［校園］［愛情］是咁的，我女神次次都考第一。: 六十六，唔完美嘅表白，但完美嘅復仇

吓…

咩話…？

「阿琪唔知點樣拒絕佢先好，你都知啦，大軍係一個好野蠻嘅人，要小心啲處理。」

嚇死咩…

我仲以為阿恒話阿琪諗緊接受邊個好…





冇嘢，都係我諗多咗。

明明佢鍾意嘅係我。

我執返起地上嘅花。

「你哋等我一陣，我而家跑返嚟。」

我以衝刺嘅速度跑返學校。





去到學校門口，見到阿琪喺度等我。

佢急忙咁講：「點算好啊…我應該點樣拒絕佢。」

我露出狡猾嘅笑容。

「一於咁啦…」

佢聽完我嘅計劃之後，反咗我一下白眼。





「一啲都唔浪漫。」

我微微一笑。「非常之浪漫，你一定鍾意。」

其實呢，呢個大軍，我都忍咗佢好耐啦。

自從上次俾我ankle-break之後，佢就一直針對我。

次次校隊訓練，同我一對一對抗嘅時候，總係偷偷踢我幾腳。

比賽嘅時候，無論係校內訓練比賽定係學界，都唔會交波比我。

仲要試過喺IG向學校Secret匿名投稿詆毁我。

雖然佢鍾意阿琪係冇錯嘅…





不過呢個的確係一個復仇嘅好時機。

我問阿琪㗎：「其實你係點樣識大軍㗎？」

佢話：「之前課外補習班，咁啱同佢一齊上堂囉，同佢唔算好熟啦，佢應該唔知我叫Mary嘅。」

係喎，如果佢知道，就唔會愚笨咁明知失敗仲要去表白。

我問：「咁得意，咁佢又鍾意你嘅？肯定你又好好人成日幫佢啦。」

阿琪話：「邊度知啫，我啱啱同佢講要自己消化下呢樣嘢，先偷偷走咗落嚟搵你。」

「咁而家上返去啦，記住我啱啱講嘅嘢～」





「好啦好啦。」

返到課室，見到我班嘅同學，仲有大軍。

大軍企起身同阿琪講：「咁…你考慮清楚未…」

我開口幫阿琪講：「佢唔使考慮啦，人哋已經有男朋友。」

大軍開口大笑：「有男朋友？唔通係你？」

阿琪話：「對唔住，的確係阿軒啊。」

全班又開始嚟「Wowwwwww!!!」

大軍假裝冷靜咁講：「吓，咁你IG profile又話單身嘅？」





我話：「咁的確前1秒我哋未一齊…」

「但係由呢1秒開始就係。」

我抱高阿琪，相視而笑。

然後相吻。