［校園］［愛情］是咁的，我女神次次都考第一。: 外傳二，林凱琪嘅回憶

我係林凱琪。

大家可以叫我凱琪或者阿琪。

要講返去我小學六年級嘅時候。

開學日。

返學嘅路上，我見到我嘅好朋友， Ada。





Ada問我：「新學期會調位，你想同邊個坐？」

我諗咗一諗。「我哋通常都要同男仔坐，咁其實冇乜所謂。」

Ada一面期待咁講：「唔係㗎，最好我隔離位係一個讀書勁，又吹得下水嘅男仔。如果我哋班有靚仔就好啦…」

我一面無奈咁講：「你淨係鍾意靚仔姐…」

「可惜冇呀，不過有幾個男仔個樣都唔差嘅，例如Michael。」





我話：「Michael咪就係全級考第二嗰個？平時同佢唔熟，冇乜留意佢。」

「係呀，佢都算我哋班數一數二唔錯嘅男仔啦。」

返到課室，當時空無一人，我同Ada係最前排坐低。

當然事情唔係咁美好，班主任返到課室之後，當然會調位。

不過之前選咗男女班長先，我無啦啦俾Ada推咗出嚟做女班長。





男班長由個位Michael擔任。

「咁為咗方便起見，男班長同女班長一齊坐啦。」老師話。

Michael執好書包，坐埋我隔離。

「Hello。」佢微笑咁坐低。

「新學年多多指教。」我話。

就咁望落去， Michael的確幾靚仔。

可能以前淨係同其他女仔行埋一齊，冇乜留意我哋班啲男仔。

不過除咗靚仔之外，佢都算係一個暖男。





平時老師叫我哋兩個出去派嘢，佢會攞多幾份派，等我唔使攞咁重。

佢都幾好人下。

小學啲嘢太簡單，當然唔會唔識啦。

不過有一次我病咗，返唔到學。

第二日返嚟，只見Michael將一本寫咗幾頁嘅筆記簿俾我睇。

「見你尋日冇返學，呢啲係尋日上堂教嘅嘢，你可能有需要睇返。」

但係…佢平時上堂唔會抄筆記？





唔通…佢係特登為我抄筆記？

自此之後，我同佢嘅關係，發生咗微妙嘅變化。

第一次考試之後，我固然持續考第一。

不過Michael今次考得有進步，拉近咗我哋之間嘅分差。

唔知點解，我有啲戥佢開心。

我同佢嘅關係已經去到好朋友嘅關係。

而家返學，期待嘅除咗係上堂，仲有同佢一齊坐。

唔通…我鍾意咗佢？





冇可能…冇可能！

我同佢只不過係朋友。

只不過…係好朋友。

但係之後有一次，我見到佢同其他女仔行得好埋。

心中竟然有一絲不安。

唔通…呢啲叫呷醋？

我對佢…唔通…已經超越咗友情？





之後有一次我試探咁問：「你…有冇鍾意嘅女仔？」

「你估下？」佢笑咪咪咁回答。

佢咁樣講…到底係咩意思？

我百思不得其解。

「其實你係咪鍾意我？」佢掉轉咁問。

我俾佢呢個問題嚇咗一跳。

「冇…冇啊。」我慌忙否認。

「冇就算，咁我走先啦。」佢裝作一面不在乎咁行出課室。

當時課室冇其他人。

我開始心急。

我從後拉住Michael。

腼腆咁點點頭。

Michael歎咗一口氣。「凱琪，其實我都幾鍾意你，只不過…」

咩話？佢話佢都鍾意我？

「只不過乜嘢？」我心急如焚咁問。

Michael回答：「我哋小學咋，要拍拖太早啦。等到去中學，我名正言順咁做你男朋友，好唔好？」

我一面期待咁點點頭。

我一直以為係我一廂情願。

原來…唔係。

實在太好啦…

我唔介意等，去到中學，同Michael開開心心咁一齊。

我當時係咁諗。

