終於考完試啦…

今次算係不過不失啦。

今年啲中二升中三,主科全部要高過70分嘅要求都取消咗。

所以即使我中文得個60分,我都可以跟阿琪一齊升上A班。

派晒所有卷之後,係時候放鬆下。





不過都要履行我同阿琪嘅約定。

咁呢啲嘢,冇理由要女仔講出口。

我決定。

要親自表白!!!

於是喺六月尾嘅一個返學日。





放咗學,我約咗佢喺學校附近嘅公園等。

去到嘅時候,我見到佢自己一個坐喺滑梯旁邊。

係機會。

我偷偷走過去。

然後突然從後攬住佢。





阿琪俾我嚇咗一跳。

「阿軒?你咩事呀?」

「阿琪!你可唔可以做我女朋友?」

「哎呀你咁樣唔好呀,你放開我先啦。」

「唔好呀,你唔應承我,我就永遠攬住你唔鬆手。」

「好啦好啦我應承你,放開我先…」

我鬆開雙手,暗自竊喜。

阿琪攤收手。





我愣一愣。

「做乜嘢呀?」

「你唔係會有嘢送俾我咩…」

阿琪露出失望嘅表情。

「仲枉我咁期待添…」

係喎,唔記得咗。

我吃吃笑咁講:「送禮呢家嘢,就好似浮雲咁樣,毫無意義。」





阿琪嘟起個嘴講:「咩無意義啊!我睇漫畫、電影,人哋男主角表白嘅時候,都會送一大束花,或者一啲特別驚喜俾女主角。可惜我唔係女主角啫…」

我搔搔頭話:「咁呀…下次送返俾你囉。」

阿琪不滿咁講:「咩下次呀!表白呢啲嘢,得一次咋,冇啲儀式感係唔得㗎。」

我忽然諗起一樣嘢…

下個禮拜學校周年紀念日,有才藝表演,我有份上去。

咁咪就得囉!

我笑住咁講:「今日我講嘅嘢,你當冇聽過啦,你都係等多一個禮拜。」

阿琪話:「一個禮拜…咁耐嘅?」





我話:「到時你咪就知囉,而家要保持神秘感。」

阿琪充滿期待嘅眼神咁講:「咁到時睇你啦喎!你做得好啲先應承你。」

我話:「梗係會好啦,我有邊次失手㗎~」

返到屋企之後,我call咗我班老友。

「你哋幾個,幫下手,完咗事請食飯。」
已有 0 人追稿