「丫,其實我地點解要去探佢地?又唔係話熟,係架車上面個陣野都無講多句…」肥仔問我
「乜唔係你提議既咩?」我反問
「我提議完先發覺其實無咩意思…」
「是但啦,還店又無野做。畢竟我地都叫係一齊經歷過個件事。」
「但一諗到去到唔知講咩好既尷尬場面,就唔係咁想去。」肥仔果然係個不善社交既毒撚。
逼係架巴士入面,我有小小懷念仲係『魂』狀態既自己,果個狀態的確係逍遙自在無駒無束,甚至可以馭風而行,穿牆而過~仲要跑極都唔喘氣唔流汗…好處真係多到數唔晒…
唯一壞處就係…
個陣我唔係人…
「喂落車喇呀肥!」
巴士上既肥仔左擠又擠,其他乘客都擺出一面厭惡既表情…做肥人,的確好唔方便。


肥仔千辛萬苦終於落左車,見到佢落到車都喘晒氣,我都”登”佢辛苦…
「你有冇諗過減肥架?」我問肥仔。
「無喎,毒撚要有毒撚既自覺,肥同毒永遠都係perfect match!」
「頂你唔順。」
去番前幾日去過既病房,發覺唔見晒d熟悉面孔…
「姑娘姑娘,前幾日仲訓係度既個位小姐,呀叔,同後生仔去左邊呀?」我隨手搵位姑娘黎問…
「呢度有好多位小姐,呀叔同後生仔架喎…」姑娘回應…
俾佢講一講,我發覺我唔知佢地咩名…上次只係黎呢個部門搵佢地…咁岩俾我見到…
「之係係地鐵突然昏迷俾人送入黎既個幾位。」肥仔補充
「哦哦,有位女仕堅持要出院,今朝走左喇,個位後生仔跌親,依家係骨科…而個位中年呀叔,仲昏迷緊,送左去其他病房。」


!!?
仲昏迷緊?
 
一個走左,一個跌親,一個仲昏迷緊…
點解個中年呀叔仲未醒呢…?
其餘四人都醒左,點解個呀叔仲未醒呢?
雯雯話過,個人素質好既人會早d醒番,雖然我唔知
佢所講既個人素質係乜野,但無理由個中年呀叔既素質會係五人中最差,而且差到我醒左成兩日佢都未醒掛…
唔知…佢會唔會一直訓落去唔醒…
「姑娘,請問岩先提到既個位呀叔俾人送左去邊度呢?」我問


「哦哦,就係XXX號房。」
行到入XXX號房,望住仲昏睡緊既呀叔,我有點黯然既感覺…可能係因為佢唏噓既鬆根配合埋蒼白既面孔帶俾我既錯覺…
「呀叔,雖然我同你都叫係三唔識七…但我都希望你可以早日醒番…祝你好運。」我係慰問卡上寫上字句,然後同肥仔步出病房,巧遇mk仔…
更巧合既係,mk仔同肥仔一樣整親隻腳…
見住mk仔一拐一拐咁,心裡不禁有點痛快既感覺!
「咦喂,乜係你地呀!」mk仔不改佢大呼大叫既本性。
「係呀,諗住黎探下你地,你做咩咁唔小心整親隻腳呀?」我故作關心。
「屌咪撚提,行行下路俾條唔知咩線”kick”親,成個人仆左落地囉!」
嗄?
同肥仔一樣,俾條應該係儀器線之類既野”kick”親,然後仆街,然後整親隻腳…
又會翹到咁都有…
「你無事丫嘛?」側旁既肥仔開口慰問
「算係咁啦,死都死過喇,仲驚乜?」
「喂呀賢!死得未呀?」
我望向聲音傳黎既方向,見到兩個mk妹,唔洗問,一撚定係黎探個位叫呀賢既mk仔,仆你個街,呀賢真係例排mk名黎!10個呀賢8個都mk!


「未死得!」mk仔講完之後就伸左隻手去攬mk妹條腰
真係頂佢唔撚順,祝你仆多兩下街!
「我地唔阻你喇,就先」說罷我拉住肥仔就走。