阿琪即刻有啲驚咁縮埋去我後面。

「做咩事?」我奇怪咁問。

嗰個男仔氣喘喘咁跑到我哋面前。

阿琪開口講:「Michael,已經過咗兩年啦,好心你唔好再嚟煩我啦。」

咩話…佢哋係識嘅? !





到底佢哋有咩不可告人嘅秘密?

Michael話:「唔通…你真係唔記得晒我哋之間嘅嘢?」

阿琪神情堅定咁講:「嗰啲嘢已經過去咗,冇乜嘢值得好留戀。」

我好奇咁插嘴問:「你哋兩個…到底係咩關係?」

Michael即刻回答:「我嘅ex。」





WHAT THE FUCK??!!

原來阿琪之前有男朋友點解我唔知?

有冇搞錯!

算啦,我以前同紫紫一齊過,佢都唔知啦。

點知阿琪即刻反駁:「唔好亂講,我同你咩關係都冇。阿軒你唔好聽佢亂講。」





我鬆咗一口氣。

Michael不忿咁講:「舊嘅事你咪認囉,佢到底係邊個,要你將呢個秘密封喺口中?唔通佢係你男朋友?」

阿琪冷冷咁講:「係又點呢,唔係又點呢,唔關你事。」

Michael話:「既然佢唔係你男朋友,凱琪你不如返嚟我身邊,好似兩年前咁,好唔好?」

咩…咩話?

竟然有人想喺光天化日之下搶我女神?!

仔細望一望,其實呢個Michael都算靚仔,有一米八。

唔怪之得阿琪會同佢扯上淵源。





不過從阿琪嘅語氣聽得出,佢對Michael呢個人有啲厭惡。

阿琪目無表情咁講:「Sorry,過咗兩年,我已經對你冇feel。」

Michael有啲氣急敗壞咁講:「你呃人呃唔到自己,啱啱明明睇住你見到我嘅時候,面都紅晒。」

呢條Michael真係好撚煩…係咁喺度纏着阿琪。

阿琪開始有啲激動咁講:「係因為我見到你就好驚,驚你又唔知點樣又騷擾我!」

Michael繼續講:「講真,兩年嚟我都未放低你,我哋點解唔可以復合?你明明對我仲有feel!」

真係好撚煩…我係時候要做啲嘢。





我不慌不忙咁拖起阿琪隻手。

阿琪一面驚喜咁望住我。

我沉住氣同Michael講:「我係佢男朋友,你唔好再騷擾佢。」

Michael有啲驚慌咁講:「你…你真係佢男朋友?」

「係。」我語氣肯定咁講。

Michael一轉面色。「嘩,你咁款都溝到凱琪。凱琪你眼光咁差㗎,不如你抌低佢同我一齊啦。」

阿琪氣憤咁講:「阿軒咩地方都好過你幾百倍,咪再纏住我啦。」

Michael寸寸貢咁話:「我唔信你哋兩個係真愛,佢好有錢?你應該淨係貪佢啲錢。」





我真係好想一拳中落佢度…

呢個時候,阿琪細細聲同我講:「你揼低少少個頭。」

我揼低頭,只見阿琪踮起腳尖。

一下嘴咗落我個嘴度…

我腦袋突然一片空白…

雙眼緊閉…

發生咩事…?





只感覺到佢嘴唇嘅體溫…

過咗10秒左右,我哋逐漸分開。

只見阿琪面紅晒咁望住我。

呢一刻,我先發現原來我俾我女神拎走咗初吻!

啊!!!

阿琪隨即同Michael講:「你見到啦,我哋兩個係真愛。」

Michael惱羞成怒,竟然突然揮個拳頭過嚟。

真係過分…

不過都好,咁我就有權利自衛還擊。

我用手掌擋開佢嘅拳頭。

Michael見呢下不成,就伸腳第二下攻擊。

真係太睇小我…我不嬲踢開波㗎。

我一下用左腳擋住佢嘅攻擊。

基於反作用力,加上我暗中施力,Michael即刻痛到縮開隻腳。

我再趁機會,一下用右腳好似射波咁大力咁,踢落去條J度!

Michael即刻暗住下面退後幾步,然後痛得跪咗係地下。

「可惡…」佢氣若浮絲咁講。

呢一種人渣,真係要攞去閹咗佢先得。

阿琪好擔心咁問我:「你冇事嗎?」

「當然冇事啦,對住呢種人渣,我唔需要留力。」我仲好氣憤咁講。

呢個時候Nicholas同佢另外一個朋友行咗出嚟。

「好心你啦,過咗咁耐就唔好再騷擾人啦。」佢另外一位朋友對住Michael搖頭講。

Nicholas走過嚟同我講:「真係唔好意思, Michael佢搞到咁失禮。啱啱我見到晒,其實佢呢幾日唔知咩事,情緒有啲問題,我哋先約佢嚟迪士尼散下心。佢啱啱做咗咩過分嘅嘢,你哋大人有大量,就當無數啦。」

我歎咗一口氣。「唔緊要啦,辛苦晒你,要睇住咁嘅朋友。」

阿琪拉住我,唔好意思咁離開咗餐廳範圍嘅位置。

我哋一路上都好尷尬,冇講過嘢。

搵到張凳坐低,阿琪突然開始崩潰咁喊到出嚟。

眼淚好似洪水缺堤咁不斷流落嚟。

我只好喺背囊攞出一包紙巾,默默咁喺隔離遞紙巾俾佢。

等咗10分鐘,似乎佢情緒開始平復。

佢開始慢慢咁講:「對唔住…阿軒…」

我奇怪咁問:「你有咩對唔住我?啱啱係個人渣嘅問題姐,你冇錯呀。」

阿琪話:「唔係…我一直拖住你…明知我哋互相鍾意對方…都係因為我嘅心理障礙…唔可以一齊…」

我疑惑咁問:「唔通…你一年前話有件傷得你好深嘅事,係同啱啱嗰個Michael有關?」

阿琪點點頭。

「你…想唔想知發生咩事?我一直想搵個人傾訴下,但係又唔敢講。你而家既然都知少少,同你講都冇妨。」佢問。

我搔搔頭。「你講啦,我睇下有咩可以幫到你。」

「事情係咁嘅…」阿琪擦咗擦眼,娓娓道來…
已有 0 人追稿