簡介

緣份... 一早已經錯過,我同你,一早已經長大成人...... (IG - @lclkhy)





  正午12點,袁德中學嘅大禮堂入面,一個個學生井井有條咁坐好咗係座位上面。
 
「噠噠噠~」
  
  冇規律嘅按筆聲可以話禮堂中任何一個角落都聽到。在場每一個人都好認真咁做緊手上面嘅入學試卷。
  
  雖然以一間band2學校本身嘅成績嚟講稱唔上特別出眾。但係呢間學校每年都成功送到好多對未來充滿期望嘅學生行上自己理想嘅道路。
  
  所以,即使佢唔係一間出名嘅名校,係每年嘅中一收生月份, 呢間學校依然都係大排長龍座無虛席。
  




  始終大部分嘅學生會讀書都係為咗未來可以做到自己理想嘅工作,行到自己希望行上去嘅道路~
  
  否則人生又有何意義呢?
  
「刷刷刷刷...」 鉛芯筆快速咁係試題卷上面走動,任宇天好認真咁完成緊手上嘅考題。
  
  雖然以佢嘅能力絕對唔可以話做得得心應手, 但係要簡簡單單拎個合格他都有能力做到。
  
  「 時間到,請停筆。 」 喺禮堂前面嘅老師叫道,所有同學頓時停低雙手。 歷時兩個鐘頭嘅入學考試終於都結束。
  




  「 請將試卷由後傳上嚟 。」 老師講完, 所有人都開始將試卷傳上。
  
  試卷一張張咁傳上嚟, 喺後面已經存咗試卷嘅同學即刻表現出一個懶洋洋嘅樣, 始終考試都係一個令人疲倦嘅時刻嚟。
  
  就喺試卷傳到去任宇天手上嘅時候......
  
  一陣強風突然喺身邊吹過, 睇嚟禮堂側邊嘅天窗有幾個冇閂到。
  
  呢一陣強風差啲就將任宇天手上嘅試卷都吹走, 好在佢及時捉住試卷安然無恙。
  




  而同一時間 ,任宇天發現,自己嘅枱上多咗一樣唔屬於自己嘅嘢。
  
  係一條粉紅色嘅絲帶手繩。
  
佢拎起咗條手繩, 咁樣嘅設計好明顯就唔係男性款式, 呢一條係一條女性手繩,任宇天確信。
  
而一條咁樣嘅手繩唔會無緣無故出現係自己面前, 應該就係頭先嘅一陣強風將佢喺隔離枱吹咗過嚟喇。
  
  任宇天知道之後馬上就向住風吹過嚟嘅方向望過去, 不出所料面前正正係一個女孩子。
  
  果然呢條手繩係隔離位吹過嚟。
  
  正當任宇天準備開口向佢嘅隔離位 搭話之時。
  
「 考試正式結束 ,各位同學可以收拾你哋嘅 物品離開禮堂 。」 前面嘅老師大聲宣佈, 同時所有嘅同學都馬上行動起來。




  
冇一個同學希望逗留喺考場多一秒鐘, 而喺面前嗰一位女孩子亦都唔例外。
  
  不出三兩下手勢佢就已經收拾好行裝 踏步離開。
  
「啊! 等等啊!」 喺後面 慢人一步嘅任宇天 不停咁叫。
  
  可惜佢就係聽唔到 。
  
  任宇天收拾好物品就 拎住手繩追咗出禮堂。
  
佢急步跑到落去樓下操場, 喺操場入面周圍咁望, 希望可以搵到頭先坐喺隔離嘅嗰個女孩。
  
可惜操場實在太大, 四圍又多人,佢可以話係完完全全跟甩咗。
  




就喺任宇天不斷抓頭唔知點做嘅時候, 一個影子喺佢身邊行過......
  
  任宇天認得呢個影子, 雖然只係一閃即逝但係......
  
  佢依然記得,佢就係頭先坐喺自己隔離嘅各位女同學。
  
就係呢一刻,佢一個轉身同時伸出右手。
  
一下拖住咗佢隻手。
  
「 唔好意思呀 。」任宇天講咗句。
  
面前嘅女同學慢慢擰轉身, 然後用一個疑惑嘅眼神望住佢。
  
「有...有咩事呀?...」




  
  任宇天有啲錯愕, 面前的確係一個女孩子。
  
   但...就唔係頭先坐喺自己隔離嘅嗰一位。
  
「 唔好意思...認錯人...... 」任宇天放開隻手。
  
四圍嘅人已經走得七七八八, 睇嚟佢已經走咗。
  
「唉......」
  
  任宇天嘆咗口氣, 然後望住手上面嘅手繩, 心裏面諗。
  
  佢會嚟呢度考試應該都會入嚟呢度讀... 或者...係開學嘅時候還番畀佢, 都唔遲吖。
  




有咗呢種諗法之後,任宇天算係鬆咗一口氣。
  
佢將條手繩收喺書包,就大步離開學校,心入面期待住取錄之後嘅中學開學日。
  
但係...令任宇天估唔到嘅係...
  
從嗰日之後,佢就再冇機會見到手繩嘅主人......
  
佢哋嘅緣分,緣盡於此 ......

  
PS. IG:《 lclkhy,樂然 》
已有 0 人追稿