架車開始向前向後搖擺。

就好似坐海盜船咁,

我哋坐喺最後嗰排,開始感覺到有啲驚慌。

我有啲驚咁問阿琪:「Errr…好似有啲驚,可唔可以落返去㗎?」

阿琪冇好氣咁講:「唔係好驚啫,你啱啱先坐上去咋。」





架車搖擺嘅幅度越嚟越大。

開始感覺到嗰種俯沖落去嘅刺激感。

但係呢個時候,我已經驚到唔敢擘大眼。

只感覺到阿琪捉住咗我隻手。

架車去到最高,我有一種半吊嚟半空中嘅感覺。





再沖返落去,完美演繹咗咩叫自由落體。

真係仲驚過玩跳樓機。

我已經驚到身體不受控制,失驚無神咁樣大叫:「啊!!!阿琪,我其實鍾意咗你好耐!!!」

阿琪亦都尖叫回應:「阿軒我都係啊!!!」

經過一番嘅折磨,架車終於慢慢放緩速度。





停低嗰一刻,我即刻跑去廁所。

將今日朝頭早食嘅早餐都嘔晒出嚟。

行返出嚟,只見阿琪坐埋一角呆咗喺度。

我拍拍佢膊頭:「我冇事啦,行啦。」

佢好似心有餘悸咁講:「啱啱…點解…可以…咁恐怖㗎…」

我搖搖頭嘆息。「好心你啦,咁驚就唔好拉我上去玩,搞到我嘔咗一大輪。」

時間已經接近一點,我哋行咗去一間食漢堡包嘅餐廳。

嘔晒出嚟,已經冇胃口再食任何嘢。





阿琪見我乜嘢都冇食,遞咗一個佢食咗一半嘅漢堡包俾我。「你都食啲嘢啦,就算唔肚餓都咬一啖啦。」

我勉為其難咁咬咗一啖。

我前面嗰張枱坐咗三個男仔。

其中一個硬係覺得唔知係邊度見過。

阿琪問我:「你望乜嘢啊?」

「冇,淨係似乎見到一個識嘅人。」

佢擰轉頭一望,隨即又擰返返嚟。





表情…仲帶啲惶恐。

「你冇嘢嘛?」我擔心咁問。

「冇…冇嘢。」佢心不在焉咁回答。

呢個時候,前面嗰張枱嘅男仔忽擰轉頭,同我對上視線。

我即刻認出佢啦,原來係一個小學同學,Nicholas。

Nicholas似乎都認得我。

佢瞪大雙眼咁問:「咦,嗰位咪就係軒哥?」

我企起身行過去。「咁啱嘅, Nicholas,差唔多兩年冇見喎!」





佢同一張枱嗰兩位仁兄打趣咁問:「咦,你識㗎?」

Nicholas講:「係呀,佢係我小學同學。軒哥,呢兩個係我中學同學。」

佢望一望阿琪。「你女朋友呀?」

我有啲尷尬咁講:「唔係呀,朋友咋。」

Nicholas露出奸邪嘅笑容。「明嘅明嘅。」

呢個時候,我見到佢其中一個朋友眼神閃爍不斷。

阿琪不斷拍打我隻手,示意我快啲走。





我有啲唔好意思咁講:「我哋食完嘢,走先啦。」

Nicholas揮手講:「拜拜,有緣再見!」

阿琪即刻拉住我隻手離開餐廳。

我問佢:「做乜嘢啊?」

佢嘗試轉移話題:「冇嘢啊,趕住去玩其他嘢姐,不如而家去玩飛越太空山。」

佢似乎有啲嘢瞞住我。

唔通…

「林凱琪!」忽然後面有人嗌佢嘅名。

回頭一望,只見啱啱Nicholas嗰個朋友跑咗出嚟。




 
已有 0 人追稿