去到三月，我同Michael依然保持曖昧嘅關係。

即使又調咗位。

不過有一次Ada同我講：「你係唔係同Michael行得好埋？」

「係呀，做乜嘢啊？」我疑惑咁問。

「如果你對佢有好感，你要小心啲，我見到佢同附近啲女仔，同樣傾得好熟，有時仲講埋晒啲好曖昧嘅說話。」

「咪亂講啦， Michael唔會係咁嘅人囉。」我極力幫Michael辯護。

「呵呵，睇嚟有人沉咗船。」Ada奸笑。

我開始變得面紅。

「算啦，我而家講咩你都唔會聽得入耳，總之你自己小心啲。」Ada拋下一句。

去到五月底。

真係俾Ada講中咗。

有一日我去樓下商場嘅文具店買原子筆，準備第二日嘅考試。

出返去商場，忽然見到一個好熟悉嘅人影。

嗰個…咪就係Michael？

佢點解…拖住另外一個女仔隻手一齊行？

我嘅心好似俾劍插咗一下咁。

唔會咁嘅唔會咁嘅…嗰個可能只係佢親戚。

呢個時候， Michael轉身，無啦啦同我對上視線。

佢一面吃驚，但隨即又裝作鎮定。

我呢一刻先發現，佢隔離嗰個女仔，就係我哋課室坐佢隔離嗰個。

呢一刻，我心如刀割。

Michael話：「凱琪，佢係我女朋友。」

我已經開始控制唔到自己嘅情緒。

「你…你唔記得你之前講過啲乜嘢？」

佢厚顏無恥咁講：「吓，嗰啲講吓笑，你當認真㗎？」

我冇理到佢，忍住淚水，跑出商場。

返到屋企，情緒崩潰，大喊一場。

冇諗過…原來佢對我…係咁兒戲。

其實…始終都係我一廂情願。

我即刻打電話俾Ada，同佢傾訴下。

Ada聽完我講之後，聽到佢喺電話令一頭歎息。

「唉，你哋兩個咁嘅關係，早講啦。一睇就知Michael係渣男，唔好以為得女仔先識收兵。」

我呢一刻先發現，我原來一直做咗人哋隻兵。

可惜第二日就考試，我未能夠調節我嘅心情。

雖然話呢次考試唔重要，都唔係呈分試，不過我都考衰咗。

咁多年嚟，終於第一次失落左第一嘅位置。

俾Ada同Michael爬咗上頭。

好彩，全年成績我依然拋離其他人好多。

只不過，我哋間小學一般般，得我一個入咗最勁嘅香城中學。

去到最後一日嘅小學返學日。

放學嘅時候，已經一個幾月冇溝通過嘅Michael，突然從後面拉住我。

「凱琪，俾多次機會我，俾我做你男朋友。」佢懇求咁講。

只不過，我對呢個欺騙我感情，傷得我咁深嘅人，已經冇任何感覺。

「哈哈，你唔係有女朋友咩？」我一下撥開佢隻手。

「我對佢只不過係玩玩下咋，對你先係真心㗎！」佢焦急咁講。

睇嚟，佢應該係俾佢女朋友飛咗。

「你真係唔記得咗我哋嘅約定咩？」佢步步進迫。

「死渣男，行開啲！」Ada行埋過嚟，一把推開Michael。

其他女仔朋友都行埋過嚟幫拖。「咪係咁纏住阿琪啦，死開啲啦。」

就連佢嘅前女友都加入戰團。「阿琪，千祈唔好信佢，佢對你同對我一樣，都係講好多甜言蜜語，跟住對第二個女仔又係咁，所以我先飛咗佢。」

「我…」Michael見到形勢不對，就夾着尾巴逃走咗。

從嗰日之後，我冇再見過Michael。

佢都搵唔到我，因為我已經封鎖咗佢IG同手機號碼。

嗰日返屋企嘅路上，我已經哭成淚人。

Ada拍拍我膊頭。「唉，你真係信錯人。」

我抹一抹個鼻。「我唔會再相信任何愛情啦。」

我一直係咁諗。

即使係中學，遇見咗一個叫王子軒嘅人。

仍然唔敢相信愛情。

直至…