我話:「嚟買練習啊,聽日就考試啦。」

紫紫有啲驚訝咁講:「你咁勤力嘅?我都係嚟買小說睇咋。」

我搔搔頭。「冇辦法…中文我麻麻地。」

紫紫指住我買嗰本小說。「咦,你有睇開呢套小說嘅咩?」

原來咁啱佢都有睇。





「係呀,你睇晒之前嗰八集未啊?」我問。

「當然有啦!你買咗可唔可以借來睇一睇。」佢問。

「好啊。」我遞本書俾佢。

當紫紫睇緊書嘅時候,我就喺側邊揀練習。

過咗一陣,我都揀完。





已經十二點。

紫紫問我:「我睇完啦…不如一齊去食中午飯?」

應該都可以嘅…

橫掂屋企都冇人,費事喺屋企食杯麵。

「好啊,咁行啦。」





嗱,事先聲明。

我冇諗住對紫紫做出一啲越軌嘅行為。

只不過當係小學同學聚下舊。

希望阿琪唔好諗咁多。

我哋行出商場。

朝頭早仲好好陽光,但係而家天空滿佈烏雲。

似乎係暴風雨嘅徵兆。

搵咗一間拉麵店食嘢。





紫紫問我:「記唔記得之前…我哋嚟過呢度食㗎?」

我尷尬咁笑咗笑。

「當然記得。」

其實…我係唔想記起。

我哋食完野之後,出面開始落大雨。

紫紫喺背囊度搵把遮。

「死啦…出門口冇攞遮添。」





佢以懇求嘅眼神望向我。

「好啦…咁我遮埋你啦。」

於是我擔遮同紫紫行出餐廳。
已有 0 人追稿