學校開放日完咗之後,我哋2A嘅成班好朋友,一齊走咗去食自助餐。

而家姐都趁機加入咗。

呢個係我第一次同阿琪正式以情侶身份出街。

Ada同我講:「你以後要對佢好啲,唔係我一定唔會放過你!」

我吃吃笑咁講:「當然啦,當然啦。」





阿恆仰天長嘯:「你同阿正都已經有得拍拖,點解仲未到我嘅?」

Patrick拍拍佢膊頭講:「恆哥,耐心啲等候,緣份一到自然會有。」

「唉,我哋兩個單身狗都要互相扶持下,Patrick我都祝你快啲出pool啦!」

家姐似乎好開心咁摸咗一下我塊面。

「衰仔,終於得咗啦,開唔開心啊?」





我望住同我拖緊手嘅阿琪,相視而尷尬咁笑。

「何止開心呀,搵到個咁冰雪聰明,又靚又可愛嘅女朋友,一陣返去要去還神啦!」

阿琪靦腆咁講:「都唔知你係唔係咁諗…」

我搣咗佢一下面豬登。

「講真㗎,真係好可愛~」





佢真係好得意呀~

阿琪挨住我膊頭講:「你個衰人,成日蝦我嘅。」

阿正話:「你哋兩個夠啦,知你哋一齊咗好興奮,但係都唔好再打情罵俏啦。」

「你嗰時同阿善啱啱一齊咪又係咁,仲喺度討論你嘅長度添,咪以為我唔記得呀。」

巴士到站,我哋落車去到食自助餐嘅餐廳。

應佢哋要求,呢一餐當然係我請…

成$5000呀…

雖然老豆老母都留左唔少錢俾我。





但係呢啲已經係我一個月嘅零用錢啦…

算啦,大家食得開心就好。

有三文魚刺身,有生蠔,有和牛…

我要起動了!

真係令人垂涎三尺。

甜品部仲有心太軟。

我哋仲可以自己喺心太軟側邊,叫師傅用朱古力寫字。





我當然寫咗一個俾阿琪。

佢見到之後笑咗出嚟。

「軒X琪,世一情侶?幾有創意呀。」

「你睇下,我咁多才多藝,你又咁聰明,仲唔係世一?」

呢個時候,阿恆有啲尷尬咁捧咗一個心太軟過嚟。

佢後面嘅Patrick大聲嗌:「加油!去啦!」

阿恆面紅晒咁遞咗個心太軟俾家姐。

上面寫着:





「To 子睛姐

你好靚女」

Errr…

***

對唔住,我返咗嚟。

下一章會係中二篇最後一章。
已有 0 人追稿