又過咗一個禮拜。

「嚟緊呢個禮拜,我哋會同隔離幾班搞一個比賽,你哋對搞咩比賽有冇意見?」Mr Chan朝頭早班主任課嘅時候講。

班際比賽…

梗係有搞踢波啦!

Mr Chan補充:「呢個比賽會分開男女搞嘅,可以揀唔同嘅比賽。」





阿正第一個舉手。「我要搞踢波!」

Mr Chan將「足球」呢個選項寫喺黑板上面。

「仲有冇其他建議?」佢問。

好好彩,我哋班大多數人都係鍾意踢波嘅。

結果「足球」順理成章咁成為我哋班男仔揀嘅比賽。





女仔嗰邊就揀咗閃避球。

阿琪同我講:「你成日笑我運動差,今次俾你睇吓其實我都唔差嘅!」

「睇住先啦,仲有你淨係識打閃避球,萬一隔離班唔係揀呢樣嘢呢?」我話。

佢嘟起個嘴。「咁你係班會主席,你一陣要同我說服佢哋,一定要搞閃避球!」

「好啦,盡量啦。」我無可奈何咁講。





作為班會主席,放咗學之後,我同隔離班去開會。

男仔嗰邊,足球就毫無懸念咁四班通過晒。

只不過女仔閃避球嗰邊…

同排球打和緊…

其中有份投排球嘅2B班班會主席係阿善。

睇嚟呢鋪我要說服佢,先可以幫到阿琪。

諗到一個辦法。

「唔好意思,我出去聽我電話先。」我語帶抱歉咁行出班房門口。





我打咗俾阿正…

同佢講咗一陣之後,我遞咗個電話俾阿善。

唉,我真係覺得自己好賤格。

阿善聽完電話之後,對我翻一翻白眼。

「我都係決定投閃避球啦。」佢話。

結果最後決定咗女仔嗰邊搞閃避球。

搞掂。





希望今次比賽,阿琪會玩得開心啦。

而我哋都想贏。

要開始挑選正選球員。

當然,我、阿正、阿恆係必然正選。

只不過,我哋班其他人踢波一般般。

當然,我哋三個絕對有能力carry我哋班去咗比賽。

但係,足球唔係三個人嘅運動。

好彩,今次只係七人足球。





我決定第二日放學之後,叫晒成班男仔落學校足球場,睇吓佢哋邊幾個掂。

雖則話Patrick都係一個忠實球迷,但係佢踢波原來都幾屎下…

唉,在佢嘅苦苦懇求下,最後俾咗佢打龍門。

之後再揀多三個踢波唔太差嘅肥仔打後衛,咁就揀完。

準備等待星期四嘅四強比賽。

嚟一場大屠殺…

淨係贏邊度夠呀…
已有 0 人追稿