【BL|耽美】《我終於勾引到青梅竹馬同我夜夜笙歌》 | 又名《解鈴》: CH10 萌芽 / 也許我都有愛戀的運氣

蕭楚灝駕駛著車子在高速公路上奔馳，紅燈亮起時他伸手輕放在柳曦宜的額上，體感溫度燙得厲害。


他再撫上柳曦宜帶着紅暈的臉側，omega似是察覺到涼涼的觸感，往他的手蹭著。


從佐敦到荃灣，只需半小時，到達時，蕭楚灝從車上暗處隨手撕下一張黃色的便利貼，寫上自己的電話號碼和名字簡寫，放進柳曦宜校服的口袋裏。

然後摟著他下了車，讓他的手臂搭於自己的肩膊上，對於身高只有172的omega來說顯然有點吃力。






兩人乘搭升降機後到了姨媽家門前，按下清脆的門鐘。


叮噹————


來人不耐煩地打開門，手中握著平板電腦，機械刀劍撞擊的鏘鏘聲從裝置發出，頗為礙耳。






「唔好意思打搞晒，柳曦宜有啲唔舒服，我係醫務室負責同學，所以送佢返嚟。」


「喂！起身啦！」眼前比蕭楚灝矮半頭的人用力地拍打著柳曦宜的臉龐，企圖把他叫醒。


見那人如此粗暴地對待病人，蕭楚灝心感憎惡，但礙於良好教養沒表現出來：「請問你係？」


「我咪係佢表哥囉。」






「你哋同住？」


表哥不滿地說，語氣裡盡是厭惡：「係佢喺度賴死唔走咋，你估我好想同佢一齊住？」


「佢屋企人呢？」


「吓？你唔知咩？佢老豆老母好多年前死撚咗啦，佢係死剩種嚟㗎。」


「咁麻煩你好好照顧佢。」縱然蕭楚灝直勾勾地看著表哥的雙眼，依舊禮節不減。






「咩態度啊你？你係佢邊個啊？憑咩order我做嘢？」表哥蠟黃的臉不可控地戚著，苦著臉的五官聚集在一起，眉頭皺得難看。


「佢發緊燒，你好好睇住佢。」蕭楚灝眼裡一片狠戾，眼角眉梢都是陰沉的，方才有禮客氣的態度一瞬間都成了表哥的錯覺。


表哥不知道這種無形的壓迫感和恐懼是從哪裡來的，可能是優性alpha與生俱來的姿態，亦可能是蕭楚灝的眼神過於銳利，但他確實從心生出膽怯，無計可施之下只好死死氣地回蕭楚灝一句知道了。


