「咩話,想同我哋夾band?」阿正驚訝咁講。

阿恆話:「點樣㗎?我唱歌好難聽喎,千祈唔好叫我唱。」

Patrick話:「唔係好想上台表演喎…」

「其實係咁嘅…」

我同佢哋解釋完,佢哋都顯得唔係好興奮。





「啫話又要俾你出風頭…」

「要我哋幫你溝女…點得㗎。」

「我咁渣,搵我冇乜好處喎…」

真係驚咗佢哋。

「好啦好啦,完咗之後請你哋食自助餐。」





「嘩,咁就得。」

「多謝晒軒哥。」

「記住唔好走數。」

呢班友仔真係…

見財開眼。





算啦,佢哋肯幫手就得。

***

一個禮拜之後。

學校周年紀念日。

朝頭早係開放日,好多學會都整咗唔同攤位。

我都想去玩呀…

只不過,要準備晏晝嘅才藝表演。

所以我同佢哋三個去音樂室苦練。





希望一陣表演唔會出現差錯。

由於我係諗住俾一個驚喜阿琪。

所以佢完全對我將會上台表演嘅事,一無所知。

「你哋喺度做乜嘢呀?」

音樂室嘅門突然被阿琪推開咗。

我哋俾佢大嚇一跳。

「冇嘢啊…我哋喺度玩下…玩下啫。」我含糊其詞咁講。





阿琪疑惑咁問:「你哋唔使準備學會攤位咩?」

阿正話:「其實…唔使嘅。」

阿琪話:「咁你哋慢慢喺度玩下先啦,樓上有好多好玩嘅攤位,你哋一陣可以去下㗎。我哋家政學會整咗好好味嘅曲奇,一陣記住過嚟試下。」

嘩…曲奇…

仲要係阿琪整嘅…

真係流晒口水。

不過一陣先試啦。

練習緊要。





等阿琪走咗之後,我哋繼續練習。

應該唔錯㗎啦。

練習完,去到中午。

阿琪喺學校門口等我。

「你啱啱點解唔嚟呀…」佢似乎有啲唔開心。

「Errr…有緊要嘢做啊。」

佢俾咗一個盒我。





「好彩我留咗俾你咋,唔係啲曲奇俾人食晒啦。」

「哇咁正!真係多謝你呀。」

我打開個盒,食咗一塊曲奇。

「真係幾好食喎,同出面買嗰啲相差唔遠。」我讚不絕口。

阿琪笑住咁講:「梗係啦,呢幾塊係我親手整,專登留俾你㗎。」

佢突然問:「喂你同我講,你哋四個啱啱喺音樂室做緊啲乜嘢?你哋一陣係唔係會上去表演?」

竟然俾佢估中咗…

我話:「嘻嘻,唔講得。」

佢不滿咁講:「點解唔同我講啊?」

「你一陣咪就知囉。」我故作神秘咁講。

同佢食完飯,返到學校。

我哋係壓軸出場。

睇咗前面啲人嘅表現,都覺得佢哋好勁。

我紙褔有啲壓力。

終於到我哋啦…
已有 0 人追稿