出面嘅雨真係好大。

把遮只可以勉強遮到我哋兩個。

氣氛竟然變得有啲尷尬。

我忽然諗翻起兩年前。

第一次約佢出去玩,突然落大雨。





而家再次回憶…依然有啲愧疚。

紫紫打破沉默嘅空氣。

「阿軒…平時同你好熟嗰個女仔,係邊個嚟㗎?」佢有啲怕羞咁問。

「Errr…」我有啲唔好意思咁講:「我嘅…朋友。」

「你確定?我仲以為佢係你女朋友添。」





我尷尬咁講:「點會係呀…」

紫紫勉強擠出笑容。

「其實…」佢欲言又止。

「你話咩話?」我問。

「都…都係冇嘢啦。」





我皺一皺眉頭。

「你係唔係有咩煩惱?」我問。

紫紫點點頭。

「係唔係考試壓力大呀?唔好迫自己太多啦,平常心應對就得㗎啦。」我嘗試安慰下佢。

紫紫尷尬咁笑咗笑。

去到火車站。

由於佢係住遠少少,所以要搭火車返去。

「咁係咁先啦, 返去休息下,唔好俾咁大壓力自己。拜拜。」我同佢道別。





擰轉身走之際。

「…阿軒!」

紫紫叫停我。

我擰轉頭。

只見佢露出一種奇怪嘅眼神。

帶着憂鬱,但係又有一點堅強嘅目光。

「其實我…唔係因為考試壓力大。」





咦……

我一時間諗唔到嘢。

「咁…」

「阿軒…其實我…」

我聽到佢嘅聲音一直喺度顫抖。

紫紫含含糊糊咁將幾隻字講出嚟。

然後頭都唔回咁轉身跑走。

我而家腦海入面,真係有萬遍數唔清楚嘅思緒。





佢…真係……

我嘗試行前再問佢一次。

但係紫紫已經準備拍咭入閘。

「嗶!」

八達通唔夠錢。

佢呆若木雞咁企喺原地。

「紫紫!等一陣!」





佢擰轉頭,雙眼流出兩行淚水。

「你唔使咁樣…我唔值得你為我傷心。」

講到呢度,我都開始有啲眼濕濕。

「阿軒,我真係仲鍾意你…我唔係講緊笑…」

「唔係唔係…我真係唔值得你咁對我…」

「你聽我講,自從上年見返你嗰一刻,我發現我依然忘記唔到你…」

一輪沉默。

「不如…我哋再一齊返,好唔好?」

「唔好啦…我之前傷害咗你咁多…」

「唔…緊要㗎!我唔介意令你真係鍾意我,都唔會驚再受傷害,只要…」

我真係唔想再傷害佢…

同埋…

我唔想違背我對另外一個女仔嘅承諾…

「阿軒…?」

「對唔住…」

紫紫終於忍唔住情緒爆發。

爆喊咁跑過嚟攬住我。

「俾多次機會我哋…好唔好?求下你…」
已有 0 人追稿