「砰!」

粒波中柱彈出。

可惜啊…

爭少少就入啦。

唔緊要,仲有唔少時間。





雖然今次唔入,但係香蕉球的確幾有用下。

大軍啱啱對我呢一招束手無策。

睇嚟只需要遠距離射門,距離入球就唔遠啦。

對手開龍門球。

大軍仍然依靠一球嘅領先優勢,留喺後面防守。





冇過幾耐,阿恆好快截到波。

我喺後面跑上嚟。

推入咗路,扣過一個防守球員。

眼見大軍跑過嚟,拉弓準備起腳射門。

忽然見到阿恆走到去一個更好嘅位置。





我即刻重施故技,假射傳咗俾佢。

阿恆唔等大軍跑埋嚟,即刻右腳撞埋去。

使出一記「猛虎射門」。

作為一個中場,佢嘅遠射能力都唔錯。

呢一球仲要射到有啲飄。

飛緊去龍門嘅上死角。

對手嘅慾望已經冇晒反應。

剩係得個望字。





「砰!」

唔係嘛?!

啱啱中完柱,而家又中楣?

不過,今次係中楣彈地。

似乎過埋白界。

對面嘅龍門撈翻粒波出嚟。

「喂!入咗喎!」我大聲向球證嗌。





球證展示交叉手勢,示意話唔入。

真係黑哨…

我都無謂同佢爭論,跑前逼搶。

之後,攻極都攻唔入。

遠射得太多,已經筋疲力盡。

射出嚟啲波都強差人意。

剩返幾分鐘。

我又準備遠射。





點知大軍已經捉到我路。

已經封盡我射門角度。

點算好?

我只好放手一搏,放棄射門。

硬推落底線。

大軍又一下飛剷。

我跳起避開來勢洶洶嘅攔截。





大軍剷粒波出界。

角球。

我走入禁區,大軍緊緊咁盯實我。

我哋全部後衛,甚至係守龍嘅Patrick,都走埋上嚟。

剩返嘅時間唔多,可能都係最後一擊了。

阿恆開角球,大斬過嚟。

上半場我喺角球輸咗比大軍。

今次絕對要贏番!

大軍知道身高優勢不及我,已經暗地使出陰濕招。

佢係咁扯住我件衫。

冇辦法,呢個黑哨球證睇嚟都唔會吹犯規。

我就要你犯規都好,我照樣頂入!

粒波去到我度,我同大軍兩個人奮力跳起。

我突然暗中背後施力。

跳起嘅大軍俾呢一股突如其來嘅力撞到失去平衡。

跌落地下。

我輕鬆頭槌一頂。

皮球向左下角飛去。

入得了…

點知對面個龍門叉隻腳出嚟。

擋到一下。

又中柱?!

有冇搞錯!!!

點解今日我哋完全冇晒運?

不過,呢個時候, Patrick喺後面衝埋嚟。

龍門已經落咗地。

Patrick腳趾一督。

入網啊!!!

我哋追成平手啦!!!

入球功臣居然係守龍嘅Patrick。

佢開心到手舞足蹈,跑去觀眾席慶祝。

跌喺地下嘅大軍好不忿咁猛力拍地。

都係全得我,空中爭奪中贏咗大軍,先會製造出呢一球入波。

時間仲有2分鐘。

似乎入球嘅機會都唔大。

睇嚟都係等互射十二碼算…

唔得唔得!

我糾正自己。

和局然後射十二碼贏,根本唔係真正嘅勝利。

喺法定時間取得勝利,先係我想要嘅嘢。

最緊要嘅係,為阿正報仇。

對手回到中圈,準備開波。

「衝啊!」喺開波嘅一刻,我大聲喊叫。

我哋學對手一開始嘅戰術,全部人衝上前逼搶。

對手啱啱失咗波,未調節好狀態。

結果俾我哋逼到踢出界。

時間仲未結束。

直接吹雞嗰一刻,我哋都要奮力爭取勝利。

阿恆處理界外球。

我控到波,傳返俾阿恆。

佢一球直線又傳俾我。

我處於半單刀姿態。

前面剩返龍門同留守後半場嘅大軍。

而家我有兩個選擇。

一,係直接射門。

二,係扭過大軍再射門。

呢度射門似乎太遠,某部份嘅射門角度都俾大軍封阻到。

但係今場比賽未有人試過扭過大軍。

仲係我諗緊嘅時候,大軍已經殺上嚟防守。

唔通…要試下用新方法?

呢一招,成功機會唔大。

不過用得到,一定可以入波。

我推落底線。

大軍又一下飛鏟埋嚟。

只好咁啦…

我使出「牛尾巴」(elastico)。

右腳腳趾尾推波向右一撥。

然後右腳腳趾公突然將粒波球扣向左邊。

通咗大軍渠。

喺佢即將鏟到我嗰一刻,我即刻用一個前空翻跳起。

居然完美落地。

攞返粒波。

完美咁避過佢嘅攔截。

同時都ankle-break咗佢。

勁啊!

隨即聽到觀眾席已經傳嚟一陣歡呼聲。

似乎有啲仲要嚟自2B班。

單對單面對龍門,我選擇輕鬆一撥,死角。

入波!

2-1!

逆轉勝啊!!!

我興奮到跑向觀眾席,除衫慶祝。

學美斯咁將自己件波衫展示喺其他人嘅面前。

順便展示一下自己嘅腹肌。

見到阿琪開心到面都紅晒。
 
已有 0 人追稿