阿恆咩事…

佢唔同諗住去溝我家姐?

家姐尷尬咁笑:「多謝你喎…阿恆。」

阿恆頓時面紅得更加犀利。

我問Patrick:「你哋兩個搞乜嘢啊?」





Patrick話:「啱啱我同阿恆猜包剪揼,話輸咗嗰個咁樣送個心太軟俾你家姐。」

阿恆口窒窒咁講:「Errr… Patrick話你家姐幾靚,想搵個人去溝佢。」

Ada奸笑咁問:「其實你係唔係鍾意子晴姐?」

「邊會啫…」

「咁睇吓你塊面紅到咁,又點解釋?」Patrick問。





「咁尷尬嘛…軒哥你唔好誤會,我唔係諗住溝你家姐,自知有力不逮。」

我捻住嘴笑。

「明白嘅,明白嘅。」

我唔知呢~

不過如果阿恆想追我家姐,咁就要加把勁啦~





我知佢係好正直嘅男仔,佢要我幫手會幫佢嘅,對家姐都有好處。

食完放題之後,我諗住同阿琪去二人世界拍下拖。

其他人都好識趣,坐車走咗先。

盛夏嘅中環維多利亞港海旁,有唔少情侶喺度拖手散步。

而我終於同佢哋一樣。

我好感恩,搵到個又聰明又可愛,仲要好愛我嘅阿琪。

佢問我:「其實咁耐都未問過…你到底鍾意我啲咩?」

「嘻嘻,其實一開始識你嗰陣,我有啲憎你㗎,好似扮到成個乖學生咁,有啲煩膠囉。」





佢不滿咁講:「有冇搞錯啊,你竟然咁樣諗我,仲有我呢啲叫正直囉。」

「冇所謂啦,第一印象又唔重要。記唔記得有一次中一校隊比賽,你過嚟睇嘅第一場?」

「梗係記得啦,你俾個茅柴整到受傷咗,之後仲上咗你屋企打邊爐。」

「係呀,嗰時覺得你好好人,就鍾意咗你囉,就係咁咋。」

「咁如果有個女仔都對你好好,你會唔會鍾意佢啊?」

「有機會㗎,但係畢竟而家我鍾意嘅人係你,我哋之間獨一無二嘅經歷,我同其他女仔冇㗎。」

「好啦…」





「咁我又問你啦,咁點解你鍾意我嘅?」

其實我都唔係好知點解阿琪會睇得上我。

我一開始對佢都一般般啫。

「其實…」

阿琪開始怕羞咁面紅。

「我第一次見到你,覺得你呢個男仔,雖然寸寸貢咁,但係望落去唔知點解有種友善嘅感覺。」

「我同你之前講過我小學嘅時候發生咗嘅嘢,令我有一段時間,唔敢將自己真正嘅內心袒露俾其他人睇。」

「雖然你嗰時算係粗人一個,但係成日見到你都會笑,係發自內心嗰種微笑,唔知點解開始融化咗冰封嘅內心。」





「同你相處,我覺得可以將我自己嘅嘢、諗法,同你分享,覺得你係一個好值得交往嘅朋友。」

「跟住你又唔知點解啦,對我越嚟越好,我就諗緊其實你係唔係鍾意我。」

「我本身有啲懷疑,你係唔係假裝對我好,想追我。」

「但係,點睇你都係嗰個友善開朗嘅阿軒,完全冇任何包袱。」

「我一直猶豫咗好耐,直到有一次阿善同我講。」

「佢話,佢同阿正留意到,你成日見到我嘅時候好興奮,唔自覺會做啲奇怪動作,或者無啦啦自己偷笑。」

「我嗰時先相信,你對我係真心嘅,突然好感動,慢慢咁就鍾意返你轉頭。」





原來佢係咁樣諗我嘅…

我將阿琪抱入懷中。

「你知道實在太好啦,我對你的確百分之百係真心。」

我有啲感動到流咗幾滴眼淚。

「阿軒…你做乜喊呀?唔好喊啦…」

我抹一抹眼。

「唔係呀,我開心得滯啫,原來我可以令你重新打開內心,我純粹覺得好感動。」

阿琪問:「咁你可唔可以做我嘅第一個,同埋最後一個?」

「當然可以。」

我應承你。

從今以後我只會愛你一個。

我會用一切去實踐呢一個承諾。

包括過去嘅共同回憶。

呢一刻嘅溫馨浪漫。

將來嘅幸福美滿。

***

中二篇完。

對唔住咁多位讀者,我更文太過冇規律,經常都有一段時間消失咗。

不過希望大家睇得開心。

呢個故,我其實冇諗住帶出乜嘢寓意,只不過寫一寫主角們中學生活嘅點點滴滴。

希望大家睇得開心啦。

中三篇今年內我會寫埋喇。
已有 0 人追稿