「喂?」

從睡夢中依晞蘇醒嘅我,攞起不斷響嘅電話。

「阿軒,係我呀。」

聽到阿琪嘅聲音,我猛然清醒。

「係,打俾我做咩啊?」





「本身咪就話,今日我哋約去書局買練習,之後再嚟你屋企一齊溫書嘅?」

差啲唔記得,原來我今日約咗阿琪。

「原來我今日要去同親戚食飯,陪唔到你去啊,對唔住呀阿軒。」佢語帶歉疚咁講。

「咁啊…」我難免有啲失望。

難得有機會可以同女神一齊溫書,等佢教下我啲唔識嘅地方。





由於聽日就開始考試,必須捉緊時間準備。

「唔緊要啊,咁聽日先啦。」

「咁好啦,聽日學校見。」

唉,諗住趁家姐同佢啲同學去咗日本畢業旅行,可以靜靜雞同阿琪喺自己屋企二人世界。

算啦,聽日先。





我落床,刷完牙之後發現原來已經九點啦。

喺雪櫃搵咗塊麵包食,就當咗係早餐。

雖然阿琪今日冇陪我,但係書都係要溫,練習都係要買。

換好衫褲鞋襪,孭起個背囊就出發去書局。

我今日準備幾千蚊去買啲練習做。

當然順便去買附近嘅運動店買對波鞋。

去到書局,隨意咁遊蕩。

忽然見到一本新出嘅小說。





呢個小說系列我一路有追開睇。

我忍唔住,即刻買咗先。

喺處個門口極速睇晒成本書。

睇完,發覺原來已經到十一點幾。

我重新走入書局搵練習。

揀下揀下。

攞一本出嚟睇嘅時候,突然唔小心整到其他書都跌埋落嚟。





砸到側邊嘅一個女仔。

我慌忙執起地下啲書。

「對唔住呀!你有冇事呀?」我連忙道歉。

「冇嘢啊…」個女仔抬起頭。

咦…

紫紫?

「咁啱嘅?」我詫異咁問。

話說其實我同紫紫雖然話係做返朋友。





不過由於係唔同班,甚少同佢交流。(當然見到面都會一齊講下嘢。)

更何況,阿琪應該都唔會想見到我成日搵另外一個女仔。

「咦,原來係阿軒。」佢有啲腼腆咁講:「你嚟書局做乜嘢啊?」
已有 0 人追稿