「多謝!」

我唱完之後,掌聲四起。

其實咁樣當眾示愛真係有啲尷尬。

雖然我嘅成功率係百分之百。

同埋我都唔驚全校人都知道我同阿琪嘅關係。





因為Mary係common女仔名。

我哋班已經有三個Mary。

我落返嚟嘅時候,阿琪行過嚟等我。

未咁快啊傻豬…

我喺佢耳邊講:「等一陣啦,仲有驚喜俾你。」





佢開心到滿面通紅。

我一笑,就走出學校門口。

雖然學校開放日呢個時候都宣佈結束。

但係興奮嘅嘢仲未完。

我哋班一陣有個大食會。





當係學期完,臨別聚會。

我一陣諗住喺全班面前同阿琪表白。

俾佢感受下「儀式感」。

哈哈,我等咗呢日好耐。

睇嚟幾順利。

依家準備去花店攞一紮花。

係我預先訂購,準備送俾佢嘅。

去到花店,見到門口有一大紮玫瑰,拼砌成一個心形。





咁嗰個一定係我㗎喇。

我俾完錢老闆,佢問我:「送俾女朋友㗎?」

我笑住咁講:「準確啲來講,係準女朋友。」

老闆大笑咁講:「哈哈,你哋而家啲後生仔都幾有心機。」

呢個時候,鈴聲響起。

我攞起手機:「喂?」

「阿軒,唔好喇,今次賴嘢啦。」





係阿恒。

我有種不祥嘅預感。

「隔離班嘅大軍啱啱走過嚟同阿琪表白…」

我嚇咗一跳。

「唔係嘛?」

「阿琪而家唔知點算好…」

我手嗰紮花跌咗落地。
已有 0 人追稿