之後又過咗兩個月。

兩個月期間,除咗家姐同阿煒分咗手,都冇咩特別嘅嘢。

就快4月15號,又到阿琪生日啦。

星期日,唔使返學,諗下約佢出去邊度玩。

我之前嗰個星期五問阿琪:「你生日想去邊度玩?」





「我要去迪士尼!」阿琪話。

我無奈咁講:「迪士尼門票好貴啊…同埋都唔係咁好玩,唔值囉。」

阿琪嘟起個嘴。「唔得呀,我生日我話事!上次你生日都陪咗你去紅館睇張敬軒演唱會啦。」

佢拍一拍前面嘅Ada。「阿軒話唔想去迪士尼喎,不如抌低佢算數,我同你兩個人去。」

Ada話:「好啊,反正你小學嘅時候次次生日都要返學,冇得同你出去玩。」





我泄氣咁講:「唉…好啦好啦,迪士尼就迪士尼啦。」

阿琪即刻露出笑容。「咁咪就好囉,記住你買門票喎。」

Ada望住我哋兩個陰陰嘴笑。「咁你哋兩個自己去二人世界啦,我唔去做電燈膽啦。」

我下意識俾咗隻中指佢。

唉,雖則話我屋企唔少錢,但係成千蚊喎…





仲要唔計入去食飯嘅錢…

算啦,女神生日,佢開心就得啦。

反正佢上次我生日都送咗件唔平嘅禮物俾我。

本身以為今次係一次開開心心嘅出行。

點知…

不似我預期。

***

星期日凌晨四點。





無啦啦自己扎醒咗。

望一望個時間,忽然想做啲on9嘢。

等到4:15,我喺WhatsApp send咗句生日快樂俾阿琪。

然後再次倒頭大睡。

再醒返已經係八點。

攞起手機,見到阿琪覆返一句話:「你真係好無聊啊…特登等到個時send俾我。唔使瞓覺咩,驚你今日去去下瞓着咗。」

笑死,即刻覆返:「無啦啦嗰時咁啱自己醒咗姐。」





「都知你冇咁好心啦。」

「一定係咁啦。你一陣嚟我屋企樓下等,我家姐仲瞓緊覺。」

「就咁話,半個鐘後見。」

我刷完牙,執好晒背囊啲嘢之後,袋好兩張門票,就出門口。

嚟到樓下,只見阿琪着咗我上年買俾佢嗰條裙,頭頂仲要帶咗頂米奇老鼠帽。

我情不自禁咁噗哧一笑。

阿琪嘟起個嘴話:「你笑咩呀?我咁嘅打扮唔係好cute咩?」

「又唔係嘅…只不過望落去幾孩子氣之餘…仲有啲on9囉。」我實話實說。





阿琪望落去有啲嬲。「有冇搞錯,我明明天生麗質,俾你踩到咁?」

「唔係呢,你都14歲囉,仲打扮得好似一個細路仔咁,雖然都幾靚嘅。」

佢喺佢嘅袋度攞出另外一頂米奇老鼠帽。「咁不如你都戴返一頂,咁你就唔會覺得我戇居啦。」

我嚇咗一跳。「你都幫我準備咗一頂?不過多謝晒唔使啦,男仔戴嘅話望落去好柒。」

阿琪不滿咁講:「戴啦,去迪士尼當然要迎合下個氣氛,我用咗$100買㗎,你戴埋我哋兩個先襯嘛。」

我無可奈何咁講:「好囉。」

為咗唔好辜負佢嘅一番心意,我只好將頂米奇老鼠帽戴喺頭上。





樓下大堂有塊鏡,望一望自己嘅樣,果然柒咗好多。

我哋一齊去食完早餐之後,就搭巴士去迪士尼。

星期日,果然勁多人。

雖然天氣唔算熱,但係摩肩接踵嘅人群已經令我汗流浹背。

排隊接近20分鐘,終於入到場。

首先我哋去咗嗰個迷你影院度嘆下冷氣先。

細細個去過幾次迪士尼,依然播緊一樣嘅嘢,其實有啲悶。

只不過阿琪依然好似一個細路仔咁,睇得好入迷。

之後我哋走咗去排隊玩彈弓狗。

呢個應該係迪士尼入邊最低級嘅機動遊戲。

玩完呢個之後,阿琪指住嗰個U形嘅唔知乜鬼恐怖機動遊戲話:「而家去玩嗰個啦!」

「唔好啦…望落去好驚喎。」我面露苦色咁講。

阿琪冇好氣咁講:「好心你啦,我係女仔都夠膽玩,俾啲勇氣啦。」

「好囉…」我勉為其難咁講。

我從細到大都唔敢玩啲太刺激嘅機動遊戲,因為我本身會暈船浪。

不過…挑戰一下自己都好嘅。

排隊嘅時候,佢同我講:「嗱,你一陣如果真係驚嘅話,捉住我隻手就應該冇咁驚嘅。」

「你話㗎。」我露出奸狡嘅微笑。

阿琪搖搖頭。「唉,你真係鹹濕佬。」

到我哋,坐上去嘅時候…

忽然有一種驚慌嘅感覺。
已有 0 人追稿