原來如此…

聽完阿琪咁講之後,我真係覺得嗰個Michael好仆街!!!

正宗渣男,一腳踏兩船。

竟然對住阿琪咁好嘅女仔,玩弄佢嘅感情。

「嗰個Michael而家會去咗邊?我而家去打佢一餐。」我氣沖沖咁講。





阿琪捉住我隻手。「你又冷靜啲…唔好理佢呢啲人啦。」

我好不忿咁講:「佢真係正宗人渣!點解佢可以咁對你㗎?佢而家仲想翻撻,好彩你唔受咋,肯定佢又想一腳踏兩船!」

阿琪哭喪臉咁講:「唉…可能我唔好彩掛,遇到一個錯嘅人。」

我歎咗一口氣。「我都好明白你嘅心情…畢竟…」

阿琪疑惑咁問:「你都曾經遇過咁嘅人?」





「唔係…都係冇嘢啦。」我搖搖頭苦笑。

因為,以前係我傷害咗其他人嘅感情。

只不過,呢一刻我已經成功挽救自己嘅過錯。

「係呢,你對Michael其實仲有冇留戀?」我問。

阿琪有啲不滿咁揼咗我一下。「我梗係冇啦,你邊可以咁樣講㗎!」





我似乎講錯嘢,有啲愧疚。

畢竟我唔係好識氹女仔。

阿琪繼續:「同埋,你知我對邊個真心㗎…」

我哋不禁漲紅咗塊面,互相對望。

開始有啲情迷意亂。

仲記得,阿琪喺Michael面前拎走咗我嘅初吻。

的確唔錯…但係個場合就爭少少。

我想…





我細細聲咁講:「其實你啱啱…喺Michael面前咁做,係…」

佢怕羞咁講:「我係要特登做俾佢睇㗎…叫佢死心…」

我問:「你之前唔係話…唔肯咩…」

阿琪頓了一頓。

「其實…我唔介意…」

「咁不如…嚟多一次…」我提議。

「吓…?」





就好似聖誕節嗰一晚咁樣,相同嘅情節再次發生。

喺我哋就快雙唇緊接嘅一刻…

阿琪推開咗我。

只見佢又流下兩行眼淚。

我慌張咁問:「對唔住呀,係唔係我迫得你太急?」

阿琪搖搖頭。

佢擦一擦眼淚。「心理創傷…我唔敢再相信愛情。」

沉默良久。





阿琪開口。「阿軒,要講對唔住嗰個係我先真…拖住你咁耐。」

我話:「其實…我啱啱諗返起,你以前咁,有機會係收我做兵。」

佢有啲不滿咁講:「喂,我似係咁嘅人咩?」

我吃吃笑咁講:「唔係呢,你上年同一日話你鍾意我但係未可以一齊…真係有啲似娘娘收兵嘅做法。雖然我知你對我係真心嘅…」

阿琪有啲嬲咁講:「喂呀!咁係真㗎嘛,同埋我對你都係認真嘅…」

我問:「咁…你真係都鍾意我?」

佢腼腆咁點點頭。





「其實…我係想俾返個承諾你。」阿琪。

「承諾?」我疑惑咁問。

阿琪神情有啲堅定咁講:「如果…我哋下年都係同一班,我就做你女朋友。」

我吃了一驚。

「呢個約定條件…似乎有啲簡單。」

阿琪話:「其實我係想你俾啲時間我,我會…努力克服我嘅心理創傷。」

我慌忙講:「但係…你唔好強迫自己啦。」

「唔係…我都想有一個人愛護我。」

佢伸出手指尾。「我哋就咁約定好,唔好反悔。」

我遲疑咗一下。

伸出自己嘅手指尾,勾下去。

之後我哋玩多幾個機動遊戲,已經六點。

返歸嘅巴士上,阿琪攰到俟喺我膊頭上瞓着咗。

我望住眼前呢個女仔。

下定決心,一定要用盡自己全力守護佢。
已有 0 人追稿