蕭楚灝離開後，表哥半推半撞的把柳曦宜帶回小房間，關上門。


柳曦宜歪歪斜斜地走到床邊，意識模糊地脫下骯髒的校服，扔在地上，脫光躺上床昏睡過去。






蕭楚灝回家後當然少不免接受表弟和妹妹的質問，為免令事情複雜化，他隨意砌詞搪塞過去。


兩人見蕭楚灝全沒解釋的意欲，只好就此作罷。


--

十一月來到尾聲，步入看似浪漫實質是商家暗地裡競爭的十二月，商場以奪目的佈置吸引消費者的眼球、商舖以稀缺效應操控他們的心理，務求令顧客失去理性地大開殺戒。


博頤書院也應節地掛上花花綠綠的聖誕裝飾，同樣地亦準備舉行每年都有的秋冬季旅行。






學生旅行分為三個組別，中一中二；中三中四；中五中六，進行 為期三日兩夜的小旅行。


「今朝呢，早會咪話就快去camp嘅，五個人一組，今日放學要交分組名單俾班會主席，我哋點分好啊？」林沁玥吃著最後一件水牛芝士比薩興致勃勃地問。


袁允渝扯過她的手，往比薩上咬了一大口：「都係我哋四個㗎啦，不過差一個喎，搵邊個好？」


林沁玥問：「你哋其他班有冇熟人啊？」


楊仲凌答：「冇喎。」






於是眾人的目光看向用不鏽鋼叉子捲著意粉的蕭楚灝。


「望我有咩用？」


袁允渝調笑著說：「你啲fans呢？」


「撚有？問學生會會長啦。」蕭楚灝失笑，望向楊仲凌。


「妖你啦。」


蕭楚灝邪笑看著百口莫辯的楊仲凌：「嗰日好多人喺學生會室門口等你喎。」


袁允渝揶揄：「係喎，唔記得人哋係學生會會長㖭。」


楊仲凌澄清：「唔係囉，嗰次我係要同康樂啲人傾Christmas singcon嘅野咋嘛。」


林沁玥岔開話題：「今年Sing con諗唔諗住請歌手啊？ 」


「都應該會啩，打頭陣炒熱個場先吖嘛。」


「諗住請邊個啊？」


「諗緊腎仔佢哋。」


「得返三個星期咋喎，唔洗快啲send invitation咩？」


「呢兩日會叫人去搞㗎喇。」


「咁會唔會公開嘉賓？定係保持神秘感等啲同學期待吓。」


「保持神秘感啦，有驚喜吖嘛。」


「都係。」楊仲凌點頭，認同她的意見。


蕭楚灝言歸正傳：「咁所以分組嗰度點？」


袁允渝突然想起酒鬼溫楚穎：「Umm……仲有穎仔喎！同佢一組我哋夜晚一定可以瘋狂飲酒！」


「唔得啦屌，第二日仲有其他活動，宿醉就仆街。」


蕭楚灝平淡地說：「佢應該一早分好，唔會同我哋一組。」


袁允渝不肯輕易放棄：「你問吓佢先啦，快啲啦。」


蕭楚灝只得撥了電話給溫楚穎。


「喂？穎仔？」


「咩料啊大佬。」


「阿渝叫我問你，camp分咗組未，未就join我哋。」


「你哋唔夠人咩？」


「五缺一。」


「妖啦，冇人先搵我，不過你遲咗少少喎，我已經俾好多omega叫晒入佢嗰組喇，你要知你個妹我係萬人迷嚟。」一切都在蕭楚灝的意料之內。


「算啦咁冇嘢喇，bye。」


「你再搵吓人啦，一定搵到！」


「得喇。」


「點啊點啊，穎仔講咩啊？」林沁玥懷著一絲希望地問。


蕭楚灝：「佢話佢一早有組，你哋又唔係唔知佢咩料。」


林沁玥問：「咁我哋點啊？求其搵個人湊夠數？」


楊仲凌：「唯有係咁。」


林沁玥提出更好的方案：「阿渝，你不如喺IG開個story問吓…會唔會有人想join我哋？定係凌凌公器私用，用學生會IG出story吓人？」


「都得喎，我而家開個story先。」袁允渝答。


「唔喇，阿渝搞咪得囉呢啲嘢，我不嬲低調開㗎喎。」


袁允渝拆穿他：「低調就唔會做學生會會長啦。」


「頂你。」楊仲凌裝作生氣從她的盤子裏挖走了茄汁肉丸。


--

放學回到家後，等溫楚穎與朋友們視像通話完畢，蕭楚灝走進她的房間問。


「穎仔，你嗰組有咩人？」


「做咩咁問啊，咁八卦？想偷人？」


蕭楚灝一臉認真：「你當係。」


「乜你咁㗎，搞錯啊。」發現兄長沒說笑的意思，溫楚穎心裏有點不悅，但仍照直說。


「我嗰組有我隔離位、前後……。」


「係咪有柳曦宜？」蕭楚灝心裏一沉，果真有柳曦宜在內。


「係啊，你咁記得人哋嘅？」


「叫佢嚟我嗰組。」


溫楚穎不滿：「吓，點解啊？我已經分好組喇喎，點解你自己唔搵過其他人？」


「你再搵其他人，我淨係想要佢一個。」


溫楚穎不肯退讓：「咩事啊你？就算我肯放人，都要睇吓佢肯唔肯㗎嘛。」


「咁我自己同佢講，你俾佢電話我。」即使蕭楚灝上次已留下電話號碼給柳曦宜，至今仍沒有接到任何一個他的來電。

「我問吓佢先想唔想。」溫楚穎認為柳曦宜的意願極為重要，傳送了訊息給他。


溫楚穎：曦宜bb 我有嘢想問你


柳曦宜：好呀 你問啦


溫楚穎：我大佬想同你講兩句 我俾你電話佢得唔得


柳曦宜：可以呀 佢搵我做咩呀


溫楚穎：我叫佢自己同你講


於是蕭楚灝撥打了電話給柳曦宜。


「喂？請問你…？」


「喂，柳曦宜。」蕭楚灝性感低沉的聲線轉入柳曦宜耳道，每一字像是縫紉的針線牽引在他的心。


前一刻溫楚穎說兄長要致電自己，下一秒電話就響起，心心念念的人沉穩的聲線就落入耳中，任誰都能聯繫起兩人的關係。


「我係溫楚穎阿哥。」很多人盡皆知的話往往是為了緩解空氣突然安靜的尷尬場面。


「請問咩事呀師兄？」

蕭楚灝和自己就似沒有任何羈絆，只剩下「朋友的兄長」、「高年級的學長」的疏離關係，柳曦宜鼻子越發地酸，紅了眼。


蕭楚灝單刀直入：「遲啲去camp過嚟我嗰組。」


「吓……？」柳曦宜反應不過來。


「你又話做咩都得？唔肯？」


「我冇唔肯呀！」柳曦宜的腦袋攪成一團漿糊，思路繚亂，意外的驚喜就像得到天掉下來的蘋果餡餅，失措又雀躍。


「咁你同溫楚穎講聲。」


「知道。」柳曦宜乖乖應下。


「就咁話，byebye。」


「byebye……師兄。」柳曦宜聽對方無意繼續對話，依依不捨的道別，等到另一端傳來機械的嘟嘟聲，他才放下電話。


他失神地坐在床上，眷戀著蕭楚灝低啞的聲線。


他看著通話記錄的一串數字，小心翼翼地把電話號碼加到聯絡人，聯絡人名稱為一個純紅色心形的表情符號。


柳曦宜盯著幽幽藍光的熒幕看得出神，暗自偷樂著——自己得到他的聯絡方式了。


自己好像離蕭楚灝近了一點，僅是那麼的一點就心滿意足了。


他把電話放在胸口上，攤睡在床上，胸口裏彷彿揣著一隻看見新鮮紅蘿蔔的小兔子，怦怦地跳個不停，似乎怎樣跳也無法掩蓋此刻的歡躍。


「好開心呀……」他看著牆紙掉落的天花板，載滿灰塵的燈罩、壞掉一個的燈泡，喃喃自語。