下半場開始。

對手開波。

我哋好快就好輕鬆咁截到佢哋傳波。

阿恆推落底線。

我跑入禁區,舉手示意。





阿恆見到我舉手,就拉弓出波。

粒波打斜傳咗出嚟,去咗十二碼點位置。

正合我意…

我係小禁區內走返出嚟。

望見粒波飛緊埋嚟,我舉高左腳。





然後右腳用力一踏…

利用反作用力,我成個人跳起咗。

右腳凌空伸到半空中垂直。

眼見粒波嚟到隻腳,加力一踢!

啊…係倒掛金鈎啊!!!





細個睇日本嗰套動畫片足球小將,主角太空翼勁鍾意倒掛。

所以我細個已經學佢呢招,一直練到而家。

只不過…

隻腳淨係揩到粒波少少,只有些微改變方向。

落地嗰下,又係屎忽落地,果然又有啲痛。

起身一望,只見粒波慢慢碌咗入網,阿正跑去慶祝。

應該係…我倒掛不成,反而傳咗俾阿正,變咗助攻比佢入波。

我苦笑咁走過去同佢擊掌。





阿正話:「唔錯啦,自己想入波變咗助攻。」

我不忿咁講:「我一陣再試多次,唔信今次入唔到。」

之後陸陸續續又入多幾球。

去到完場先10分鐘,對手終於因為我哋後衛嘅失誤,獲得咗一個角球。

對手斬出嚟,我頂贏曬,俾咗阿恆。

佢一下再傳咗俾走咗上去嘅我。

半場線出少少,我望見龍門企左出嚟。





後面對手嘅後衛而家先開始慢慢追緊上嚟。

如果我選擇繼續推進,一定單刀直入。

不過咁輕鬆就入咗,太簡單啦。

既然贏緊咁多球,不如試吓啲難度高啲嘅嘢。

我右腳拉弓,勁大力咁抽落波底度。

粒波好似炮彈咁飛出去…

龍門似乎心知不妙,跑返去個龍度。

可惜佢已經太遲。





皮球拋物線咁下墮,直飛入網窩。

龍門成個人收唔切掣,沖咗入個網度。

勁啊!!!半場笠死龍門! ! !

我興奮到跑去觀眾席慶祝。

只見除咗阿琪之外,仲有幾個女仔以崇拜眼神望住我。

嘩…

入完波之後,比賽仲有啲時間。





可以試多次倒掛金鈎。

之後又係阿恆傳中,只不過接應嘅係阿正。

佢將粒波頂高。

到我表演時間。

又係左腳舉高…

過程我就唔重複啦。

右腳踢到粒波嗰一刻,我知道入硬。

當我倒地嗰一刻,歡呼聲四起。

同時,聽到哨子聲。
已有 0 人追稿