一齊贏咗佢哋!」

呢個時候Ada喺學校門口行出嚟。

阿琪即刻過去同佢講:「你終於做完啦?」

「係呀,真係攰死我。」Ada話。

「佢哋兩個男仔叫我同阿軒鬥一場波,你幫我哋做球證啦。」

Ada望一望手錶。「好啊,不過快啲,鬥兩分就好,我返去有嘢做。」

阿恆話:「讓下你啦,如果你哋贏咗我哋兩個俾每人射龜,輸咗就淨係阿軒俾人射龜。」

「好啊,就咁話。」咁寸,要挫一挫佢銳氣。

我哋開波,我即刻扭過佢哋兩個,準備射門。

點知阿恆追翻返嚟,mark得我好實,搵唔到射門機會。

只好咁做,趁佢擘大雙腳嘅時候,通佢坑渠,傳俾門前冇人防守嘅阿琪。

點知佢一腳踢空氣,阿正趁機攞到波,推咗一段。

我唔夠快回防,俾佢射入空門。

再開個波,今次我直接火箭炮咁直抽入網算數。

佢哋兩個見到我招牌大力射門,即刻閃開咗。

入咗,而家輪到佢哋開波。

我上去搶波,點知佢哋兩個即刻一下one-two過咗我。

睇怕佢哋又要入波啦…

點知阿琪無啦啦突然從後攬住阿正,大嗌:「阿軒,快啲過嚟攞粒波啊!」

笑咗,咁嘅防守方法都有,不愧係冰雪聰明嘅阿琪。

阿正俾佢攬到郁唔到,粒波慢慢碌走緊,我即刻跑去搶走粒波。

「喂,咁都有?犯規啊!」佢大叫。

我冇理佢,直接射入網。

「完場!阿軒同阿琪贏咗。」Ada宣布。

阿正氣沖沖咁講:「犯規喎!嗰球要12碼喎!」

「我咩都見唔到喎。」Ada露出奸詐嘅笑容。「仲有梗係幫好姊妹啦。」

阿琪得意洋洋咁講:「抵死啦,想整蠱我哋兩個。我唔識踢波,就算犯規,你哋兩個都應該要贏啦。」

阿恆頹喪咁講:「你哋兩公婆好嘢,我哋完賭服輸,俾你哋射龜。」

佢哋兩個企喺兩條門柱度,準備受刑。

到我嘅時候,佢哋兩個擰轉頭好驚聲咁講:「遠啲,唔好咁大力,唔好中頭。」

我露出奸淫嘅笑容。

離開學校嘅時候,佢哋兩個都一邊行,一邊暗住屎忽叫苦連天。「屌,咪就叫咗你唔好射咁大力啦。」

果然我嘅遠射技巧的確唔錯,兩次都好精準咁命中目標。
已有 0 人追稿