［校園］［愛情］是咁的，我女神次次都考第一。: 四十，阿恆俾人老屈

喺我等待嗰個約定嘅同時…

三日後嘅中文堂。

「何諾恆，蔡永源，你哋兩個企起身。」

中文老師鄧sir一入班房就叫人企起身，似乎準備要鬧人。

阿恆一面無辜咁望住我哋企起身。





到底發生咩事？

鄧sir打開投影機，將兩份工作紙俾全班睇。

嘩…

兩份工作紙嘅答案完全一模一樣，錯別字都錯埋同一隻字。

「我懷疑你哋兩個其中一個抄功課。」鄧sir嚴肅咁講。





企起身嘅蔡永源默不作聲。

佢係葉仆街嘅仔，上堂經常發夢，功課經常交唔齊，成績全班墊底，真係唔知佢點解會入到A班。

或者…係靠關係入？

總之，阿恆平時好認真做功課，咁今次應該都係蔡永源抄功課。

但係…阿恆點解會無啦啦借功課俾佢抄？





阿恆即係舉手。「阿Sir，我冇抄人功課，我都冇借份功課俾人抄。」

Ada亦都舉手講：「我收功課嘅時候，何諾恆係準時交，而蔡永源去到小息先交。」

Ada係中文科長，佢幫阿恆證明咗佢嘅清白。

如果蔡永源去到小息先交，抄功課嗰個毫無疑問係佢。

鄧sir好嬲咁咆哮。「蔡永源！你知唔知呢份功課我俾咗一個禮拜你做，你唔做不特止，仲要抄人功課，你讀咩書啊！」

佢鬧人，我哋已經見怪不怪。

就連我都俾佢鬧過。

呢個時候，有個女人喺出面走廊停下腳步…





Oh holyshit…

係葉仆街。

佢打開我哋班嘅房門。

「呢班發生咩事？」佢疑惑咁問。

葉仆街嚟到，一定冇好嘢。

「Miss Yip，你嚟得啱啱好，阿蔡永源佢抄同學功課。」鄧sir話。

「抄咩功課？」





「你睇下屏幕。」

突然有一種不祥嘅預感…

葉仆街望向屏幕，搖一搖頭講：「冇可能喎，我明明前幾日望住永源喺屋企做呢份功課。」

What the fuck…

咁即係話…

但係蔡永源仍然低頭，冇一絲喜出望外嘅表情。

鄧sir一面茫然咁講：「咁…到底係邊個抄功課？」

葉仆街露出冷酷嘅眼神。





「當然係另外一位同學啦。」

阿恆即刻反駁：「我根本冇抄過功課！」

葉仆街以斥責嘅語氣講：「同學，而家係咩態度同老師講嘢？而家證據確鑿，你點樣解釋？」

Ada幫阿恆出聲：「冇可能，明明佢係準時交，得你個仔遲交喎。」

竟然發生咁嘅事…

不過我相信阿恆。

唔通係…葉仆街講大話，幫佢個仔脫罪？





阿琪戰戰兢兢咁舉手：「老師…我相信只係一件誤會，我以班長之名保證何諾恆從來唔會抄功課。」

葉仆街話：「呢兩位同學，你哋頂撞老師，唔係想記過？」

仆你個街…

阿琪咁好語氣同你講，都算俾面你啦，你咁樣鬧翻佢轉頭都得？！

我即刻好火滾咁拍枱。

全班以詫異嘅眼神望住我。

我破口大罵：「你個垃圾教畜，你上屈完我都唔夠，依家仲要幫住自己個仔，老屈我嘅同學，你簡直唔配做老師！」

葉仆街竟然俾我嘅氣勢嚇得有啲面青口唇白。

佢似乎身有屎。

葉仆街有啲口窒咁講：「呢位同學你好大膽…你同埋啱啱嗰三個同學放學訓導處見我，我而家要開會，一陣先處理你哋。」

跟住佢就急急腳離開班房。

佢好嘢…

中文堂係最後一堂，落咗堂之後…

阿正走埋過嚟，氣憤咁講：「一睇就知葉仆街屈9阿恆！」

阿琪沮喪咁講：「咁而家點算…真係要落去見佢？」

阿恆話：「當然唔好啦，唔好俾佢先下手為強，我返去搵證據證明我係無辜。」

於是我哋幾個放學攝手攝腳咁，喺學校後門打算離開。

點知…

「你哋幾個唔係要嚟見我咩？諗住偷走？」

仆街了…葉仆街喺我哋後面出現。

我哋當然會就咁俾束手就擒。

三十六計，走為上着。

我即刻拉起阿琪隻手跑出學校門口。

點知Ada俾人嚇呆咗，企喺度唔郁。

「同學你好大膽！竟然打算逃走？」

眼見葉仆街就快追到埋嚟…

阿恆只好拉起佢隻手，拔腿就跑。

Ada一面又驚訝又有啲驚喜…

離開咗學校範圍之後，我哋氣喘喘咁停低。

阿琪擔心咁問：「而家搞到咁嘅地步…我哋會唔會有事㗎？」

Ada話：「唔驚，反正有全班做證，我哋冇做錯過咩。」

阿恆有啲內疚咁講：「真係對唔住，搞到大家咁麻煩。」

我忽然諗到一樣嘢。

「我諗到一個計劃，所謂解決唔到問題，就解決提出問題嘅人。」

Ada問：「即係…？」

「就係咁…」