2008年10月24日 星期五
我一如既往咁番學
一如既往咁抄功課
一如既往咁上堂
一如既往咁同fd吹下水目夾下女
一如既往咁係第二堂就叫晒肚餓
第三堂就傾今日食咩
一如既往咁傾到lunch都未決定好
一如既往咁去番個間就黎食到想嘔既餐廳…
所有野都一如既往咁進行…


本身放學既時候,我地係一班毒撚fd去搭地鐵番屋企
點知今日女神無啦啦係放學前15分鐘約我,叫我陪佢去報補習
我當堂嚇左一跳,雖然平時我同佢有傾有講有笑,但估唔到佢會約我而唔約佢班八婆fd…
而我亦都估唔到我既女神竟然唔係我既幸運女神…
甚至為我帶黎不幸…
 
放學既時候,我同女神肩並肩踏出校園,行去補習社(或者叫係補習公司更恰當)。
係途中我問女神點解搵我陪佢去,佢ee哦哦咁講左2句廢話
我就知道,其實佢係搵我黎激佢男朋友
可能佢地又嗌左交啦


雖然佢已經有男朋友,但我都好想自己可以係佢心中佔一席位…
 
我地首先行左去遵理,拎左d資料之後再行去現代
再由現代行去calvin sun同女神報英文
不得不提一樣野,現代個種推銷手法真係令我好反感
利申:從來未試過補習
真心唔明點解咁多人去現代補
你係讀到書既,唔洗補習都一樣讀到架啦
當然呢番說話我唔會同女神講
搞完一大輪之外,我就同女神行落地鐵站


我地學校係旺角,女神住尖咀,我住觀塘。
兩個相反方向,或者代表住我同女神呢一世都係向相反方向走…
我係地鐵站告別女神之後
搭上左個班地鐵
一班6時44分係旺角停站,由油麻地開往調景嶺既地鐵…