第二日朝頭早。

我哋四個按照原定計劃,喺去學校嘅必經通道附近匿埋。

由於唔想搞到其他人,我叫咗阿正同Patrick唔好嚟,到時食花生就算。

七點三十分。

目標人物出現。





葉仆街同佢個仔,蔡永源出現係我哋視線範圍。

佢哋喺嗰個位…應該唔會望到我哋掛。

我哋屏息靜氣。

望住佢哋兩個走咗入學校門口,計劃就正式開始。

我哋迅速考入學校,走上我哋班房嘅樓層。





然後各自喺廁所門口後面匿埋。

過咗一陣,聽到有一陣急速嘅腳步聲。

稍微打開偷睇,原來係葉仆街。

隱約聽到佢同蔡永源講:「睇嚟你嗰四個同學未返到,我過多一陣再抄佢哋落去。」

然後葉仆街就行返落去教員室。





確定佢真係落咗去,我哋從廁所走出嚟。

行入班房。

蔡永源見到我哋嘅時候,一面驚訝。

佢口窒窒咁講:「Errr…我阿媽叫你哋…落去見佢…」

阿恆冷笑:「哈哈,幾時被告變成原告?」

望住我哋四個,永源嚇到一屁股坐咗喺張凳上面。

「你哋…想點…」佢慌張咁講。

「你誠實回答我哋問題,我就放過你。」我怒氣沖沖咁講。





「我…好,你問。」永源裝作鎮定。

阿恆問:「老實講,你係唔係抄咗我份功課?」

永源戰戰兢兢咁講:「阿媽話…」

Ada插嘴。「唔好話你阿媽話,你好快啲講事實!」

「係…功課係我抄…」

呢一刻,我哋知道計劃成功咗。

只不過。





「喂!」班房門口俾人撞開。

係葉仆街。

「你哋對我個仔做咗啲咩啊!信唔信我踢你哋出校?」佢指住我哋鬧。

我冇理佢,攞出我收埋喺褲袋嘅部手機。

「係…功課係我抄…」

手機斷斷續續播放啱啱我嘅錄音。

阿琪對我露出勝利嘅微笑。

葉仆街似乎已經失去理智。





「永源!你點解要咁講?尋日唔係講好咗咩?」佢質問永源。

永源哭喪臉咁講:「對唔住阿媽…我都係覺得屈其他同學唔係咁好…」

葉仆街急躁咁講:「你…知唔知道你咁樣,我哋會有咩下場?」

我插嘴講:「喂,你估下如果我公開咗錄音,會發生咩事?」

葉仆街慌忙講:「同學,有事慢慢講,唔好咁衝動。」

我哋大吃一驚。

佢竟然會呢種懇求嘅語氣同我講。





葉仆街雖真係好仆街,但係睇得出其實佢好愛錫自己個仔。

或者係,過分嘅溺愛。

「吓,你尋日好似唔係咁講喎。」阿琪話。

葉仆街慚愧咁講:「係…我尋日太衝動,請你哋放過我哋兩母子啦。」

其實都好嘅,我又唔想搞大件事。

我話:「得嘅,尋日發生咩事當冇發生過,同埋唔該你做老師做得好啲,唔好搞到我哋呢啲好學生。」

葉仆街羞愧咁講:「好…咁尋日嘅事就一筆勾銷啦。」

然後佢就尷尷尬尬咁離開班房。

我哋面面相覷。

呢件事真係神奇…完全出乎我哋意料之外。

不過算啦,又唔係一定要搞到佢死先得。

仇恨總比和平好嘅…

(講聲唔好意思,近排勁多嘢做,冇時間更新。🙇‍♂️由於我打一章二三千字要差唔多兩個鐘,而家開始我盡量隔一兩日更一次,但係每章會得一千字度,費事一個禮拜先更到一次,還望讀者見諒。😅)



 
已有 0 人追稿